2010-10-27 AD
|
||||||
|
老總S住在西雅 圖，有位好朋友教授L，教授L日日在網上睇左丁山，呢日又來電郵賜教，回應十月二十一日本報「鼓勵副學士」。教授L話佢曾經在普渡大學教過書，好多人（美 國人亦在內）誤會普渡係私立大學，其實普渡係州立大學（唔，好彩左丁山冇寫錯），與印第安納大學屬於印第安納州係「一級大學」（Tier I University），研究與教學俱佳，教授L話美國州份嘅大學，一般分四大類，第一類係私立大學，第二類係州立一級，然後有Tier II，跟住係社區學院，印第安納州如此，加州如此。以加州為例，私立大學有史丹福、南加州及一啲博雅學院（liberal arts college），一級州立大學有UC，即柏克萊、UCLA、聖地牙哥等等，二級州立大學有CSU，如San Jose State U，第四類就係社區學院，如Foothill。在呢個制度下，Tier I大學要搞研究，其他州立大學注重教書，研究可做可不做，社區學院就係為培養成年學生嘅職業技能與準備中學畢業進入大學而設，教授L話香港地方細，有兩三 間研究型大學就足夠啦，其他大學側重教學，可免資源重叠。問左丁山有何意見？
左丁山老早認為香港可以仿效加州制度，但中國 人嘅性格係寧為雞口，莫為牛後，又怕標籤，邊個校長願意話自己間大學係Tier II呀？香港嘅傳媒評論又喜歡拿來主義，講甚麼「大學貧富差距」，樣樣都要講平等（其實都係平均主義），特區政府邊度敢採用加州制度吖？譬如報紙報道某間 大學聘請世界知名教授月薪二十萬元，呢段消息唔知真定假，已經引起南華早報（十月二十二日）發表社論批評，指二十萬元月薪係一個大數目，要用得物有所值， 教授必須有突出研究及教學貢獻，言下之意，就係警告某大學唔好輕易付出二十萬元請教授。左丁山就唔同意嘞，一位大學教授嘅學生做個副局長，已有月薪二十 萬，做政治助理，又有十零萬，而大學講座教授，桃李滿門，何來月薪二十萬，咪與佢嘅政治助理學生差唔多！傳媒何必厚此薄彼，眼紅教授薪水高？其實一啲專業 學院（如醫、法、商、會計）即使出二十萬元月薪，亦未必請到人，中建大廈嘅名醫點有月薪可計？一個月可搵七位數字嘅醫生，肯去大學醫學院做教授直情係犧牲 自己，為人民服務而已。 |
||||||