2010-9-13 AD
|
||||||
|
騰訊（700） 主席馬化騰（圖）近期人氣爆升，繼獲邀喺深圳特區成立30周年慶典上面發表演講，上個星期五佢又獲中文大學邀請發表演說，結果連演講廳樓梯都坐滿人。馬化 騰話，佢從事嘅互聯網行業瞬息萬變，好似後起之秀Facebook同Twitter，開發到好產品，就火速走紅，市場變化之快，令人驚心動魄。 佢話，早兩、三年，全球十大互聯網公司全部由美國企業雄霸，但隨住Yahoo衰落，騰訊就上位，升到全球第三；5年前內地互聯網巨頭新浪、搜狐、網易，o衣家都已經俾騰訊、阿里巴巴（1688）同百度取代。 中國互聯網產業成績非凡，係中國少有嘅、能夠同國際巨頭同步競爭嘅產業，究其原因，佢就咁樣分析：首先，中國係非英語國家，啲英語國際巨企比較難去攻陷個市場；其次，中國人口眾多，存在文化差異；再者，有中央支持，內地有良好嘅基建通訊設施，有條件畀本地企業發展。 講番04年騰訊上市，當時馬生為咗揀喺香港定係美國納斯達克掛牌而煩惱。不過，佢最後都係選擇香港，因為香港回歸，萬一有咩事發生，點都安全啲，籌到幾多錢只係小事啫！ |
||||||