| ||||||
| 潮流興環保，大企業為顧及形象亦紛紛響應，造就不少商機。 八十後的鄭華榮，睇穿大企業近年不停搞環保騷，無非只為噱頭，本身對環保毫不熱衷的他，亦跳入這市場，毅然與三名大學同學創業，主打設計環保精品，開業僅一年便有盈利，月賺數萬元。 唔好意思，我公司環境擠逼，只得一個身位通道，幾百呎地方堆滿雜物，滿地空水樽亂放。 雖然呢度亂過難民營，卻是全港唯一以「環保」掛帥的精品公司，其餘六十多家同類公司，只得我夠膽聲明產品用環保物料製成，你上Google輸入「環保精品 公司」，全港只此一家，別無分號。不要以為我空喊口號，連滙豐、恆生銀行及煤氣等都肯幫襯我哋，證明已揮低不少同行。 踩大企業人客 問我賣乜咁好賺？其實並非任何IT高科技，相反low tech得很，主力生產日常買餸購物用的環保袋，雖然全港好多人做，但大都是山寨式經營，我哋搞到有網上訂購，又有facebook專頁做宣傳，簡直絕無 僅有。唔講你唔知，其實每個環保袋平均有一成利潤，絕對山大斬埋有柴。 我哋嘅股東，全部係大學同學，做咗一年便有成績，全靠食正環保熱潮。以往不少企業搞活動宣傳，完騷後例必大派紀念品，但卻遭人詬病唔環保，最佳例子是上星期動漫節，好多攤位都派紀念品，但其實大部分都垃圾得很，電車男未出會場，轉頭已掉落垃圾桶。 見到精品變成廢物，於是我想出為企業度身訂造環保精品，例如曾為煤氣公司生產一批用粟米芯製作的原子筆，又替水務署推出水能發電鬧鐘，既突出對方業務，仲令人覺得呢間公司好注重環保。 你可能話呢啲精品都係整色整水，咪照樣有又得，冇又唔死得，最後都被視為垃圾。我認！但個客話環保咪環保囉。不過，以前大企業送的是一個塑膠膠座，又或者 冇用代言公仔，但自從幫襯我之後，係一支環保筆，一條手巾，又或者係一個尼龍袋，起碼夠實用先。何況最終被遺棄，污染程度都大減。講到尾，企業唔送禮就天 下太平，但有冇可能先？ 自己唔環保 有客人質疑送環保袋仲有冇宣傳作用，但好多師奶都有幾十個環保袋，佢哋覺得環保袋易殘，久不久就要換。而且我為了令人不會輕易當垃圾，設計上落咗唔少功 夫，例如有款環保袋，摺起後外形係一粒士多啤梨，仲可以當匙釦，推出後即被人抄橋，Log On同Page One直情當潮物賣。 講真，就算鬧我製造垃圾，我亦不會反感，因為我並非環保之士，公司雖然有飲水機，但我冇私家杯，情願貪方便每日買支新嘅礦泉水飲。不過公司始終以環保掛 帥，表面功夫絕對做足，例如卡片以再造紙及環保大豆油墨印製。我成日講笑同人講，自己最環保之處，係每日搭港鐵由將軍澳屋企到荃灣返工，符合低碳生活。 其實好慶幸自己對環保無乜大感覺，反而拍檔Gary就相反，終日嚷著要搞環保貢獻社會，但每次都被我叫停，Gary食米不知米貴，有次佢忽發奇想，要生產一個用再造紙製成的紙製喇叭，我明知死梗，但照樣向廠問價，價錢足足貴兩倍！ 我唯有用數字說服他，始終環保產品是昂貴玩意，生產成本至少貴傳統五成，例如生產一支原子筆要三元，但用粟米芯生產，成本就漲到七元。客人始終以單價行 先，最後先考慮環保，太貴便立即say no。所以我公司雖然扣上環保帽子，但有時都要將貨就價，最多用七成環保物料生產，咁已經好夠環保。 鄭華榮檔案 22歲未婚 08年科大物理系畢業 08年創業自製環保袋 09年成立綠星火主打環保禮品 柴娃娃創業 諗番我哋創業之路，其實都幾柴娃娃。我喺科大讀物理，因為父母做燈飾生意，自幼已經覺得要創業，因此在學期間，經常和三五知己齊齊商量創業大計。 大學暑假期間，同學Gary無聊地用媽媽平時改衫用的衣車，縫紉了三十多個環保袋，再找我和兩位同學，跑到報攤向檔主寄賣，每個開價五元，我哋只抽兩元傭 金，諗住過嚇老闆癮，怎知一開口就俾檔主狂鬧，仲試過被人用掃把趕走。後來我哋學精咗，話自己係大學生，要搞環保生意試驗活動，檔主至肯聽嚇。不過我哋惰 性重，經常有人遲到，又或索性唔見人，結果行咗好多日，至見咗二百個檔口，成功說服十多個檔主准許我哋寄賣。 雖然整個暑假先賺幾百元，不過我哋已開心到彈起， 我哋決定認真大搞，為防大家拉扯唔做嘢，今次詳細列明四名股東分工，Gary負責對外搵客，我做產品設計，其餘則做跟單和財政控制，仔細到每日都要簽到寫 低返工時間，又要開會檢討彼此工作進度，如發現對方懶惰或方向錯誤，立即問責到底，仲列明如果連續遲到幾日，會被罰打掃辦公室。我覺得大部分八十後創業失 敗，最大原因係冇人監督。 但想不到正式去馬，先明白什麼叫一闊三大，當時又要搵辦公室、又要做商業登記，未見官已經先打三百。加上要四處搵客，但全部股東都冇經驗，搞到三個月零收入，其中一名拍檔心灰意冷，提出退股到外國留學。好彩公司冇乜資產，三個股東每人再掏多幾千元就攤分了。 當時我見公司危危乎冇糧出，唯有返科大打工，負責為學校搞市場活動，從中發現無論大小活動，都例必派發精品，我覺得與其肥水流入別人田，倒不如接單自己 做。於是說服幾名拍檔，轉攻為機構採購精品。因搞活動時認識幾名內地廠商，對方以為我哋與科大有關，答應幫我哋生產環保袋。 成本價吸引客 儘管自以為有橋，但實情多捱了一個月依然沒起色，我哋唯有出盡法寶為公司宣傳，例如派傳單或狂發垃圾電郵搏人注意。其實而家覺得好諷刺，環保公司用最唔環保方法宣傳。 沒有辦法下，唯有又再借用學生身份，專門向學校及大機構埋手，對方眼見我哋離開校園冇耐，都肯聽一聽搞什麼。而為吸引人客，我哋只敢用成本價為對方生產， 但條件是在產品印有公司招牌當宣傳，結果吸引到港島青年商會，資助我哋去維園參加禮品展，更介紹滙豐市場部負責人給我哋。為表誠意，雙方見面當日，我哋幾 名股東到齊，準備計劃書向對方宣揚環保理念，結果對方想我哋配合一次環保活動，生產一千多個環保袋。記得當時單價只係區區萬多元，但其實公司流動資金只得 數千元，根本冇力接這宗「大生意」。最終我膽粗粗決定搏一鋪，向銀行借了幾千元卡數來找工廠生產。 最終生意順利完成，更成為公司轉捩點，每次出外見客都將呢個成功例子掛口邊，其實好多大機構揀人合作都幾求其，只要有競爭對手肯試用，價錢又合適，就好像 打開一扇門，生意便陸續有來。加上我哋唔敢開天索價，形象夠好所以特別容易受落。好似其中一個銀行客，讚我反應快起貨準時，所以好鍾意幫襯。其實冇人知 道，快起貨原因是想盡快收錢，因為喺今年二月，我哋終於儲到三十多萬元，響內地買咗間山寨廠，請咗五個女工幫我哋車環保袋。 | ||||||