| ||||||
| 銀行大姐大Ｌ太 除咗為銀行努力賺錢外，亦為公益金努力籌款。二○○九至一○年度，公益金籌到二億七千五百萬元，破盡以往紀錄。左丁山恭喜佢之餘，問佢在一○/一一年度會 唔會籌到三億？Ｌ太話：「千祈唔好畀壓力我，香港人好有善心，肯捐款，各大公司亦有社會責任，年年大力支持。話雖如此，亦要睇住經濟狀況嘅，○八年○九年 度適逢金融海嘯，我哋在年底為○九/一○定預算案之時，真係好驚囉。好彩過咗關啫。o依家又有歐債危機，希望只係短期性喇，唔會影響公司捐款啩？」 問佢年年搞百萬行、便服日，厭唔厭呀，有冇新招數？Ｌ太話：「唔該你同我度吓嘞，無論乜嘢橋，籌到款就係好橋，當然要合乎我哋嘅原則啦。 去年有一個方法籌到好多錢，就係多謝港交所，逢上市公司要揀一個幸運號碼，就要捐錢畀公益金，上市越旺，我哋收得越多錢。另外一個好玩嘅方法就係自從米芝 蓮嚟咗香港，出現三星二星一星餐廳後，我哋有委員諗出一條好橋，就係請啲星級廚師各顯身手，炮製一味拿手名菜，匯集起來，可成為一圍名菜，我哋賣十萬元一 圍，賣得好快，次次爆棚，籌到唔少善款。只可惜一年唔可以搞太多，一來地方所限，二來各大星級廚師有時間限制。」左丁山冇資格食十萬蚊一圍嘅星級名廚菜， 諗吓可在會展擺一百圍，咪可以一晚籌到一千萬？Ｌ太話：「唔好咁大想頭，好多地方唔肯借廚房出嚟，名廚亦恐怕做得太濫，亦驚俾別人偷師，故此呢啲名菜籌款 亦只能在恒生博愛堂舉行，不能擺得太多圍！」講得有道理，問人攞人情，唔可以攞得太盡嘅，否則自討沒趣。Ｌ太平日在銀行已經好忙好忙，要搵時間做公益金義 工外，要搵時間陪吓兩位千金，要陪老公去馬場（特別係皇仁校友出馬之日），要打高爾夫球減壓，非時間管理高手點辦！講起籌款，今年政府再度撥出十億元畀大 學代為捐款配對（matching grants），六月一日起開始計數，各大學早已四出搵人捐款。中大最近出現風波，會唔會影響籌款進度呢？問一位中大人士，佢笑笑口話：「劉校長早已與各 院長做晒功夫，喺六月一日已經籌到足額，入晒支票，明年要睇沈校長咯。」 | ||||||