ZKIZ Archives


人辦摩連奴 左丁山

2010-5-26  AD





 

不時有人問左丁 山:「某某人好沙塵,你覺得點?」左丁山答:「某某人好沙塵咩,唔見得噃,佢對我好客氣啫。」原來一啲人會揀時間嚟沙塵招積嘅,但左丁山比較見得少,因為 自己有選擇朋友權利,有人在面前太過招積,咪叫佢滾蛋去升呢,識過另外一班高人囉,正是人上有人,天外有天,在英冠聯賽也文也武嘅球會,上到英超就會受到 教訓o架啦。

上星期日晚凌晨捱眼瞓睇歐聯決賽,國米以二比○踢走拜仁慕尼黑,成為意大利盃、意甲、歐聯嘅三冠王,創造意大利足球歷史,亦係 四十五年來第一次攞歐冠盃,唔怪得班主莫利提(Massimo Moratti)興奮莫名,佢父親(Angelo)管理國米時,最威就係一九六四、六五年代連續贏咗兩次歐冠盃之後,國米成績不斷下滑,俾AC米蘭騎住咗 好多年,直至最近五年先至連續五次贏意甲冠軍及上星期日重奪歐冠盃。莫利提話:「摩連奴要走,我好傷心,但我對佢非常感激。」

 

大 老闆對夥計非常感激,甚為少見。呢位摩連奴係目前世界上最招積沙塵嘅教練,經常出言不遜,俾意大利傳媒狂抦,又被批評佢嘅戰術負面,重守不重攻,不踢美麗 足球,但在佢領導之下,葡甲波圖竟然可以贏歐冠盃,帶車仔攞兩屆英超冠軍,現在又帶國米擁兩屆意甲兼歐冠盃,以一位出身不是球員,從做巴塞繙譯,向卜比笠 臣、雲高爾偷練學師嘅教練嚟講,不斷升呢,從小卒成為大牌,在世界球壇嘅表現實在空前,好可能絕後o忝。現在佢受盡國米、意大利傳媒(轉軚得快)讚譽之 時,又宣佈自己好想做皇馬教練,向高難度挑戰,呢種態度,實在令人折服。摩連奴不戀棧名位,亦不忠心如費格遜,只係隨意之所至,跟住自己制訂嘅道路向前 行,打工打成咁先至係真正名副其實嘅打工皇帝,全世界嘅領隊職位任佢揀,佢就話明要去尚未出聲話要佢嘅皇馬,換轉你係皇馬會長,你會點辦?究竟請唔請佢? 摩連奴未待簽約,已經話要離開國米,捧盃後哭了一大場,毫不掩飾扮嘢,以真性情示人,果然係天生我才必有用,千金散盡還復來之人辦。抵佢沙塵、招積,年青 人當以佢為榜樣!但係要記住,自己不努力如摩連奴,兩嘢就會被對手或老闆掃走。
 



PermaLink: https://articles.zkiz.com/?id=15794

Next Page

ZKIZ Archives @ 2019