ZKIZ Archives


貧富懸殊 左丁山

2010-1-25  AD






 

基 金L請食晚飯,竟然不選熟悉地方,而係到大坑勵德邨商場,左丁山從未去過,聞訊不禁愕然,為避免塞車,於是坐地鐵到天后站,走出嚟搭的士上大坑,咪表跳到 廿一元,剛好到達商場對開之斑馬綫,落車走上樓梯,望左望右,原來酒家就在右面,與即將開售之豪宅相隔一箭之遙。豪宅聽講會以呎價二萬元出售,比較之下, 勵德邨大概係全香港最有豪氣feel之公共屋邨,被豪宅包圍,住響呢度,唔知會唔會覺得豪豪地呢?

間屋邨酒家當然一啲都唔豪,八時過後,酒家內只得我哋七位在內吃飯,餸菜味道係唔錯嘅,有啲菜式媲美一級酒家,但鑊氣稍欠不足,尖嘴食家T以此查問經理,原來廚房設於地下,煮好之後拎到上一樓,好美味嘅秘製牛尾,已經唔熱,而係溫暖,可惜也。

此 平民食肆晚間得一兩枱客,如果我哋唔幫襯,此晚咪要晚上八時許就關門?賓架W話佢有位朋友升職,為咗賀一賀,要請朋友食飯,問金鐘兩間五星酒店內之高級食 肆,兩個位都訂唔到,令佢感到不景氣已完全消失。尖嘴T嘆曰:「非也,此乃貧富懸殊之表徵,貴價高級食府冇位剩,低廉平民酒家枱櫈空,非香港之深層矛盾為 何!」

 

於是大家傾吓,如何幫助曾特首化解深層矛盾,行將提早退休嘅基金L話:「好難嘅,經多年觀察,我認為聯繫匯率係加深 香港貧富懸殊之源,因港元匯率固定,唔准郁,在亞洲金融風暴之時,外圍大幅度貶值,港元跟隨美元成為昂貴貨幣,香港要恢復競爭力嘅話,必須倚賴實際成本之 下調,於是工資跌,失業升,資產價格下跌,出現七年不景、通縮之情況,中低下階層大傷元氣。到咗全面復蘇階段,美國出現泡沫,熱錢湧港,刺激本港資產價格 急速上升,有樓有股票嘅市民與富豪得益極大,但對大部份家無恒產,冇股票,冇樓在手,揸住存款唔敢投資(或唔識投資)之人,大大吃虧,於是在景氣之時,普 通人收入雖然稍為好一啲,但富者越富,收入分佈日益懸殊。聯繫匯率對香港之高堅尼系數嚟講,即使唔係兇手,亦係一個重要幫兇。」講理論,基金F啱晒,但聯 繫匯率係聖牛,唔准碰。以後香港越係興旺,越係低息,堅尼系數一定繼續上升!
 



PermaLink: https://articles.zkiz.com/?id=13979

Next Page

ZKIZ Archives @ 2019