📖 ZKIZ Archives

中海油 （883）鎩羽5年捲土重來，豪擲168億元去花旗國「買油」進軍頁岩氣。內地媒體對呢單嘢普遍評價唔錯，皆因為國爭光也，但投資者似乎就唔多鍾意，睇吓 中海油噚日股價就知，恒指跌唔夠1巴仙，佢竟然跌咗3個幾巴仙，好彩收市價仲頂到$16.18「一路一直發」，幾好意頭吖！

查實呢單嘢咩葫 蘆賣咩藥呢？華華噚日喺國資委個網站見到一則通知，話中國海洋石油總公司（即係883阿媽）總經理、黨組書記，即係傅成玉（圖），會喺呢個星期四下晝兩點 有個網上訪談，傅總屆時會講述中央企業經營業績背後嘅故事，總結推廣其經營管理嘅成功經驗等，但華華覺得883班小股東會想聽傳總解構呢單刁，多過上述是 但一項囉！

李華華

台灣米餅大王蔡 衍明（圖），上年為亞視單嘢同查懋聲撐到「行」，一句冇乜香港人聽得明嘅「炸能狗狗」（閩南話「吃人夠夠」，即係欺人太甚），令佢紅遍全港。不過呢排佢又 變番低調，始終亞視股權糾紛已經擺咗上法庭解決，蔡老闆似乎叠埋心水，唔再俾香港人呃，返台灣搞吓佢盤生意好過。

噚日蔡老闆隻中國旺旺 （151）公佈業績，表現唔算理想，始終o依家全世界都講緊通脹，原材料價係咁升，今年生意都係難做。不過，蔡老闆似乎非常睇好今年嘅表現，點解？蔡老闆 喺通告嘅「2011年展望」中就咁解釋，佢話由於「2011」嘅英文讀音（two-O-one-one），好似「20旺旺」，所以公司內部都決定將 「2011」年叫做「20旺旺」年！

就係因為咁，所以對「20旺旺」年特別充滿希望同信心。華華覺得，若蔡老闆退休唔做生意，可改行去測字睇風水，相信佢好有呢方面天份。

先進半導體 ASMC（3355）前日公佈業績兼換埋總裁，業績扭虧為盈雖然靚仔，但都唔夠總裁疑似被炒搶眼。噚日管理層即時出嚟解畫，新老總謝志峰話，通告用詞的確 會令人誤解，查實冇乜事發生，只係公司去到一個新階段，希望有個新領導再帶領公司衝刺。至於前總裁周衞平，o依家仍然喺管理團隊裏面。

講番謝志峰，入ASMC之前，喺中芯（981）負責IR高管，主要同內地傳媒打交道。佢話，o依家香港傳媒好專業，會喺數字基礎上寫嘢，反而內地傳媒就比較大膽，會憑空想像。係o架，聽你解完畫，都唔會陰謀論屈你逼走舊老總，華華同班行家當然夠專業！

變身股始祖、彤叔大掌櫃魯連成打骰嘅蒙古能源（276）到底幾時修成正果？有貨喺手嘅小股東又幾時先有真銀落袋呢？

運煤鋪路八八九九

蒙能投資者關係部阿頭Gordon潘東凱（圖）話，個礦o依家進入最後直路，運煤嘅路已經鋪得八八九九喇，全程300公里，仲差6公里就搞掂，之後，只要過埋蒙古政府嗰關，就可以正式投產咁話。

Gordon又補多句話，公司掘煤嘅工程，其實每日都做緊，只不過一日未收到批文，一日都未賣得咁解……即係，佢都唔知幾時係真正有收入嘅大日子囉！

點 解Gordon無喇喇會同華華解畫呢？查實早排市場盛傳蒙能喺外蒙古有幾個採礦經營權可能會俾當地政府收番，股價即時跌到一仆一碌，雖然蒙能之後澄清話冇 咁嘅事，但都元氣大傷，話時話，蒙能今年累積已經跌咗五十六個巴仙，解畫又解到半桶水咁，一股廿幾蚊嘅光輝歲月，只能成追憶，真係有生之年都未必可以再見 到！