聖誕假快到，中環客喺中環聽到好多人都磨拳擦掌，趁日圓低水成咁，打算去日本shopping。睇怕我中環客喺年末年始期間喺東京，見香港人多過見日本 人。
香港人依家去日本shopping，好多未必去百年換錢，一方面百年太多人排隊，另一方面， 銀聯 卡喺日本接受度好高嚇，表面嚟睇，只要香港人帶住 銀聯 提款卡傍身，應該實食無黐牙。
如果你用 銀聯 嚟㩒日圓出嚟，我中環客都未聽聞有太多甩轆個案，只不過，如果你想攞 銀聯 卡當信用卡咁碌，咁我中環客忠告你，你帶番張VISA或Mastercard穩陣啲。因為日本越嚟越多商戶，突然開始唔接受 銀聯 卡，主要係一啲小商戶。
日本多咗商戶唔接受 銀聯卡，一方面多咗唔少假卡黨同偷卡黨喺日本搵食，小商戶孭唔起相關損失，所以寧可唔收 銀聯 ，另一方面， 銀聯 喺日本結算果陣，實際係用人民幣嚟結算，依家人民幣匯率係咁跌，大佬唔怕食驚風散？相反，VISA同Mastercard，結算唔係黐住人民幣，對商戶風險細啲。
如果人民幣再咁跌，睇怕香港商戶唔受 銀聯 都唔奇。但問題嚟，香港咁多提款卡黐住 銀聯 ，會唔會最後搞到銀行要換曬啲卡做VISA Debit或Mastercard Debit，我中環客食緊花生。
中環客