| ||||||
啤梨張自從生意失敗要「裸辭」後，連返商交所打躉都少咗。數碼港已於六月中入稟法院，追討逾七百萬租金和利息兼收樓。啤梨張返工做「租霸」，收工後就返去淺水灣道豪宅繼續歎世界。佢自住及隔籬租俾阿媽住嘅兩間豪宅，月租加埋要三十四萬，月月都準時交租。 最近小宗聽聞呢座六層高嘅豪宅有盤放租，即刻call經紀去睇盤。原來，個放盤喺正啤梨張樓上。呢座樓齡超過半世紀嘅豪宅，每層分A、B室，各三千餘呎，望正淺水灣沙灘。不過，啤梨張自住嘅B室就有棵樹阻咗少少景。單位最正係個近百呎嘅大露台，聽講啤梨張最愛坐在露台，食住雪茄，望住個海「度橋」。夏日炎炎，小宗企喺露台，幻想自己係啤梨張，橋就諗唔到，只係望到遠處沙灘，有幾個三點式女郎喺度玩水，春光無限。話說啤梨張嗰兩個單位今年十月就租約期滿，業主湯君明話未傾續租，所以未諗到會唔會加租。去年底啤梨丁母憂後，A室得佢家姐住，但聽聞姊弟關係麻麻，水緊嘅佢相信顧得自己，亦顧唔到家姐了。 最靚CEO變「雙失」中女 有「鐘錶女王」之稱嘅胡敏珊，過去數月突然喺社交圈「消失」，最近更被踢爆盤生意好唔掂，欠租、人工達百幾萬。模特兒出身嘅胡敏珊，曾經同代理美國名錶Philip Stein嘅鐘錶商人毛志輝拍拖，飛上枝頭後轉行賣錶，事業、愛情皆得意。分手後，胡敏珊繼續富貴，創辦平價錶品牌Chouette，自己做生招牌。不過，拿過呢隻錶來賣嘅行家話：「呢隻錶嘅毛利雖然都有三成，同勞力士一樣，但後者一隻要十萬、八萬，佢一隻只係二千蚊，賺得嗰六百蚊，真係唔知要賣幾多隻先交到中環咁貴嘅租金。」生意失敗，愛情亦得個「桔」。今年初，四十一歲嘅胡敏珊被影到搭上細佢十年嘅動作演員杜宇航，男方為呢段愛情，不惜犧牲事業。不過，小宗老友透露，佢哋已分手，並齊齊潛水。 小宗都要慨嘆一句，花無百日紅，幾時都係留番條後路穩陣。 湯君明大戰扶乩道士 講開炒家湯君明，呢期佢最「關心」嘅唔係租客或市道，而係一班道士。上星期，佢急call小宗一齊去高院聽審。查實呢幾年，以佢為首嘅一班壇生（即道觀嘅信徒），一直同元朗金蘭觀嘅道士打緊官司，前後加埋起碼有八單官司仍在進行中。自認食飽飯無事做嘅湯君明，話十年前跟老友去呢個道觀度聽道、學氣功，仲捐過唔少錢。當時，金蘭觀爭緊道觀佔用嘅三萬呎地皮，向新世界提出逆權侵佔，搵咗湯君明去同新世界嘅堅叔（梁志堅）講數。最後，不但被堅叔省到立立令，官司仲輸埋。呢件事亦點醒佢，覺得道觀嘅管理好有問題，終於搞到反晒面。湯君明入稟告幾個話事嘅壇主，乜都信扶乩，仲話「天職神委」，唔跟公司法選主席等，對方就反告其誹謗。告來告去，搞足兩年，但大把錢嘅湯君明誓要將呢班壇主拉落馬咁話。 Give me a break：最貴VS最平公司治 早排灣仔東來居一碟餐蛋飯賣一百廿八蚊，天價平民餐，引起滿城風雨。小宗有個識飲識食嘅朋友即刻打來報料，話尖沙咀Hullett House Hotel嘅西餐廳The Parlour出咗份全城最貴嘅公司三文治，單賣價四百八十元，連埋加一，要五百廿八大元。咁離譜，小宗當然要去試吓。酒店喺前水警總部，環境古色古香，確實心曠神怡。主角上枱，單計分量就略為失望，點解咁貴？餐廳公關強調，啲餡用咗頂級食材。最貴係中間嗰件，用咗一百克要千三蚊嘅Balik三文魚，以及伊朗Beluga魚子醬；右邊嗰件上面有塊日本近江A5和牛，要成二千蚊一公斤，就連伴碟用嘅水耕菜，都係飛機貨。小宗第一時間試食，但啲料太厚，一邊食一邊跌，好論盡，仲有啲乾口，可能小宗吃慣平民嘢，竟然覺得壹傳媒五樓canteen嘅公司治仲好食。有相你睇，都幾靚仔o架。最重要係，呢份「名副其實」嘅「公司」三文治，只係賣十三大元。心理影響味覺，小宗都唔敢再投訴壹仔五樓飯堂。 金牙大狀講嘢 錯失良機689政府以申請遞解斯諾登之文件唔齊為辭，俾洩露美國國家機密之中情局前外判王飛咗去莫斯科，此乃聰明笨伯之做法也。試想想，若然689由得遞解令進入司法程序，咁非但可以彰顯特區司法獨立，連第一霸權大國都唔慄。即使三、四年後經過所有司法程序，斯諾登卒之都係要解返花旗，咁呢個都係法官大老爺嘅決定，同689無涉。再者，由得遞解令進入司法程序，非但可以彰顯司法獨立，更加證明689政府尊重司法獨立、不作干預。咁又豈非行政、司法雙贏之局？689政府捨上上之策而不由，以文件不齊為借口放走斯諾登，此則不由不令人懷疑係唔係屈服於阿爺嘅淫威，有正路唔行而行歪路？《大公報》慌死大家唔知發生乜嘢事，讚揚689話佢處理呢單嘢之手法，證明佢對《基本法》有高度透徹之了解云云！ | ||||||