好不主席：多謝「國盲教育」！
1 :
GS(14)@2012-07-30 14:09:04http://hk.apple.nextmedia.com/financeestate/art/20120730/16557904
真的要多謝「國民教育」，因為冇佢，我都唔知有幾位好幾年冇見嘅朋友已經生兒育女，貴為人父母，而且仲成為咗「國民教育家長關注組」嘅旗手。
看到他們甘願挺身而出，面向傳媒力陳身為家長嘅憂心所在；向一意強行的教育局反映意見；還要不計付出的集結家長力量表達訴求，都叫人好生敬意。
他們有的是大律師，也有新聞工作者，都是思路清晰、判斷力強和明辨是非的年輕專業人士，豈如有些人（故意）猜疑家長只是受到唆使，甚至不過就是給政黨騎劫的一群。且看他們示範何為「身教」，亦讓我們慶幸除了一眾「怪獸」父母，小島還有不少見義勇為的「超人」雙親。
政府冇學精又再硬上弓
再謝都係「國民教育」，所以我先會特登返咗去已經畢咗業成卅幾年嘅嗰間小學探個校長，因為有晚喺電視訪問度竟然見番佢，同埋聽住佢不慍不火話來年都唔會在校開設國民教育科！家陣學校有超過八成學生係少數族裔，同我讀書嗰陣剛好倒轉。而教育局長吳克儉就講到明，唔理甚麼族裔，只要在香港讀書，都要讀埋呢科，認同自己係中國人。所以你得想像有個南亞稚子在唱：「請煎！請煎！請煎煎！！」事實上有段新聞報道都真係影住兩個棕膚色的小學生在唱（強國）國歌，仲要對住鏡頭嗌：「我愛中國！」不過之後亦再補充話，其實佢哋都好愛自己嘅祖國。
當然可以話呢啲只係個別事例，但亦說明整個國民教育的推行方針以至執行過程，仍有很多值得商榷之處。但校長最擔心的，反而是教育局如何對每間學校進行這新增科目的 Assessment（評核）。
即係話點樣量度「到底個小朋友有幾孝順父母、有幾咁愛港（共）愛國（黨）、看升旗有幾咁「雞凍（普通話）」，又或幾咁可以從毛澤東嘅書法裏面領略到堅毅嘅精神……」我呢位盡心竭力為教育貢獻咗成40年嘅校長都話唔知點做！咁政府係咪應該謀定而後動呢？雖則回歸15年，教育改革顛三倒四，朝令夕改，早已令老師疲於奔命，學校無所適從。現剛喘定，又話「國民教育」唔做唔得，到底係邊個唔等得呢？
三謝還是「國民教育」，經此一役，我們睜眼認清政府從23條鎩羽至今從未學乖。遇有爭論性政治議題（誰敢說國民教育不是），非但沒有積極凝聚社會共識，撫平市民的疑慮，反而霸王硬上逆民意而強行，不然就是弄虛作假，意圖蒙混過關。如果今日國民教育可以先推行後檢討，咁點解23條又唔得呢？
最後不得不謝仍是「國民教育」，如果唔係都唔使搞到一個月唔夠，我又有機會同其他成千上萬的父母一齊集體逛街，仲可以同啲老朋友打個招呼。
盧先亞