財經評論：信用卡多反累評級
1 :
GS(14)@2016-09-13 08:01:04唔少人鍾情用信用卡儲飛行里數，玩到「達人」級數隨時有30張信用卡喺手。雖然信用卡玩法萬千，但前提是要講求自律避免卡數纏身，而且大量開卡亦非絕無後果，入場前最好認識甚麼是「TU grade」。所謂TU即是「環聯資料庫」，會儲存消費者信用卡、貸款等信貸紀錄，然後每人都會得到一個評級。銀行在審批貸款或批出信用卡前，都會先到環聯查閱申請人的信貸紀錄。適逢iPhone7出爐，有高手淨係炒唔夠盡，諗到開信用卡碌iPhone7，同時賺埋飛行里數，就算最後要「平手走」，淨計碌卡都可以儲夠里數換一張往返日本東京的機票。不過，若本身資金不夠，iPhone最後又放唔出搞到逾期還款，就好大機會劃花TU紀錄。事關TU紀錄會列出申請人現在及過往曾經申請或持有借貸的項目，逾期還款紀錄仲會保留5年。TU信貸評分由A至J共10級（A級最高），正常大部份人都有C級，但如果評分拖低到最後幾級，銀行好可能會拒絕出卡申請，甚至影響日後批出按揭貸款。有些敏感職位員工，比如銀行、保險、護衞公司等，由於誠信最重要，所以應徵時不少公司會要求提供信貸報告，TU grade差的話可能影響埋搵工。準時還款只係入場券，要拎高分仲要睇總拖欠結餘、信貸紀錄長短、賬戶種類等。環聯就列明，還款紀錄是最影響信貸評分的因素，但擁有的賬戶數目亦會影響評分，換言之，若同一時間有成30張信用卡，亦有機會拖低信貸評分，懷疑你是否很等錢用。至於點樣挽救TU grade？基本上，大概6個月的信貸活動紀錄就足以計算評分。按時還款、維持低結餘及不過度借貸，都有助評分上升。記者：陳洛嘉
來源:
http://hk.apple.nextmedia.com/financeestate/art/20160913/19768697