蘇民峰身家7年暴升100倍 兔港樓市高企 屬火股值博
1 :
GS(14)@2011-02-04 17:22:462010-1-29 iM
虎年股樓咆哮，升勢威猛，但送虎迎兔，經濟會否繼續「兔」氣揚眉？
由2003年以手上300萬元起家投資買樓買股的風水師蘇民峰，轉眼7年間，身家暴升100倍至近3億元。蘇師傅接受本刊獨家訪問時預測，兔年樓市將會繼續高企，直至2013年才會有機會大跌三成至四成，屆時會是入市的好時機，而本港地運西移，上車一族入市以西環為首選，而九龍旺地則由西九開始，下一站︰ 荃灣。
蘇師傅屈指一算指，港股今年看俏，恒指高位有望升至29000點。在各類股份中，他點出，最旺是屬木的零售服裝股，但由於虎年也是旺木，例如I.T（00999）及JOYCE（00647）等已升至高位，所以排第二位的屬火股，包括電子、科技及資源股等，值博率較高。
新年想行財運？看看蘇師傅今年選中哪一隻愛股。
買舖投資一年升一倍
陽光和煦，從中環登上行人電梯，由金融中心的地平綫向上走，直達酒吧林立的蘇豪區，於梯旁些利街一家Stylish西餐廳Shelley's Yard，坐滿了歎咖啡的外籍人士，而這餐廳舖位的業主，就是蘇民峰。
3年前他以2,680萬元買入這個地舖連1樓單位，目前已升價3倍至近8,000萬元，換言之幾乎平均一年升一倍。
記者還記得3年前跟蘇師傅到這家舖位拍照，當時還是一間吉舖，貼滿地產經紀的招租廣告，舖位隨即成功租出。獨具慧眼的蘇師傅，當時看準梯旁這個丟空了十多年的舊唐樓，把單位拆牆變身，細門變落地玻璃，搖身一變成為型格餐廳格局，難怪每月穩袋13萬元租金之餘，舖價更直綫上升。
政府出招反而谷旺舖位
相約蘇師傅在這家餐廳訪問，大談兔年投資運程。剛剛完成超豪南極之旅的他春風得意地說，「近期舖位升得好誇張，政府出招後反而谷旺了舖位，我坐飛機返香港，睇報紙見到幾個中環舖位成交，閒閒哋都升了150%至200%，我果幾個舖位，咪又求其升至一至兩倍囉！」
於2003年沙氏以300萬元發迹，轉眼7年間，蘇民峰投資股樓，身家已暴漲100倍，資產升至近3億元。
他坐在餐吧的高桌上，享受着做業主收租的滿足感，認為舖位仍有很大的升值潛力，「這個些利街14號舖位，2007年2,680萬元買入，舊年有經紀送票嚟，俾到5,000萬元我都唔賣，現在應該又唔係這個價啦！我心入面知價嘅，只係唔想賣啫，7,000幾萬元至8,000萬元啦！隔籬間舖2,000呎，啱啱租了26萬元，我呢到1,800呎（包括約500多呎室外面積），新租約係13萬元（即回報率約5.8厘），一比就知，我呢度有潛力啦！」
結志街地舖回報21厘
該些利街舖位，每年以倍數升值，投資回報令人咋舌，不過，要數蘇師傅最得意之作，還是2004年買入中環結志街10號全幢5層唐樓。這幢唐樓的地舖現時仍租了給一間老字號粉麵批發，是一貫舊式街市店舖，舖面賣幾蚊一個麵，但租金收入卻十分可觀，月租約7萬元，還未計算出租閣樓約1.8萬元，合共每月可收 8.8萬元租金。
若單看結志街地舖8.8萬元租金，銀碼實在比些利街店舖少得多，但租金回報率竟然高達21.5厘，相對於銀行幾乎是零利息，簡直是天方夜譚。話說蘇師傅於 2004年的7月，以1,350萬元買入這幢唐樓，翌年再以860萬元把1樓至5樓分拆售予一名外籍人士（後來該名外籍人士把該物業改為服務式住宅），並繼續持有地舖及閣樓，換言之，地舖加閣樓的成本只需490萬元，現時升值至約5,500萬元，即6年間升值逾11倍，若以每月收租8.8萬元計算，回報率高達21.5厘。
「結志街個舖好有前景，但一定要等，等五年十年，等重建搞掂，未來將會經樓梯街上嘉咸街，結志街變成必經之路，所以買舖係睇長遠，最緊要就係收租。」
蘇師傅在堅道還擁有兩個舖位，分別也在兩三年間升了逾倍。「堅道茶餐廳跟寵物店升了一倍都唔止。」
即使舖位價值節節上升，蘇師傅卻無意割愛賣舖套現，「真係唔捨得賣！中環舖位賣一間就少一間，賣咗買唔番。不過，賣咗嘅好處係，可以揸住現金一世環遊世界。最緊要係唔等錢使嘛，賺一舊錢係無用㗎！」
愛舖之深，就連之前出現一個佐敦茂林街逾億元商業大廈筍盤，蘇師傅也忍手，不捨得賣舖換商廈，「早幾個月睇中了這幢商廈，要1.1億元，就係唔捨得賣舖。呢幢商業大廈幾好㗎！2萬幾呎，兩架Lift，仲有3層可以做商舖，買嚟做埋自己寫字樓都抵。」
揭買舖租屋住之謎
有人喜歡儲錢入戶口，但在幾年間身家暴漲的蘇民峰，則選擇了儲樓，大部分物業都是長揸，愈買愈多，「我唔係睇短綫，而係長綫收租，如果係長綫投資基本上係一定賺。有啲人係炒樓，只得一兩厘回報都去買，有啲人好有實力，買完唔使租出去，等層樓升值，但我兩樣都唔係！我一定要睇收租回報，租金夠俾按揭就無問題。」
以他上年10月買入的山頂豪宅為例，樓價2,500萬元，每月供款約6.8萬元，而市值租金達6.8萬元，租金可以足夠繳付按揭供款，換言之，支付首期後，每月毋須額外補貼供款。
蘇民峰的整體商舖租金，不僅為他帶來收入，更加足以支付他的住屋租金，讓他不用捱貴樓，而選擇租住一個2,800多平方呎豪宅，「樓價升，舖價亦升，我就攞店舖的租金去租樓住，乜嘢樓都租到啦，所以我買舖唔買樓。現時住宅租金仍然好平，無論點升都平，以中環樓為例，愛都大廈千呎單位租金約10萬元，如果要買靚景單位要7,000萬元，做乜攞7,000萬元買一層租10萬元嘅樓？用來買股票，一年4厘息，都有480萬元利息，但全年租金只得120萬元。」
做包租公乃退休之道
為了部署日後退休仍可以享有現時的生活水平，他不停買舖收租，「投資要有部署，買物業，不是賺少少就賣，而係要買、買、買，先有用，要買到幾多間？哪要計你要求的生活水準，買到租金收入夠生活開支便可以停手。死儲錢就無用，唔儲又係錯，收租夠你生活，生活水平便不會跌。」
愛玩愛享受的他，深明做包租公是退休之道，「如果唔賣樓攞舊錢，而係每個月收租，攞租金去玩，不知幾好﹗玩完返嚟，本金仲喺到，這就是退休之道。」
地運西移 下一站：荃灣
訪問期間，蘇師傅的iPhone響起，是助手致電查詢其山頂住宅單位放盤資料，他說，「睇租定睇賣？依家賣3,200萬元，租就6.8萬元。」
他去年預測虎年樓市進入「鞏固期」，樓市會出現整固跌至2005年至2006年水平，雖然預言不是百分百準確，但政府也數度出招，也令樓市出現調整。不過，原來在低息環境下，連蘇師傅也按奈不住，於去年10月財爺推出印花稅狠招前，以筍價掃入山頂僑福道環翠園一個實用面積逾1,400平方呎的豪宅單位。
地運西移宜選西環唐樓
不消3個月，他決定以3,200萬元放售，目標賺700萬元，或以6.8萬元放租。「利息實在太便宜，買山頂呢個單位，每月按揭供款係6.8萬元，但租到 6.8萬元，即是租出去就唔使供，計來計去都有賺，利息低到每個月只係俾萬幾蚊息，即係收租每月有5萬元本金收入。」
樓市之旺，他出動買樓也經常被炒家截糊，「本來想買淺水灣南灣坊，2,500呎加300呎獨立儲物室，4個車位，2,680萬，人地俾2,750萬元搶咗，個業主Hold住，唔話我哋知，又唔簽，結果俾人買咗。」
預測兔年樓市，蘇師傅指，「今年會慢下來，入市時要小心計算，以免招致損失，自住無妨，投資炒賣者恐不易獲利。」
他又指，兔年將繼續地運西移，「行西南水運，買樓旺西區，由中環德己立街，至淺水灣，都係西，先去西北，再去西南，到赤柱都係西南。上車一族最好就係買西環唐樓，一來賺住，二來博收購。九龍而家行運行到荔枝角，你睇美孚凸海單位，1,800呎賣到1600萬元，下一個區就旺到荃灣。」
縱然近期元朗洪水橋泉薈新盤以高價出售，但他直指元朗不是行地運，「元朗唔係行地運，係炒到無嘢好炒，荃灣都未到，萬景峰開賣6,000蚊呎，到依家都係 6,000幾蚊。浪翠園升番啲，3,000幾蚊呎，成日叫人買果到，之前2,000元一呎，簡直係無可能，不過上一兩個月，海景單位升到4,000元一呎，嘉湖都升，上水都炒到3,000幾蚊呎。」
2013年樓市爆破入市良機
屈指一算，蘇師傅預言，兔年樓市平穩的機會較大，上升的空間不多，並建議有意置業人士，若非急買，可以等到2013年樓市將會爆破，屆時樓市可能跌三成至四成，將是入市的好時機，「唔急嘅，可以等2013年至2015年先買樓。經濟係12年一個循環，樓係6年升6年跌，香港受美國低息影響，美國樓2006 年開始跌，到2012年到谷底，然後慢慢上升，到時就會開始加息，跟住香港樓價就會開始跌。」
「樓市爆破的主要係因為加息，為甚麼現在的人買樓？就係因為銀行零利息。我啲錢全部放在支票戶口。有幾多錢利息啫？10蚊？我有一個綜合戶口，入面有百幾萬，只有4蚊利息，1,000萬元有幾多？咪得40蚊囉！」
他認為，除非遇到筍盤，否則以現時的樓價不值得追入市，「我唔係短綫賺少少錢嘅人。」
御用地產經紀︰「快、狠、準」
2004年蘇民峰殺入中環買舖，在一個夜闌人靜的中環結志街街市，他邂逅了他的「御用地產經紀」————川喬集團主席吳建川（Brian）。
「佢靠我起家，我又靠佢起家。」提起買舖買物業的彪炳戰績，蘇民峰透露，其實他所有的物業買賣，全部是透過當時在蘇豪區做物業中介的Brian。
當時蘇師傅在晚上10時看過結志街10號的物業，不出10小時，翌日早上便決定買下這全幢物業，出手「快、狠、準」，Brian憶述，蘇師傅做足準備，看準舖位就極速掃貨。
及後蘇師傅在中環的4個舖位，甚至幾年前賣出的4,000平方呎汀九大宅，以及剛購入的山頂環翠園豪宅單位，全部都是由Brian經手。
21歲開店做物業代理
Brian的起家亦是一個傳奇。話說，1994年僅得21歲的他，大學畢業後在中環區當了3個月地產經紀，並以租務為主，共賺得約7萬元。就憑着這幾萬元的第一桶金創業，他吼準了當時仍未十分興旺的蘇豪區，租下一個月租1.2萬元的100平方呎地舖，開始了屬於自己的地產物業公司，專針對蘇豪及半山市場，發展至今已擴充至3家分行，還轉攻工商舖。
近期擴展南區豪宅業務，Brian指，該區有三分一豪宅買家是內地人，「曾有一名內地富豪，是北京第一批買地的業主，興建物業後已升值逾幾百倍，最近來港要一擲10億元買豪宅。我們用私家車帶他到山頂睇樓，在不足一小時的過程，送他回酒店時，他竟然封了一封4,000元的大利市給司機，豪氣十足。」
屬火值博率高 攻電子資源股
虎年準確命中屬木服裝股大旺的蘇民峰，雖然算過明知服裝股行運，但捉到鹿也未必識脫角，買不中倍升的I.T（00999）、包浩斯（00483）及保獅龍（00592）等，反而以500萬元重錘買入升幅較細的安踏（02020）、特步（01368）及中國動向（03818），「全部無買嘅升一倍都唔止，係我咁衰買唔到，我計過係屬木，但唔知邊隻。」
「本來賺了200萬元，點知無賣到，跌番落黎，特步升到7個幾，賣了好多，但6個幾又買番；中國動向，4個幾買5個幾沽。」結果換來一手蟹貨，惟有望長綫升值，「舊年股票賺100萬都唔夠，手上好多安踏同中國動向，好多都無賣，我仲揸住唔少滙豐（00005），你話死唔死呀？已賣了一半啦。仲有中移動（00941），已賣了三分二。簡直係零升幅。」
兔年基數低較容易賺錢
「我係賺大錢嘅性格，好多人以為炒股可以賺，但賺少少。我就買了唔炒，長遠係有實力嘅。」最近他又心癢癢買入服裝零售股JOYCE（00647），「見住 I.T升，點知唔捨得買，由1.5元彈到2.5元，點知現在升到7蚊，買唔到I.T我就買2.8毫買JOYCE，升到1.1元放唔到，現在都有8.8 毫。」
蘇師傅預期，兔年投資賺錢較去年容易，「舊年起步時恒指23000點，最高估26000點，點知上到24900點就唔郁，但今年22000幾起步，基數較低，較容易賺錢，相信兔年有機會升到26000點至29000點。」
至於兔年的股市走勢，由於2011年是單數年（單數年年頭升，年尾跌；雙數年相反），他預期大市會先升後回，建議1月或2月趁低吸納，並留意西曆的8月8 日、10月8日、11月8日，有機會由高位跌市，而屬火的電子及資源股值博率最高，「兔年最勁係木，但虎年又係木，香港零售股升了一倍，由於基數高，例如 JOYCE已經由2毫升到1蚊，唔通一蚊會升到10蚊咩？」
兔年除了屬木的股票最旺，其次就要數屬火的電子及資源股，「股票今年我買火，包括石油、機電、塑膠及能源。我已經買了德昌電機（00179）。」他看好的，還有創科（00669）、偉易達（00303）及中國海洋石油（00883）。
他又預言，兔年黃金一定會跌，「虎年金是排第二，兔年排第三，所以今年金價會跌。」
睇相看股票 滙豐無錢途
買股票除了研究市盈率、派息等，蘇師傅亦把玄學睇相應用在股票投資。「一早就話滙豐無前途，叫學生沽晒佢，睇啲人就知無前途，現在新老闆就唔知，以前個紀勤個樣唔似大將之才。」
看來大笨象滙豐股票並非蘇師傅杯茶，連帶所有銀行股也不看好，「滙豐俾你上番100蚊都無用，升得果10%。」
蘇師傅買股條件︰
1 零負債，持有大量現金
2 市盈率15倍以下
3 盈利按年增長
4 派息3厘以上
2016年香港行大運
蘇民峰計過，自己的退休運由45歲行到55歲，即是還要行多5年退休運，一於少一點工作，多一點玩樂。那麼，香港又行運行到幾時呢？
「由2004年起，香港會行20年地運，但行運最多去到2024年，即係仲有13年行運！」蘇師傅跟香港算命，計出2024年運氣將會停下來，「意思不是踏入2024香港就開始行衰運，而係每一個城市總有衰落的時期，增長會放慢，發展好似停滯了一樣，就好似美國同日本咁。」
2024年中港發展停滯
由於香港與中國行同一地運，所以中國也會面臨2024年發展停滯的階段，「中國與香港地運一齊，2024行完運，就當是每年10%增長，十年就兩三倍，再20年可能十幾廿倍。無何能永遠高速增長的。」
他以紐約與美國的關係，去形容香港跟中國，「美國衰紐約衰，因為紐約的錢都係從美國來，而香港的錢就係從大陸來。」
不少港人也擔心未來上海將會超前香港，可是蘇師傅認為，上海今日追不到香港，將來也追不到，「上海唔夠香港質素好，好多人以為下一輩會追到，點知都係出同一樣問題，成班八十後都係無得救！」
他又直斥本港及內地的「八十後」是發夢，「有啲大陸客俾錢仔女到香港生活，仲問我炒股票可唔可以生存呀？可唔可以開公司炒股票呀？班『八十後』簡直係發緊夢﹗」
靜待大升浪2013年買樓
然而，香港跟中國面臨衰退的前夕，將會衝上另一個史上未有的繁榮經濟，「下一個經濟高峰係2016年至2020年，所以最好的投資部署，就是等2013年至2015年，樓市及經濟爆破後，執平貨，以靜待2016年至2020年的經濟大升浪，可以2013年開始買樓﹗」
他又形容，這一個世紀大升浪將會是前所未有的，同時中國、巴西、印度會冒起，而美國則會衰退到2012年，然後慢慢回復元氣，歐洲要等到2014年才有起色。
旅遊投資學︰既可自住 又可出租
登上蘇民峰的微博，看見他的29日超豪南極之旅，或許你會問「點解上天咁唔公平？」，「點樣生活可以咁爽？」
記者訪問蘇師傅當日，他剛剛完成南極之旅返港，精神煥發，「好過癮，原來企鵝有好多唔同品種，去一轉南極都使左成80萬元。」
過着半退休生活的他，去完近一個月南極，不出3星期，又會坐飛機去瑞士滑雪，寫意生活比不少超級富豪還要開心。
談到滑雪，原來去年3月，蘇師傅到日本北海道二世古滑雪時，順道買入了當地一家最豪的滑雪酒店逾千呎酒店單位，「我一年去3次滑雪，買間酒店房，就當係投資，既可以自己住，又可以出租。」
他一擲9,000萬日圓（約846萬港元）買入的，就是位於二世古市中心的Vale酒店，酒店連接滑雪場，「酒店房係千幾呎，三房兩廁，推開房門就可以滑雪。」
由去年3月起到現在，由於夏天及當地12月落雪不多，所以一直未有租金收入，但他對前景信心十足，「這個酒店是全個北海道的首選，但房費卻同其他舊式酒店差不多，所以甚有加租的潛力。好多海外客去年4月至5月已經訂房，大部分都不會取消行程。」
兔年十二生肖增加財運方法
鼠、豬︰南面放紅色物件
虎︰西南面放石頭
兔︰東北面放石頭
牛、龍、羊、狗︰北面放水
蛇、馬︰西面放音樂盒
猴、雞︰東面放植物
*註︰可用於辦公室座位或自己房間內
#資料來源︰蘇民峰2011兔年運程
兔年十二生肖財運運程
兔︰今年為權力地位提升年，財運增長一般，上班族可爭取升職機會，地位提升了，財運自然有所得益。
龍︰要思想學習投資，花錢機會較進財機會多，不論投資學習也好，買實物也好，花費都比往年多，所以在財政方面要好好處理。
蛇︰財運不錯，加上是驛馬年，易有遠方貴人之助因而獲得財富，尤其是常與外國客戶營商的，機會更佳。
馬︰整體財運不錯，加上桃花年之助，能得到一定的好處，尤其是收入不穩的，財運更加明顯。
羊︰不論學習、投資或買實物或多或少都要花上一筆錢，所以今年開支較平常多，財政穩定的人尚好，但若不善理財，今年切記要量入為出。
猴︰今年是辛苦個人力量得財年，整體對收入不穩定的自僱或從商一族較為有利。打工一族可能只是多了工作，收入不一定提高。
雞︰是各生肖中工作量較大的一個，這只對自僱或從商人士有幫助，因工作量大了，收入會成正比例增加。打工仔可能只得個忙字，卻不見財。
狗︰不論投資也好，學習也好，總要花一筆錢，開支可能會較收入為多，故今年要做好財政處理，以免出現財政緊絀。
豬︰今年為貴人舒服得財年，積極性不是很高，難免影響收入。雖然沒有貴人星，但因太歲相合，必能受惠於貴人、長輩或上司，整體財運其實不差。
鼠︰本年是舒服懶年，但財運不會因此而下降，皆因今年是紅鸞桃花年，必能得桃花之助而對事業與財運帶來正面影響。
牛︰今年開支會較往年多，因些在理財上要謹慎一點，以免令穩健的財政出現問題。
虎︰今年為咸池桃花年，人緣比去年犯太歲好得多，連帶財運都容易隨之而上升，雖然今年不是財運年，但因桃花之助，財運會比去年佳。
﹏﹏﹏﹏﹏﹏﹏﹏﹏﹏﹏﹏﹏﹏﹏﹏﹏﹏
蘇民峰 Profile
年齡︰50歲
背景︰八十年代曾做髮型師，1983年開始睇風水，最初在廟街擺檔，及後人氣急升，成為著名風水師，出版過多本運程書
投資組合︰80%商舖及物業，15%股票，5%現金
舖位︰中環擁有4間舖位，包括結志街10號、些利街14號、堅道45號及124號，並於尖沙咀利時商場擁有6個舖位等
住宅︰山頂僑福道環翠園一個低層單位
海外投資︰日本北海道二世古Vale酒店逾1,000呎單位
兔年投資策略︰
樓市︰行西南水運，港島西旺中環德己立街、西環到南區淺水灣及赤柱；九龍西旺荔枝角到荃灣。預言樓市橫行，宜2013年至2015年樓市爆破後入市。
股市︰旺木火，因為虎年旺木，大部分屬木的服裝股等已升至高位，所以兔年屬火股值博率高，石油、發電、電腦等屬火行業被看高一綫，包括德昌電機，創科、偉易達及中國海洋石油。其餘金與土則平平，而屬水的金融、銀行、旅遊及航運則未見有起色。
虎年預測命中與失靈︰
預測命中︰虎年旺木，I.T及JOYCE等服裝股票倍升。
預測失靈︰指虎年樓市踏入「鞏固期」樓價跌三成至四成，但樓市在政府連番出招下稍為調整然後再向上升。
預測虎年投資重點日子︰
股市︰先升後回，預期恒指升至26000點至29000點，入春前後部署，等夏秋季進入收成期。
2 :
fast(1194)@2011-02-05 00:07:57*註︰可用於辦公室座位或自己房間內
係以公司座位或房間中心看,還是以全公司或全屋中心點..
3 :
CHAUCHAU(1254)@2011-02-05 19:00:16係以公司座位或房間中心看
4 :
wood(6277)@2011-02-05 19:14:072樓提及
*註︰可用於辦公室座位或自己房間內
係以公司座位或房間中心看,還是以全公司或全屋中心點..
1)全屋中心點個方位睇....呢個係大太極..
2)跟住再睇埋以自己房為中心點黎睇方位....呢個係小太極.....
以上2樣都應該要睇....
5 :
fast(1194)@2011-02-07 02:09:54再請問兩位師兄
X周刊本書仔,麥XX話正東為五黃'災星'
但
經X日報,雲XX用奇門遁甲話東方為震3宫,正財位,
咁應該點擺呢?
6 :
wood(6277)@2011-02-07 21:24:5600姐用飛星...卯年係飛星"7"入中宮..方位如下:
(南>>"2"個粒星方位係南)
(東南)6 2 4(西南)
( 東)5 7 9(西)
(東北)1 3 8(西北)
(北>>"3"個粒星方位係北)
飛星宮位係年年唔同係根據唔同星入中宮...
==========================================================================
奇門個飛星係永遠不變
(南=離宮>>"9"個粒星方位係南)
(東南=巽宮)4 9 2(西南=坤宮)
( 東=震宮) 3 5 7(西=兌宮)
(東北=艮宮)8 1 6(西北=乾宮)
(北=坎宮>>"1"個粒星方位係北)
今年免年係辛卯年..."卯"呢個地支係落入"震宮"..我諗佢以年既地支個主, 落入個宮為財位...所以"震宮3"係財位....
7 :
wood(6277)@2011-02-07 21:43:04風水黎講..多數用飛星....
奇門多數用於問事占卜, 除左年既地支..重要睇埋月,日同時既地支配合...
所以以屋企風水黎講, 應該"飛星"為首!
奇門係要夾埋時間黎睇...唔係單一用年既天干地支睇財位...
8 :
鱷不群(1248)@2011-02-07 23:05:02我不相信玄學對投資有幫助，但我認同蘇民峰的投資方針有可取之處。他買入物業，留意租金回報率，不是坐著等升值，反映他重視資產製造財富的能力，能以經營者的角度看待投資。選股方面，他的財務知識未必有過人之處，但可以看到他重視公司賺錢能力。總的來說，他的務實態度是值得學習
9 :
fast(1194)@2011-02-08 01:41:58thx
如果跟奇門擺,分分鐘撞飛星,
除左飛星,仲有元運,
都係唔好亂攪.
7樓提及
風水黎講..多數用飛星....
奇門多數用於問事占卜, 除左年既地支..重要睇埋月,日同時既地支配合...
所以以屋企風水黎講, 應該"飛星"為首!
奇門係要夾埋時間黎睇...唔係單一用年既天干地支睇財位...
10 :
fast(1194)@2011-02-08 01:47:05hk所謂既投資方針,
買樓,買豪宅,買鋪,買一幢...全都係地產
今年拜年,發覺身邊d朋友職業,超過一半都係圍繞地產,
銀行按揭,裝修,泳池工程,地產經紀...可悲~
相信而家問十個人,有九個都覺得個樓市只會升,就算係平穩,也不會點跌
睇下今次又點.
8樓提及
我不相信玄學對投資有幫助，但我認同蘇民峰的投資方針有可取之處。他買入物業，留意租金回報率，不是坐著等升值，反映他重視資產製造財富的能力，能以經營者的角度看待投資。選股方面，他的財務知識未必有過人之處，但可以看到他重視公司賺錢能力。總的來說，他的務實態度是值得學習
11 :
鱷不群(1248)@2011-02-08 23:07:1610樓提及
hk所謂既投資方針,
買樓,買豪宅,買鋪,買一幢...全都係地產
今年拜年,發覺身邊d朋友職業,超過一半都係圍繞地產,
銀行按揭,裝修,泳池工程,地產經紀...可悲~
相信而家問十個人,有九個都覺得個樓市只會升,就算係平穩,也不會點跌
睇下今次又點.
8樓提及
我不相信玄學對投資有幫助，但我認同蘇民峰的投資方針有可取之處。他買入物業，留意租金回報率，不是坐著等升值，反映他重視資產製造財富的能力，能以經營者的角度看待投資。選股方面，他的財務知識未必有過人之處，但可以看到他重視公司賺錢能力。總的來說，他的務實態度是值得學習
樓市短期或者不會跌，但成熟市場與新興市場強弱之勢開始逆轉，湧港游資勢必減少，還要看內地收緊銀根會否導致資金需要北返救駕，加上美國下年可能加息，香港地產在這個周期估計已到黃昏階段
12 :
GS(14)@2011-02-09 20:56:288樓提及
我不相信玄學對投資有幫助，但我認同蘇民峰的投資方針有可取之處。他買入物業，留意租金回報率，不是坐著等升值，反映他重視資產製造財富的能力，能以經營者的角度看待投資。選股方面，他的財務知識未必有過人之處，但可以看到他重視公司賺錢能力。總的來說，他的務實態度是值得學習
其實他講的東西幾有道理，最重要都是資金的回報，投入的要計算何時收回，很多人還是不懂這點。不過以玄學論股，總是有所欠缺的。
13 :
GS(14)@2011-02-09 20:57:2511樓提及
10樓提及
hk所謂既投資方針,
買樓,買豪宅,買鋪,買一幢...全都係地產
今年拜年,發覺身邊d朋友職業,超過一半都係圍繞地產,
銀行按揭,裝修,泳池工程,地產經紀...可悲~
相信而家問十個人,有九個都覺得個樓市只會升,就算係平穩,也不會點跌
睇下今次又點.
8樓提及
我不相信玄學對投資有幫助，但我認同蘇民峰的投資方針有可取之處。他買入物業，留意租金回報率，不是坐著等升值，反映他重視資產製造財富的能力，能以經營者的角度看待投資。選股方面，他的財務知識未必有過人之處，但可以看到他重視公司賺錢能力。總的來說，他的務實態度是值得學習
樓市短期或者不會跌，但成熟市場與新興市場強弱之勢開始逆轉，湧港游資勢必減少，還要看內地收緊銀根會否導致資金需要北返救駕，加上美國下年可能加息，香港地產在這個周期估計已到黃昏階段
近日美股真是超強
14 :
鱷不群(1248)@2011-02-09 22:41:3813樓提及
近日美股真是超強
強得令我擔心債息上升，繼而拖累港股
可惜累積投資在美股的彈藥仍然不多
15 :
亞力士(1473)@2011-02-10 23:51:5614樓提及
13樓提及
近日美股真是超強
強得令我擔心債息上升，繼而拖累港股
可惜累積投資在美股的彈藥仍然不多
我上年恒生強積金大好 因轉去北美基金
16 :
鱷不群(1248)@2011-02-11 00:00:3715樓提及
14樓提及
13樓提及
近日美股真是超強
強得令我擔心債息上升，繼而拖累港股
可惜累積投資在美股的彈藥仍然不多
我上年恒生強積金大好 因轉去北美基金
我強積金也想買北美基金，可惜沒有這選擇。農曆新年時，忽然想起強積金，即晚上網落order轉Global funds
17 :
GS(14)@2011-02-11 07:59:32聽講有人炒強積金