ZKIZ Archives


財金「巴打」潮流袋巾由我創 高仁

1 : GS(14)@2016-07-05 02:04:40

2016-06-27 HJ

戴Sir「投訴」高仁把「豬朋狗友」飯局內容「搬上枱」,坦白說,在報章上以飯局對話形式探討財技,而又讓各位「巴打」輕輕鬆鬆「有嘢」(財技知識)落袋,高仁可能是財經界的第一人,戴Sir最終都「給力」支持。

各位「巴打」是否記得高仁講過,投行對「唉賓」的Look或禮儀相當講究,甚至有專門教授選購及穿着西裝的課程(詳見今年1月初〈「唉賓」穿西裝的大學問〉文章)。高仁決定再encore,撰寫「財金『巴打』衣着」系列文章。

「高仁指點」話你知,「唉女」可以靠高跟鞋及手袋提高貴氣,而「唉賓」則可透過袋巾提升氣派及品味。高仁最愛的是一字平摺法的袋巾,主要是貪其簡單且大體,並帶領財金「巴打」用袋巾的潮流。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶之外,亦向上市公司出謀獻計。

尊重客戶場合

戴孤劃:高仁,你真係厲害!自從你用咗一字平袋巾之後,就好似帶起咗一股潮流咁,其他財金「巴打」都爭相仿效喎。

高 仁:哈哈!以往財金「巴打」衣着嘅靈魂係領呔, 但我覺得用袋巾有畫龍點睛嘅功效,可以把一套西裝由平凡變得不平凡。有時候,我用袋巾係唔想打領呔,因為怕熱兼且食飯時又麻煩。財金「巴打」跟風用袋巾,就可免卻在大熱天時打領呔嘅痛苦。

戴孤劃:係啦,近排天氣真係愈嚟愈熱,我見到有啲財金「巴打」索性除咗條領呔,先至落街去食lunch。

高 仁:咁要視乎不同場合而定嘞!如果我唔打領呔嘅話,就會為西裝加上點綴,通常就用一字平袋巾,主要係要體現對客戶同場合嘅尊重之餘,仲可以進一步「升呢」,一舉數得。

程更計:乜袋巾唔係淨係得三角形咩!?

戴孤劃:你真係見識少,袋巾又點止三角形一款咁簡單!

高 仁:其實,三角形袋巾係叫做角錐摺法,佢係將方形袋巾對角摺成正三角,之後左右兩角再向內摺,再塞內西裝袋口,就會露出三角嘅造型【圖1】。

角錐摺法簡潔霸氣

程更計:呢種摺法,我經常喺社交活動或婚禮場合見到,望落去簡潔得嚟又有啲霸氣。

戴孤劃:高仁,你通常用嘅一字平袋巾,感覺上相當乾淨利落,究竟係點樣摺出嚟呢?

高 仁:哦!其實,一字平摺法好簡單,首選揀白色袋巾。方形袋巾對摺之後,再向上摺三分一, 塞入西裝袋口露出1 cm【圖2】,個look就最perfect,簡直係型到冇朋友。

程更計:咁聽落呢兩款袋巾摺法都好簡單喎!

戴孤劃:嘩!阿程嫌簡單,高仁介紹幾款難嘅畀佢!

高 仁:冇問題。等我食番隻燒鵝左髀,飲啖普洱茶休息一下先。但再講之前,提提各位財金「巴打」,有一樣嘢要切記嘅係,除非場合係異常隆重,否則用袋巾加領呔就會over咗。(飯局未完,下周待續。)

財金「巴打」衣着系列文章之一

本欄逢周一刊出。

歡迎交流上市公司的財技個案及招數,請電郵至koyan@hkej.com

?

#高仁 #財經拆局 #財圈識真假 - 財金「巴打」潮流袋巾由我創
財金 巴打 潮流 袋巾 巾由 由我 我創 高仁
PermaLink: https://articles.zkiz.com/?id=302433

「巴打」西裝配袋巾大學問

1 : GS(14)@2016-07-05 02:05:00

2016-07-04 HJ

上文提要:「唉女」可以靠高跟鞋及手袋提高貴氣,而「唉賓」則可透過袋巾提升氣派及品味。高仁最愛的是一字平摺法的袋巾,主要是貪其簡單且大體,並帶領財金「巴打」用袋巾的潮流。

「高仁指點」話你知,各位「巴打」不要小看細細塊的袋巾,袋巾摺法千變萬化,除了角錐及一字平之外,還有兩角、三角、泡芙,到花捲式的摺法,其創造的不同造型效果,與西裝配搭絕對是一門大學問。

在披露對話實錄之前,請各位「巴打」與「絲打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶之外,亦向上市公司出謀獻計。

兩角三角層次感強

程更計:燒鵝左脾食完,普洱茶又飲完,高仁可以繼續講未呀?

高 仁:OK!No problem!以下落嚟要講嘅兩角摺法同三角摺法,兩種都係稍為複雜嘅摺法,但就會畀人一種好強層次嘅感覺,分別散發出一股時尚優雅氣質同華麗嚴謹風格,最適合喺正式場合作為配搭。

戴孤劃:咦!呢兩款睇嚟啱我喎,高仁快啲講畀我聽點樣摺。

高 仁:顧名思義,兩角摺法係利用交錯三角形去形成兩個峰嘅層次,左右兩角再向中間內面摺埋,再放入西裝袋口【圖1】;三角摺法就喺交錯三角形形成兩個峰嘅基礎上,再把左邊嘅巾向右上面摺,右面嘅巾就直接向內面摺埋,放入袋口就會形成3個峰的層次【圖2】。

程更計:Mmm……呢兩款真係有啲難度,仲有冇其他款式可以介紹番?

高 仁:OK,冇問題。泡芙摺法係最隨意嘅摺法,只要捏住袋巾嘅中心點,垂低四隻角放入袋口,咁就搞掂【圖3】。

程更計:Good!呢個快、靚、正,啱晒我呀!

高 仁:最後一種花捲式嘅摺法係,一隻手捏住袋巾嘅中心點,另一隻手就握捲去營造花瓣嘅層法,放落袋口真係成朵花咁【圖4】。

戴孤劃:淨係諗到都覺得靚。

高 仁:最後,要再提提各位「巴打」一句,袋巾同手巾係兩件完全唔同嘅嘢嚟,大家千祈唔好攞袋巾用嚟抹汗,否則「唉賓」嘅高貴、時尚、優雅、尊貴、霸氣、專業形象會乜都冇晒。

程更計:Mmm……唔經唔覺,高仁原來已經教咗我哋6種袋巾嘅摺法,包括角錐、一字平、兩角、三角、泡芙同花捲式。

戴孤劃:我相信高仁除咗係第一個喺《信報》寫拆局文章超過6年嘅專欄作家之外,仲係第一個喺《信報》教人用袋巾裝身嘅「唉賓」。

高 仁:各位「巴打」賞面啫!

程更計:財金「巴打」用袋巾果然係型英帥靚正,等我都去買返幾條袋巾裝下身先。

財金「巴打」衣着系列文章之二

本欄逢周一刊出。

歡迎交流上市公司的財技個案及招數,請電郵至?koyan@hkej.com。

?

#高仁 #財經拆局 #財圈識真假 - 「巴打」西裝配袋巾大學問
巴打 西裝 配袋 袋巾 大學
PermaLink: https://articles.zkiz.com/?id=302434

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019