ZKIZ Archives


送Benz送金條刺激商場人流中環在線:上海谷消費益咗恒隆 李華華


2009-05-12  AppleDaily





 

香港各大小型商場經常推出泊車優惠同抽獎活動,希望帶旺人流,噚日華華同恒隆地產(101)執行董事吳士元傾開偈至知,原來上海嘅區政府非常進取,出埋禮物幫區內商場搞抽獎活動,鼓勵市民消費。咁小事都咁積極,上海要喺2020年成為國際航運同金融中心,真係指日可待。

重本抽獎刺激消費

恒 隆喺上海徐匯區有個港匯廣場,徐匯區商務委員會啱啱喺上月底至今個月10日,連續3個禮拜舉辦徐家匯消費抽獎活動,消費者喺參與嘅商場消費滿200蚊人民 幣,就會有一張抽獎券,每期頭獎係一架Benz(內地稱為奔馳),二獎50名就獲贈20克重金條。咁嘅禮品,除咗嘩嘩聲,都係嘩嘩聲。相對香港,零售業界 叫極政府仿傚台灣派消費券,刺激吓市民消費意欲都冇乜回音,上海一個徐匯區就出啲咁勁嘅禮品,真係完全兩回事。不過咁,香港人一向識得靈活走位,業主見商 場唔夠人流都會自動自覺搞搞佢啩!最近H1N1豬流感肆虐,吳士元話03年沙士期間,每日都要落去重災區淘大商場,噚日講番起仲記憶猶新。

沙士冇戴口罩要分居

佢話當年最初一個禮拜都未識驚,冇戴口罩就去淘大,返屋企梗係俾老婆鬧啦,結果老婆帶埋兩個女走去黃金海岸住咗3個月先返嚟咁話。李華華LiWaWa@AppleDaily.com
 



Benz 金條 刺激 商場 人流 中環 在線 上海 消費 益咗 華華
PermaLink: https://articles.zkiz.com/?id=7898

老豆一萬變100億神話 黃翠如:內疚益咗炒家

2016-04-21  NM

本週最「勵志」的故事,一定非黃翠如爸爸黃永華的神話莫屬。本來做賣魚佬、住公屋的翠如爸、九八年與兄長每人夾一萬蚊開設建築公司,上週這間建築公司聯旺(8217)在創業板上市。一日之間,由市值不足一億、一躍炒上百億,由無乜人識的建築公司,變成師奶散戶眼中的明星股。

本刊發現,去年底翠如爸才向政府的中小企貸款計劃借入四百萬,條件是「不可上市」,不足一年就改變計劃。揭開這隻股票的背後人脈,聯旺的保薦人為天財資本,天財資本同時為其他建築股如前進控股(1499)及日成控股(3708)上市,這類股份大部分一上市就離奇暴炒,而且幾乎用同一班律師擔任法律顧問。無論性質、重組過程、盈利模式都很相近,猶如「啤」出來。

過去這類公司的股價,最後只有一個結局——由高位跳降傘,散戶屍橫遍野。黃翠如於本週日,接受本刊訪問時多次表示:「益咗炒家好內疚!」

翠如爸的聯旺自上週二上市後,股價一度升到唔見頂。黃翠如久未開腔,原來她為此困擾多日,本週日終接受本刊電話訪問,坦言不想幫炒家做宣傳,現在已經好內疚,「我都唔知點同你講!你可能唔會信我,但我是覺得有點無助。我判斷能力好差嘅,我都唔係一個頭腦好清晰嘅人,我係諗到咩就講咩嘢。我好驚,唔知咩嘢事呀!開始時對爸爸的支持,到最後變成影響到家人,我覺得很內疚!」

她稱對股票毫不認識,「買過一次股票,而且蝕晒。」自此沒有再沾手股票,她擔心炒風是由她而起,「其實呢樣嘢,係唔係叫炒家呀?佢哋玩數字遊戲?我成日諗係唔係我的緣故呢,咁多新聞炒作,大家先有興趣去玩,這樣我很內疚的。所以我盡量乜都唔講,唔想變成替嗰班炒家做宣傳。」

賣殼賺過億

事實,炒作亦因黃翠如而起。於聯旺掛牌前,這隻股票根本無人認識。不過上週掛牌當日,在早上約十時,黃翠如於ig貼出與爸爸在港交所的合照後,令這隻股票成為整個星期的炒作焦點,股價由開市兩元,一度升穿十四元,比配售價$0.26,高出五十多倍!市值超逾一百億。但短期股價升跌對翠如爸並無直接關係,因為根據招股章程,上市申請人有六個月禁售期,黃翠如說:「我爸爸作為股東唔可以買賣,你哋一定好清楚,所以對我哋屋企人,呢啲數字完全無意義,爸爸仲係每日落地盤工作,我唔明點解引起咁大回響。」而根據中央結算系統,現時在證券行的街貨為總股數兩成半,正好是聯旺配售出來的股數。雖然無份炒股,不過成功上市的翠如爸,一年後如能成功賣殼,也能一鋪賺過億。尤其是現時殼股有價,價錢還要是二至五億。一名中小型租務公司老闆向本刊透露,曾有中間人表示可出資讓他上市,「有人約我上遊艇,摸住紅酒杯,話幫我出埋錢。佢哋有團隊一條龍去搞,到賣殼時才七三或者六四分賬。上唔到市都係只需俾番一半行政費。」

賣魚佬轉行做建築

記者上週五,曾前往翠如爸位於沙田石門的辦公室找他,不過他並不在。其辦公室可謂無門面可言,招牌細細塊,亦無接待處,只有兩個「妹」職員打躉,她們應門時說:「佢好少返來的,基本上喺地盤!」黃永華公司由裝修判頭做起,直至近年承接多個香港大型土木工程項目,包括西鐵線高架橋及港珠澳大橋。看似好勁,但其實只是二判,大部分項目都是由中國港灣、俊和及中國建築等大公司外判予他,有建築界老行尊表示根本未聽過他們的名字。而事實上,翠如曾於訪問中提及爸爸多年前曾於九龍灣經營魚檔,後來跟伯父、即聯旺的主席黃智果做建築,算是半途出家。記者曾到黃永華做魚販的街市及所住屋邨尋找他過去的足跡,但已無人記得他。黃氏一家現時報住馬鞍山聽濤雅苑,但多年前他們是住在馬鞍山恆安邨,○○年黃永華用三十幾萬買入這個屋邨單位,至今仍然持有。黃氏一家亦偶有投資,不過眼光就麻麻。如○五年黃永華用七百多萬買入一個沙田皇御居單位,一○年以五百多萬賣出,蝕一百八十萬;而一○年用一千三百多萬買入大圍名城一個單位,一五年又以一千二百多萬沽出。相反黃永華太太黎小娟以個人名義買的商廈單位包括葵昌中心及新貿中心等,分別有百幾萬「斬獲」。

借中小企禁上市

翠如爸九八年才與哥哥每人夾一萬元開公司,來到今天終於成功上市,但原來這個上市計劃,一直不是在他預計之內。翻睇上市文件,翠如爸的公司,去年中才透過香港按揭公司的中小企貸款計劃,借入四百萬元做公司的營運資金。根據這個貸款協議,聯旺並不可以將其股份於香港內外的主板或創業板上市。直到今年初,聯旺向銀行借錢,把從中小企借來的四百萬還清,亦即「債冚債」,「不可上市」這個協議才解除。去年才承諾不上市,又突然改變主意,中間當然有「高人」指點。聯旺的保薦人是天財資本,天財同時是其他建築股如前進控股(1499)及日成控股(3708),以及中國糖果(8182)、冠輝保安(8315)等的保薦人。這幾隻股份都離奇暴炒,而且全部都以毅柏律師事務所,作為開曼群島法律顧問,除了聯旺,上述幾間公司的香港法律顧問,都是龍炳坤及楊永安律師行。行內人士透露,保薦人除提供一條龍服務,幫公司籌備上市,又安排律師班底。去年一間叫大有融資的保薦人,先後替八間建築公司上市,當中有四間又是與龍炳坤及楊永安律師行合作,其中一間震昇工程(2277)的秘書胡遠輝,亦同樣是聯旺的公司秘書,可見各人是合作無間。有資深人士指,找建築股上市,是貪他們資產少,他日賣殼乾淨利落。「好多建築商搵唔到錢,毛利只有百分之三。上一次市,股價有得狂升,殼價有幾億喎!」 他指近年香港的確多了很多基建,要谷收入較為容易,只要用低過行家的價錢搶標,有一定生意額。而事實上,創業板對公司盈利並無要求,只要接夠生意,即使是蝕錢都可以上市。

背後玩家起底

聯旺上市後,炒到百億市值,以其截至去年三月底全年盈利一千八百幾萬元計,市盈率達六百倍。不過做過多宗大型基建的惠記集團副主席兼行政總裁單偉彪指,這類建築股,市盈率最好那一間亦只是七、八倍,「現在香港的建築公司大部分PE比較低,好似我們做地基也只是四倍多。即使是前景很好,都是七倍、八倍。如果間公司一年賺一千萬的話,他的公司最多都係市值七千萬囉,唔會多過這個數,除非前景無限好啦,不過又唔似。」如果以市盈率七倍計,聯旺市值最多值一億二千幾萬,亦即股價要跌近九成九!不過炒家玩創業板玩到出神入化,公司的業績如何、基本因素如何、根本無需理會,上到市,貨源歸邊,背後庄家就有方法舞高弄低。根據中央結算系統持股記錄,聯旺由鼎成證券持倉最多,達百分之八點七六,其次是海通證券、六福證券及貝格隆證券。當中鼎成證券及貝格隆證券持有聯旺街貨超過四成五,據知已引起證監會關注。持有貝格隆證券的隆成集團(1225),去年八月以一供三比例供股,當時的包銷商就是鼎成證券。隆成供股,令持股達百分之八的獨立股評人David Webb不滿小股東股份被攤薄,去年曾寫過一篇文章,一層層揭開隆成背後的網絡,文章中出現過的股票名字,包括中國環保能源(986)、新確科技(1063)及中國汽車內飾(48)等。而據知這幾隻股票,與近年在財經界冒起,並與多個細股玩家有交往的紅人葉志輝(Steven Ip)大有關係,其兄葉志明曾任新確科技的執董。據一名有出席當日上市儀式的市場人士指,Steven Ip於聯旺上市當日都有現身支持。

恐成中國集成翻版

過去股份被炒高後,就會有一班「懵盛盛」的散戶接貨,之後的故事當然是大庄家散水,散戶坐艇。事實上,上星期聯旺股價炒上,成交最多的包括滙豐、中銀及恒生等散戶常用的證券行,而股價急跌當日,又是這類證券行出貨最多,相反持股最多的幾大證券行,就仍然按兵不動。現時聯旺的股價已被夾至高到上太空,每手要八萬元,令散貨難度大增。有熟悉庄家玩法的市場人士指近年流行一個新玩法,「唔使靠散戶,一個庄家手上面有好多隻殼,佢可以用手上其他上市公司的錢,去接咗呢批貨,唔使多,每隻殼公司出幾千萬,每單銀碼細,亦根本唔使公布。」睇番往績,同時由鼎成證券及貝格隆證券持倉較多的股份,還包括中國集成(1027)(前身是集成傘業),早輪這隻股份的股價如跳降傘一樣,跟風的散戶已屍橫遍野。一個又一個的悲慘案例,究竟大家幾時先醒?

撰文:梁佩均、孫樂祈資料:梁延宇news@nextdigital.com.hk

老豆 一萬 萬變 100 神話 黃翠 翠如 內疚 益咗 炒家
PermaLink: https://articles.zkiz.com/?id=193616

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019