📖 ZKIZ Archives


大劉溫莎情意結

2017-01-05  NM

華置(127)近幾年不斷出售旗下物業,不過就唔捨得賣銅鑼灣的皇室堡(Windsor House),去年更從上市公司收歸入私人口袋,大劉還沿用置地八十年代Windsor House Ltd的公司名來持有。

大劉對Windsor其實有個情意結,七十年代佢喺加拿大Windsor University讀數學,聽佢一位同屆同學仔講,大劉讀書時「溝女」一如其做股壇狙擊手一樣,盡顯「快、準、狠」本色,大劉老豆當時唔係咁富貴,有時零用錢未匯到,等唔切江湖救急都要問朋友仔度住一百幾十蚊加紙,話就話係借住嚟入油,一缸油打爆都係廿蚊,剩低嘅就用嚟做溝女經費,揸住架二手車直剷上去寶詠琴就讀嘅Waterloo大學。七十年代香港女喺嗰邊好矜貴,事關父母通常供仔唔供女讀書嘅,大約廿條仔對一條女,大劉一招「快、準、狠」自然冧死女,亦冧得掂呢個屋企專代理名牌嘅少爺仔喎,啲錢唔還都冇所謂。Windsor大學靠近美國底特律(Detroit),當時中國仔最興揸車落去租鹹帶睇,怪不得連網上介紹此大學,都講學生喺Windsor同底特律有多姿多采嘅夜生活!

李秀恒傾力演出

廠商會會長李秀恒反應夠快,急不及待伸個頭出嚟以「中華文化藝術推廣基金」撐「故宮」、撐林鄭;仲話自己及廿名富豪經常出外經商,在海外搜羅唔少古董文物,但苦無檔期展出以慶祝回歸廿周年;其實李秀恒做事一向投入,廿年前接受敝刊專訪,為介紹日本洗pat pat功能廁所,也不惜犧牲色相,著住條孖煙囪上鏡,唔知李會長有冇收藏皇帝嘅尿壺呢?

中環寸嘴我係公子中嘅公子

貴刊老闆喺佢專欄話我楊公子「老子寸得起!」,真係受唔起,我哋做人都係想安安樂樂嘅啫,星爺喺電影《唐伯虎點秋香》話齋「華勝」、「華強」受唔起,叫我「華安」得啦,一陣容乜易俾人剷我哋呢啲港英餘孽!我哋講嘢簡簡單單,絕不馬虎,一係直插G-spot,一係畫龍點睛,唔好嘥大家時間嘛。連咁有分量嘅文化推手都叫我楊公子,不過公子未免叫到「俗」晒,你估好似以前「麗春院」咁,嫖客都叫做公子咩?如果叫到俗晒,我唔怕自認係「公子中嘅公子」,我又唔係世家子弟,一生世襲,係要自己earn返嚟o架,即係個招牌生咗銹要自己省番令佢,嘻。肥佬黎你話我優哉游哉,我其實係苦中作樂咋,當你經歷過戴卓爾夫人仆街,喺香港揸住磚頭唔值錢,要去外國同家族開山劈石,嗰種求變、求生存嘅動力就好強,如果唔係咁,除咗漚臭,同條鹹魚有乜分別?我估肥佬黎作為文化推手,都好似推拿聖手咁,好用力咁去捽啲下屬o架?啲世叔伯成日同我講:「你老豆歎得少呀!」鬼佬成日寸我哋中國人Live Poor Die Rich,到咗我呢個年紀,應該時常調校吓生活質素呀!做?仔時,經常北美香港兩邊走,頻撲過度成日口擘擘,俾時差煎熬,唔補補佢好易冇。同大家分享昔日舊照,就知我講乜啦。

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

鏞記樓上藏大鱷

今時今日做基金佬,仲坐喺度等股票升?潮流興Activism,要主動出擊去劈錢返來;最近有條對沖基金大鱷,由紐約游咗嚟香港,就喺鏞記樓上設竇,名為Lakeville Capital Management,目標正瞄準一間喺美國上市嘅公司——大陸旅遊網「去哪兒」Qunar.com;話說「去哪兒」今年中接納一家私募基金收購並提出私有化,溢價只為公布時15%,Lakeville揸弗人吳恒澤(Stephen Woo)插個私有化價格不公平(fairvalue),準備到開曼群島(Cayman Island)法院開拖,事關「去哪兒」雖然喺美國上市但在開曼群島註冊,私有化過程要遵循註冊地的《公司法》;呢條大鱷似乎都好熟悉開曼群島的《公司法》,佢寶號Lakeville背後股東同樣在此群島註冊,喺開曼群島註冊嘅美股,只要66%投票權通過即可,買方又唔使迴避,且容許同股不同權,今鋪要睇吓鏞記樓上呢條大鱷點同大陸公司「過招」。

PermaLink: https://articles.zkiz.com/?id=232368

赴溫莎堡午膳 補祝英女皇生日

1 : GS(14)@2016-04-23 18:37:28

奧巴馬此行除了呼籲支持留歐外,他昨日特地赴溫莎堡與英女皇共晉午膳,補祝她前天90歲大壽。這頓午飯相信是奧巴馬卸任前,最後一次與英女皇會面,他的夫人米歇爾與英女皇丈夫菲臘親王亦有出席,白宮指奧巴馬夫婦送英女皇歷次訪美的相簿作生日禮物。下午與首相卡梅倫會面後,奧巴馬夫婦晚上又前往肯辛頓宮,與威廉王子、他的夫人凱蒂,及哈里王子晚膳。有評論認為,奧巴馬之所以積極與皇室交往,是為了掩飾他與英國政界的關係裂縫。自奧巴馬上任以來,一直被指與英國領袖貌合神離,皇室成員往往成為雙方破冰的橋樑,如在2009年訪英,米歇爾與英女皇首次見面時親熱地擁抱,就成為了兩國近年在緊繃關係中的難得佳話;王儲查理斯、威廉及哈里三父子,過去18個月亦先後訪美,充當兩國的親善大使。美聯社





來源: http://hk.apple.nextmedia.com/international/art/20160423/19582829
PermaLink: https://articles.zkiz.com/?id=299537

【從前今日】佐治五世有德國血統 改姓創英國溫莎皇朝

1 : GS(14)@2017-06-23 01:44:32

有謂「行不改名,坐不改姓」,但英國國王佐治五世為了國民,在1917年的今日,將皇室姓氏改為「溫莎」。事源佐治五世本身有德國血統,因為他的祖先佐治一世的爸爸是德意志人,亦即是德國前身;而媽媽是英國皇室繼承人,不過佐治一世繼承皇位後,他及其後裔都繼續使用德國姓氏,至佐治五世1910年繼位。4年後,爆發第一次世界大戰,英國被德國轟炸,死傷慘重,令英國人的反德情緒很高漲。佐治五世為了與當時的德國皇帝,即佢疏堂表親劃清界線,表達與英國國民站於同一陣線,他決定將皇室姓氏改為典型的英國姓氏-「溫莎」,令民心更加歸向,而溫莎皇朝更延續至今。綜合報道




來源: http://hk.apple.nextmedia.com/international/art/20170619/20061216
PermaLink: https://articles.zkiz.com/?id=336457

Next Page

ZKIZ Archives @ 2019