📖 ZKIZ Archives

中門大開：梁曾鬥 添馬男

1 : GS(14)@2013-07-19 00:42:18

http://hk.apple.nextmedia.com/financeestate/art/20130718/18338401

                  梁粉做事，猶如「食豬紅、屙黑屎」，一定畀人睇死。
7.1後要搶救689，不外乎兩招，一是提早啟動政改諮詢，二是狂派買民望。前者操於北京之手，中央大員信唔過佢，點會放手，由張曉明掛帥現真身，根本唔使689去搞。至於狂派，即使林鄭投誠，鬍鬚曾也唔會輕易開水喉，即使財爺肯開，佢下邊財務科班政務官亦唔會就範。港英時代，財政司實權根本高過政務司，而財務科與公務員事務科就係官僚系統之back bone，體現官僚治港理念所在。

民望低　應潛藏非亂出招

                外來政客為自己管治失敗找替罪羔羊，不外乎兩個萬能key：議會政黨尤其是泛民搗亂，以及官僚不合作。但議會內建制派佔多數，政策失敗基本上同泛民冇關，至於官僚不合作，首當其衝當然係財政司司長，揸數死唔放水，梁粉何喜華先試一槍，見冇乜反應，再由金主陳啟宗發重炮，指他乃大罪人，曾俊華翌日在廣州笑笑口話心情沉重，梁振英則公開表示兩人合作無間，與陳啟宗切割。
梁粉水平低，平日圍埋一齊，就媽叉班政務官阻頭阻勢，講到入晒腦，習慣晒，何喜華在訪問中，出口砌財爺自是理所當然。
至於陳啟宗則相信係另一個故事，因當日係梁粉論壇，主場出擊，689幕後指使機會好大，而且用到咁重語氣，即係反映689為求在明年1月施政報告中狂派，已去到好desperate，所以先抬出梁粉重炮，如果屬689部署之攻勢，應有後續攻擊，其他外圍梁粉接力，諸如林鄭戰友羅致光、羅范等，作群毆式泥漿摔角，鬍鬚曾乃洪拳高手，兼且精於劍擊，深明防守劍之道，在於後發制人，有成個財金系在背後，加上北京支持，要抵擋梁粉攻勢，並不困難。
689要玩內鬥，佢自己民望低，本應潛藏，而非亂出招，巿民唔信任佢，認為佢係壞人，因此任何人站在689對立面，by definition,一定係好人。即使鬥倒曾俊華，迫佢走，難道北京會畀梁粉陳茂波接任特區財政司司長？簡直妙想天開。當然，梁粉地產金主有此想法，並不為過，陳茂波東北加強版官商勾結交到貨，已令囤地多年地產孖沙笑逐顏開。

                  添馬男                                                        
PermaLink: https://articles.zkiz.com/?id=283490

父母早亡　梁曾當童工

1 : GS(14)@2016-11-20 23:41:59

【本報訊】「我哋出嚟係為勞工，唔係為個人！」訪問中梁籌庭說得最多是這句說話。由小學畢業做童工被僱主壓榨，到加入政府後又眼見同事被無理對待，梁籌庭早在1979年便組織工會為同袍爭取權益。在工運路打拼近40年，梁籌庭聲言無意退下火線，未來重點培訓工會接班人。


從小見盡僱主壓榨


66歲的梁籌庭自幼父母雙亡，一直由阿姨照顧，家境清貧，他12歲小學畢業就被安排到阿姨朋友的雲吞麵檔工作，年紀小小，他便見識僱主樣樣算到盡，當時基層僱員月薪數十元，他的人工卻少一大截，「每個月老闆畀4蚊我，仲話你阿姨話明可以唔畀人工你，有食無工」。除了雲吞麵雜工，梁籌庭又做過侍應、餅房工及塑膠工，其間半工讀進修，20歲投考公務員，2011年退休前為助理文書主任。梁籌庭表示，初加入政府時見過不少不合理事件，「最離譜有辦公室助理俾人捉去洗廁所」，觸發他組織工會的念頭，結果他於1979年成立文書職系公務員總會，1984年再組成公務員工會聯合會。梁籌庭現時仍擔任兩會總幹事。他說，近年越來越少人願意投身工會，希望未來可吸納退休公僕到屬會擔任總幹事，協助處理會務。■記者盧文烈




來源: http://hk.apple.nextmedia.com/news/art/20161119/19838879
PermaLink: https://articles.zkiz.com/?id=316197
Next Page
ZKIZ Archives @ 2019