ZKIZ Archives


冰說聰明:搞波好睇唔好食

1 : GS(14)@2018-02-25 03:12:29

身為球迷的青冰,前晚雖沒有入場為傑志打氣,但都知道傑志在亞冠盃慘敗,賽後主將科蘭話,球隊心態有待改進,以弱勝強一定要有鬥心。講鬥心,早幾日英格蘭足總盃,韋根殺敗班霸曼城,晉身八強,的確好值得學習!不要誤會今次唔講股票會講波啊,本港上市公司國際娛樂(1009)在月初公佈,正商討收購韋根,按公告,盡職審查會在上周三(14日)完成,收購的獨家期最遲可延長至2月28日。國際娛樂去年賣殼予蔡朝暉,蔡生同內地富豪關係良好,是雲鋒基金的創始人之一,雲鋒者,就是馬雲及聚眾傳媒老細虞鋒,講背景蔡生就冇得輸。現時國際娛樂的主要業務,係在菲律賓經營賭場酒店,似乎冇太大睇頭,佢哋透露過會發掘全新商機,估唔到係想搞波。韋根現時處於英甲,即係比英超低兩級,商業價值唔太高,不過亦都係因為咁,作價唔會太貴。青冰在網上找到2016年球季結束時,淨資產係3,000萬英鎊,年收入係1,800萬英鎊,踢完嗰季之後降落英甲,相信2017年度球季的財政應該更差。原主席Dave Whelan在90年代買入球隊後,花了十年時間幫球隊升四級,打進英超,仲留到8個年頭,不過佢年事已高,在2015年交棒畀個孫仔,而阿爺在前年斥資收購咗英國的Fitness First搞到債台高築,相信今次賣韋根應該為咗還債,唔會獅子開大口。不過,青冰睇咗波廿幾年,經營球會要賺到錢係少之又少,所以國際娛樂即使可以平價收購韋根,除咗係有話題性之外,未必真係搵到銀,不過炒作因素仍然是有的。現時隊波排第三名,升班機會唔低,而足總盃打入八強,將在主場出戰另一英超球隊修咸頓,有力再創奇蹟,如果再進一步入到四強,就會在國家級球場溫布萊比賽,屆時球會收入又大增。之但係,都要等正式收購條款出咗,先有得炒嘅,咁在下周三deadline前,密切留意吓披露易有冇通告啦。青冰
http://fb.com/chingbing888本欄逢周四刊出



來源: https://hk.finance.appledaily.co ... e/20180222/20311902
冰說 聰明 搞波 波好 好睇 睇唔 唔好 好食
PermaLink: https://articles.zkiz.com/?id=348857


ZKIZ Archives @ 2019