不經不覺，大市已經由2月的18278點，悄悄回升近6000點，重返24000關口，亦重新回到了去年大時代的起步點，一切又重新出發。回顧最近的反彈，升的都是大價股藍籌股為主，表表者當然是宣布回購的匯豐控股(00005)和突破了$200大關的騰訊控股(00700)。相反地，細股和中價股卻未能受惠，低於6億主板的殼股比比皆是。
細股積弱的情況其實已不是一時三刻，而是由年頭已經開始。恆指在7月已創年內高位，創業板指數卻在同期創下年內最低位，表現大相逕庭。這可以由理論層面和實際原因去解釋。從理論層面說，牛市重臨時，根據資金流，大價股會升先於細股，當大股升了一陣子，估值變貴，大家就會沽出套現，再買入仍然被低估的細股。這猶如樓市牛市初期，也是豪宅、大型屋苑先升，細價樓依舊無人問津。
若從實際原因去解釋，筆者相信7月8月的細股洗倉潮嚇走了很多散戶，背後人士想炒也炒不起。一隻股票暴跌，引發其它倉位的資金鏈斷裂，變成漣漪效應效應，每天也有2-3隻股份大跌，傳媒的報導令散戶失去信心，即使大市好轉也未見有資金流入細股，形成大股升細股跌的兩極現象。
以目前情況來看，其實主板殼價仍然企穩於6-6.5億水平，深港通也很有機會於11月開通，細股市場前景理應不差，可以說是萬事俱備，只欠東風，因此探險家對於細股仍然是樂觀的。但始終因為早前發生過洗倉潮，筆者的選股策略也偏向保守，除了要貨源歸邊外，亦只會選擇未升過的股票，避免接火棒。至於有甚麼好股票值得買，筆者下回再同大家分享。
更多文章詳見於：
「股市探險家」專頁：https://www.facebook.com/stockadventurer/
(以上純屬個人意見，並不構成任何投資建議或勸誘。)
一件貨品貴與不貴，在於它在你心中值不值這個價。在細股的世界裡，一間公司貴與不貴，除了要看其基本因素、股權架構、資產價值等，它的市值也是一個關鍵考慮因素。市值越平，對殼價折讓越大，理論上潛在回報越大，也相對吸引。相反，市值高於殼價，即使最終公司賣了殼，股價也未必升得起。然而，市值看似是明碼實價，在一般的報價網站已經可以查閱，但其實內裡也有不少學問，若不仔細點看，紛紛中會誤中陷阱。
在過去的一星期裡，分別有4隻半新股正式上市一年，隨時可以賣殼，其中兩隻分別是莊園牧場(01533)和天潔環境(01527)。如果大家翻開報價機，會發現兩者的市值只有1.88億($5.35計)和2.62億($7.5計)，比6億殼價存在大幅折讓，看似十分吸引。但其實這是一個市值陷阱。它們同屬內資股，兩間公司的市值之所以那麼低，只是因為它們只計算H股的市值，還未計其內資股市值。以天潔環境為例，它共有3500萬H股和1億內資股，合共1.35億股，同樣以$7.5計，它的市值其實高達10.12億，比殼價高出4億。而莊園牧場則有1.0537億內資股，所以其實際市值也高達7.51億，同樣高於殼價。順帶一提，要查閱一間公司是否內資股很簡單，看它的月報表便成。
其實除了內資股，也有其他原因可以令一隻股票未能反映其真正市值。就舉例，我們平時在不同報價網站中所見到的股票市值，多數是只其H股市值，而不是其總公司市值。以中國石油股份(00857)為例，報價網會顯示其市值為1131億($5.36計)，但這只是其H股市值，還未計及其內地A股的市值。其次，股票可分為普通股和優先股，如果公司本身發行了優先股，該市值也未必計算在內。
還有一些更容易被忽略，就是上市公司本身在以前有沒有發行過認股權証、CB等，一旦目前股價遠高於行使價，認購人便有很大誘因行使認股權証或CB，令已發行股數增加，同樣會令市值上升。我們在計算該公司市值時，也應該翻查一下月報表、年報等，才可找出該公司的真正市值。
更多文章詳見於：
「股市探險家」專頁：https://www.facebook.com/stockadventurer/
(以上純屬個人意見，並不構成任何投資建議或勸誘。)
探險家
最近無聊上FACEBOOK，無意中見到前港姐麥明詩分享了她對於浪子同收兵的見解，佢話:「娘娘的無義，正如浪子般無情。前者要物質的享受；後者要肉體的滿足。浪子留精不留情，那娘娘是給精不給情吧。精神的精。」留精不留情，給精不給情。短短十個字，完美演譯了何謂浪子同收兵。套用同樣邏輯，你一樣可以做股壇中的浪子。
浪子係咩? 講得白D姐係食完就鬆，食完一個又一個，不留下任何感情。不過咁樣講太粗俗，要講得文雅D。點樣講? 徐誌摩話左比你聽。悄悄的我走了， 正如我悄悄的來； 我揮一揮衣袖， 不帶走一片雲彩。
股壇上其實好多浪子。今日炒A股票，贏左5萬，即刻賣曬，聽日轉炒B股票，炒完一隻又一隻。浪子係點? 係夜場入面見到個靚女，睇下個樣，幾靚，條腿又長，唔駛諗，溝左先算。咁股壇浪子呢? 係二十大升幅榜見到隻靚股，望清楚幅圖，幾靚，支大陽燭又長，唔駛諗，高追先算。成個過程完全一樣，所以話如果你本身已經係一名夜場浪子，你絕對有潛質成為一個股壇高手。
呢一種炒法，用股票術語黎講，可以叫做短炒、高追、順勢而行。原理簡單，就係追逐當日最有動力的股票來進行低買高賣，善用資金的靈活度，密食當三番。呢套方法聽就易，做就難。用麥明詩個句講，留精易，不留情難。
經濟學假設人類係絕對理性，但行為經濟學話比我地聽人類其實非絕對理性，主觀感受會影響我們做的決定。當有錢賺時，大家都好樂意賣出股票，鎖定利潤；但當蝕錢時，明明睇錯市，人們都會傾向坐多陣，避免損失變成真正的損失，這叫做「一日未賣都未算蝕」。可這正是順勢炒股的大忌，除左鎖死資金，減低靈活度，更會隨時越踩越深，輸一次，贏十次都追唔番。要係短炒戰績上有所改善，就要真正做到留精不留情，每次買賣時不帶任何感情，蝕左睇錯市要懂得果斷止蝕。至於我，作為一個投資殼股的價值型投資者，夜場呢D野唔太巖我，都係留係屋企打下FIFA好過喇。
更多文章詳見於： 「股市探險家」專頁：https://www.facebook.com/stockadventurer/
（以上純屬個人意見，並不構成任何投資建議或勸誘。）
又黎到情人節，又係時候講下D愛情話題。愛情同股票，一個絕對感性，一個則絕對理性，風馬牛不相及。但如果你真係咁諗，少年，你太年輕喇。正如上一篇文｢留精不留情｣，情場浪子點樣溝女，同股壇浪子點樣炒股，背後原理同實際行動都係一模一樣的。好多人話買殼股、財技股、細價股好難，背後原理深奧，唔識點樣搵到一隻優質的殼股。但其實要明白殼股原理，可以好簡單，因為搵一隻靚既殼股就同你搵一個好既女朋友的原理一模一樣。睇完呢篇文，包你一理通，馬國明。
情場浪子最睇重女仔邊樣野？當然係外表，樣要靚，波要大，腿要長。股壇浪子最睇重股票邊樣野？當然都係圖表，圖要靚，成交要大，支大陽燭要長。無他，皆因速戰速決最緊要。但拍拖同揀女朋友就好唔同，至少你係真心想同佢發展落去，建立長遠的感情關係，甚至可能計劃埋同佢幾時結婚，同佢一生一世。係呢個時候，你當然仍然會註重一個女仔的外在美啦，無計，這是男人天性，但你亦同時知道，她的內在美顯然比她的外在美更加重要，她的內在美才是你心動的地方。
炒殼股，正正就係呢種道理。炒殼股，圖表當然重要啦，唔通日日52週新低你仲走去買咩，但一隻殼的內在質地先係最重要。講到內在美，呢樣野可能每個人都有唔同標準，但我相信總有一些是大家公認，好似以下三點：對男朋友專一、性格純真唔攻心計，同埋唔貪錢。
第一點，對男朋友專一，唔花心。呢一點唔駛解釋啦，一個心不能有兩個他。用殼股術語講，一隻股票不能同時有兩個或以上大股東。這是因為當有新買家想買殼，但如果有一個大股東想賣，另一個則唔想賣，整單交易很可能便會告吹。一間公司內越多主要股東，賣殼難度便會增加。所以，最靚的殼股，就是只有單一大股東，持有75%股權。為甚麼是75%? 因為這已經是法例上限，不能再增持了。女朋友對你專一，總好過她出面有另一個男朋友吧。
第二點，性格純真。一個簡簡單單，真心對你好的女朋友總好過一個攻心計，懂得玩弄你於她的掌心上好。殼股都係，越簡單越好。除左股權要簡單，業務都要簡單，因為這方便日後易手後分拆殼肉，把原有業務退回舊主，成個賣殼deal不會太複雜。但如果一間公司有好多業務，又賺到唔少錢，咁就可能代表佢真係有心做實業，上市目的唔係為左啤殼，咁自然日後都唔會賣殼啦。
最後一點，亦係最重要一點，唔貪錢！呢一點相信冇咩人會反對，如果一個女仔情人節主動叫你唔駛買花，唔駛食咩情人節搵笨套餐，簡簡單單就已經好浪漫，呢個女仔絕對娶得過啦! （前提係請你1000000%確保她是真心說出的，否則你最後冇做到，咁我都幫你唔到）至於殼股唔貪錢，可以演譯為新股上市時集資額細，人地集一百幾十億，你就集區區幾千萬。公司上市，如果係有心把業務做大做強，當然是集得越多資金越好啦，區區幾千萬，一年純利都搵到啦。所以，如果上市公司集資額偏細，好有可能代表公司上市的真正目的並非集資，而是為了啤殼，他日成功賣殼，殼價都賺番6億啦。
簡單點來說，股壇浪子睇三樣野，樣靚、波大、腿長。揀女朋友睇3樣野，專一、純真、節儉。揀靚的殻股都係睇三樣野，股權集中、業務簡單、集資額細。入得廚房，出得廳堂，穿梭交易所，就係咁簡單，得左！
更多文章詳見於： 「股市探險家」專頁：https://www.facebook.com/stockadventurer/
(以上純屬個人意見，並不構成任何投資建議或勸誘。)
https://hkcitizensmedia.com/2017/04/26/%E5%88%A9%E7%A6%8F%E5%9C%B0%E7%94%A22183%E6%AE%BC%E5%83%B9%E5%88%86%E6%9E%90/
恆指跌穿24000點，大市氣氛回落，但細股賣殼消息卻不斷出現。上星期利福地產(02183)發出通告，公司控股權疑易手，變相賣殼。一般賣殼，都係比較細市值的公司，大部份都係20億樓下。20億樓上就較少，主要都係傳統名牌股，或者一些本身持有甚多物業的公司。而今次利福地產賣殼，正正就係後者。
睇番份通告，公司同意以代價12.93億元，相當於每股5.18元，悉數出售所持約2.5億股利福地產股份予內房企業福州三盛投資公司創始人及總裁林榮濱，相當於已發行股份59.56%，林氏按例以同等作價提出全面收購餘下股份之要約。每股要約價5.18元較停牌前收市價4.95元溢價約4.65%。
好多人以為今次作價唔平，賣60%股票已經要用13億錢，遠超一般6-7億的殼價。但其實只要計番數，今次賣殼同市場殼價差唔多。利福地產本身係地產股，除左有實業，有一定業務價值，而最重要的係公司本身擁有大量資產。從財務報表可以睇到利福地產淨資產都有近15億，所以今次作價其實符合殼價。
12.93億/ 60% – 15億 = 6.55億。
6.55億Exactly就係而家主板殼價的價錢，所以今次劉鑾鴻其實冇特別賣貴左。順帶一提，利福地產係由利福國際(01212)於2013年9月分拆出來的股票。而過去由子公司賣殼的例子也相當多，盈信分拆出來的怡益(1372)、金誠(1462)；民生國際(938)分拆出來的民生珠寶(1466)，全部也走上賣殼之路，可見分拆上市的股份，仍有一定吸引程度。