ZKIZ Archives


紅底賓架同學會

2014-01-02  NM
 
 

 

上星期有傳聞話,689想用史美倫頂替即將滿約嘅「攞命陳」,掌管金融管理局。689想喺金管局插旗,已經係公開嘅秘密,唔係就唔會一上台就全力「打造」金發局呢個金融怪胎嚟拑制金管局。

而由史美倫主理嘅金發局,眾所周知,背景十分根正苗紅,但估唔到成員其中四人,均來自一個叫香港中國金融協會嘅機構。呢四個成員包括史美倫、光大控股(165)行政總裁陳爽,招商局集團前主席秦曉及中銀國際英國保誠資產管理董事長謝湧海。此協會源自「中國高等院校香港校友會聯合會」,只要曾喺內地讀過書或做過嘢,喺金融行業搵食,獲主席團推薦,交埋一千蚊會費,就可做創會會員。 呀,咁就做會員?會唔會濫咗啲!689係呢個同學會嘅首席名譽贊助人,即「金主」。當年公布參選特首後,689第一場競選演說亦喺呢個同學會舉行。今年十一月,金發局發表首批研究報告,呢個中國同學會即日發稿表示歡迎。呢個紅底賓架同學會,玩玩吓竟變咗金發局「雛形」。一群紅底賓架加上一個思歪689,絕對有能力令香港變成無掩雞籠,大家要識睇路噃!

富貴教會掃9伙維景

當個個掛住留意新樓市場時,就有教會喺二手市場靜靜雞大手入貨,一個月內花達一億零八百萬,豪掃十九伙將軍澳維景灣畔。翻查土地註冊處資料,大手入貨嘅係守望台聖經書社(Watch Tower Bible and Tract Society of Pennsylvania),係一個總部設喺美國紐約市布魯克林嘅基督教團體。根據網頁顯示,守望台聖經書社喺世界各地都設有支部,香港嘅就喺觀塘鴻圖道。連同買家印花稅(BSD)及雙倍印花稅(DSD)計算,估計呢個富貴教會買樓使咗一億三千萬。 據區內代理透露,估計呢批以兩房為主嘅單位唔係由單一業主放售,亦都未見該批單位喺放租市場出現,估計係教會作員工宿舍用途;似乎教會之財力,不可小覷。

橋唔怕舊之II

三個月前太子鉅龍酒家嘅老闆吳伯恩(恩記),收到隻玳瑁,即刻打去報館報料,引來全城哄動,仲上埋報紙頭版。上咗報幾日,鉅龍日日有人圍觀,生意因為咁仲多到爆添!最近恩記同小宗講,諗住喺過年前,同報館合作,送出三十個龍躉盆菜俾老人家,希望個個有魚有肉。個盆菜有龍躉、瑤柱等,每個值二千多元;不過相對成本,宣傳效果之大,可謂一舉兩得!本身喺長沙灣賣魚嘅恩記,一向 多「搶鏡」招數;有「龍躉大王」之稱嘅佢,早年不斷放生巨型龍躉做善事,佢亦由賣龍躉變全港最大海鮮批發商、再喺太子開酒樓,上環開分店,最近仲以三千萬元購入太子兩個鋪面,開多一間!正所謂「橋唔怕舊,最緊要受」,抵佢發!

石獅保平安

上兩期小宗同大家玩遊戲,數吓中環一共有幾多隻吉祥獸。唔數猶自可,數落先發覺中環吉祥獸勁多花款。上星期,小宗就介紹咗喺盤谷銀行門口嘅迦樓羅,今期就介紹吓畢打行同華人行門口嘅兩對吉祥獸;兩座大廈都唔係銀行,但一樣放神獸。雖然佢哋嘅形態唔同,不過原來都係獅子嚟。風水師吳佩孚師傅話:「呢啲石獅都係用嚟鎮煞,擋住門外馬路而來嘅煞氣,保人平安。」

壹計就明:有前無後小心撻親

本欄找來有二十多年經驗的資深會計師林智遠及鄔碩晉,每期踢爆一間上市公司的會計陷阱,股民入市前睇清睇楚,一計就明。

生產電子產品的愛高 (328),近日發布了中期業績。半年營業額上升9.3%至10.7億(港元、下同),業績卻如去年一樣錄得虧損,兼蝕多至3,500萬,每股虧損6.1仙。可是管理層仍表現出信心,向股東派發每股3仙的中期息。實際上,愛高去年的全年業績,最終錄得5,800萬盈利,每股盈利達10.1仙,中期虧損也許屬季節性現象。若細閱這年度的營運及流動資產數據,倒會感受愛高面對相當嚴峻的境況。首先是毛利率由8.7%減少至4.6%,即下跌4.1個百分點,幾近一半。營業額上升的9.3%,盈利並無增加,也反映市場競爭相當激烈。愛高爭取市場佔有率的同時,其流動資產的質素,似乎更令人擔心。在短短的六個月,愛高的應收貿易賬款由4.9億上升至7.9億,存貨更是由3.2億上升至7.5億。兩個項目共積壓15.4億的資金,比半年的營業額10.7億還要高。以周轉期看,應收貿易賬款是135天,存貨是134天,回收速度並不快,營運現金淨流出5.5億,比虧損金額高出很多。去年同期,愛高的應收貿易賬款周轉期是136天,存貨是97天,營運現金淨流出4400萬。比對兩個年度財務數據,便明白單看損益表的虧損金額並不夠全面。存貨周轉期急劇上升,其實是很大的啟示。就電子行業而言,產品周期短,風險便更高。過高的存貨水平,容易帶來減值的需要,直接影響盈利水平。現代的財務管理,主要是流動資產的管理。管理層過分自信,準備過多毛利率不高的存貨,往往是危多於機。

紅底 底賓 賓架 同學會 同學
PermaLink: https://articles.zkiz.com/?id=86993

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019