ZKIZ Archives


經濟客艙 :老千術是如何煉成

1 : GS(14)@2016-03-08 00:07:02

遇上老千股,最慘就係輸身家,但遇上政壇老千,輸贏已非個人嘅事,可能眾人利益會一鋪清袋。投資路上流流長,總有機會遇上老千股。故勿論財技點樣玩,最終目的只有一個,利益歸於大股東。政壇老千亦同樣得人驚,利用各種方法爭取民眾支持。特朗普為共和黨總統參選人大熱門,但近日瞬間變成眾矢之的。連日嚟多位美國億萬富豪接力炮轟特朗普。惠普行政總裁惠特曼話特朗普不配做美國總統;大鱷索羅斯前愛將、基金大佬Stanley Druckenmiller亦批評特朗普,話佢講中國操縱貨幣滙率嘅睇法膚淺。特朗普提出向中國提高關稅;美國同墨西哥邊境起圍牆等等,統統凸顯美國獨大單邊主義,政治立場屬極端偏鋒,好難說服大家有能力搞好美國經濟,難怪有人提議係時候吸納黃金。睇番特朗普掌舵酒店度假村Trump Hotels& Resort嘅表現,1995至2005年期間,年年蝕超過6億美元。公司股價累跌85%,相比美高梅期內累升4倍。不過,特朗普用「自己嘅方式」爭取最大利益,年年有花紅落袋,仲以「服務協議」形式額外支薪,9年穩袋三千幾萬美元。
Captain Cool本欄逢周一刊出





來源: http://hk.apple.nextmedia.com/financeestate/art/20160307/19519003
經濟 客艙 老千 術是 如何 煉成
PermaLink: https://articles.zkiz.com/?id=297116

經濟客艙:黎明廣告教你經濟學

1 : GS(14)@2016-05-19 02:21:39

睇完黎明最新咖啡廣告唔係得啖笑,可能係現實嘅寫照。廣告中嘅阿明或者講中咗打工仔嘅心聲。廣告最深刻係老闆應承阿明加人工:「嗱,每月加你一百蚊,得閒就買多幾包咖啡請同事飲,淨番嘅錢儲起嚟買樓啦。」對的,一生攤開來計每月儲幾十蚊做儲首期冇話唔得,有志者事竟成呀嘛。過去一個星期,經濟淡風消息撲面而來,呢邊廂中國經濟L型增長,另邊廂香港首季經濟增長跌0.8%,為4年最差。私人消費開支今年首季僅升2.3%,為2009年以來增幅最少。消費品分類計,首季耐用品跌幅更達22.5%,比2009年跌8.8%誇張;非耐用品跌幅亦達4.9%。以經濟統計學定義,耐用品即是買入後毋須急於再添置,例如車同雪櫃。但留意耐用品消費跌或跟收入減少有關,形成延後消費。我相信最新數據講揭示香港人已經勒緊荷包唔願買,使錢冇咁爽手。呢個現象出現,唔理乜L型經濟,都屬唔好兆頭。商戶唔使再搵自由行訪港人數跌或佔中等做藉口,香港需要刺激本地人消費意欲,需要更多使錢L。首季本地居民境外消費開支升11.3%,仲要係2014年第2季最勁,即係本地有得買都唔買,有錢有假去個旅行先捨得buy。
Captain Cool本欄逢周一刊出





來源: http://hk.apple.nextmedia.com/financeestate/art/20160516/19613426
經濟 客艙 黎明 廣告 教你 經濟學
PermaLink: https://articles.zkiz.com/?id=300221

經濟客艙:美股越升越大鑊

1 : GS(14)@2016-08-16 04:53:35

農曆七月十四快到,但我哋身處嘅年代更加詭異。大家得到嘅知識同科技比從前多,面對危機就越來越難掌握。如果金融危機係人為事件,咁危機背後係由一班堪稱轉數快、讀書多嘅精英造成,夠晒荒謬。八年過後,大家對潛在危機警覺係提升抑或視而不見。睇番美股先,三大指數上星期四17年來首次齊破頂。見到今次股市越升,越膽戰心驚。標普500指數淨長倉合約增加到2.88萬份,俗稱VIX恐慌指數嘅淨短倉合約更錄得紀錄高位11.4萬份,睇落大戶都睇好行情,繼續賭美股升。與此同時,大戶亦賭金價升,黃金淨長倉合約升到32.6萬份,亦接近紀錄高位。如果大家對經濟前景有十足信心,過去一個月英、澳、紐央行齊齊減息四分一厘。如果話最難捱嘅時間已經過去,恐怕只係對危機視而不見,始終相信最差的尚未來臨。央行放水行動已達到覆水難收嘅程度;游資太多,資金出路唔知去邊好,為追逐回報乜都博。英、德、日等10年國債孳息率已經少過1厘,德國同日本債息更跌至負數,反映債市泡沫風險。相比之下,美國債息仍有1.5厘水平,回報仍算吸引。雖然美國經濟數據表現參差,但緊隨11月美國舉行大選,所以唔可以完全排除美國加息嘅可能,利率轉向對股滙債市影響唔可以睇小。有大行估希拉莉入主白宮,大家做好準備儲局加息。而特朗普成功獲選美國總統先可能減息,為佢主張保護貿易主義對經濟衝擊打底,曲線踩咗腳,好波。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20160815/19736011
經濟 客艙 美股 股越 越升 升越 越大 大鑊
PermaLink: https://articles.zkiz.com/?id=305900

經濟客艙:不買iPhone 7的理由

1 : GS(14)@2016-09-06 04:40:14

智能手機市場日益飽和,蘋果公司最大艱鉅任務就係如何突破iPhone銷售。蘋果公司嘅新iPhone今個星期三香港凌晨時間將現真身,呢部機係iPhone面世10周年前嘅手機,如果要買,寧願再等等。上星期對手三星Note7電池出事,為iPhone7造就搶客嘅機會。蘋果公司今次出新機策略玩法已經唔係靠新功能博取用家歡心。用家最關心嘅未必同對上幾部iPhone一樣,睇吓屏幕幾大、容量幾多或者鏡頭像素有幾勁,因為唔止對手,連普通千幾蚊嘅廉價智能手機都已經追到上述要求。睇到有個調查話,網絡最多人搜尋嘅關鍵詞係「iPhone7」,第二位係「iPhone7顏色」。市場已經估計iPhone7重推黑色外,仲有全新嘅藍色。呢項幾乎同功能無關嘅新亮點,就最多人關心。呢兩隻新色唔同玫瑰金,吸納客戶層面應該更廣。估計蘋果公司開始接受新機預訂,黑色同藍色嘅iPhone7最搶手,未知會唔會刺激起沉寂咗嘅iPhone炒風。
iPhone7有新色外,市傳仲有雙鏡頭同A10晶片,但明年係iPhone面世10周年,相信最強嘅賣點都係留番下一代iPhone先出擊。有閒錢不如買蘋果公司股票好過。蘋果公司嘅市盈率只係12倍,相比facebook60倍市盈率、Netflix304倍市盈率低好多。另外,庫克年初都講過每年提高派息,仲有大把現金做股份回購。蘋果公司連計股息嘅回報率有2.1%,追到標普500指數年內2%回報。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20160905/19759888
經濟 客艙 不買 iPhone 理由
PermaLink: https://articles.zkiz.com/?id=307604

經濟客艙:老公買樓唔落老婆名

1 : GS(14)@2016-11-08 05:51:10

原來我哋都係《失戀急讓》嘅地產經紀項少龍,真愛只係吹水,喺香港冇個過千呎單位,真愛真係可以有情飲水飽咩?至少我條女話我知唔係。你話結錯婚大鑊,定買錯樓事大?其實兩樣嘢都係一世嘅。結錯婚,隔籬嗰個最後未必同你一齊;但買錯樓,條數跟足你一世。星期六凌晨,政府提高買賣住宅物業印花稅劃一15%,想換樓嘅香港中產俾新稅制挾死,更加上唔到車。我個名畀咗阿媽去買樓,佢好得戚話,「好彩快一步買咗,如果唔係想多層樓收租退休,要畀多15%印花稅,罰畀政府」。而繼續同屋企人住嘅我,可見嘅將來都唔再諗咩買樓。喺香港買個400萬嘅單位,新稅項下要畀60萬銀,較舊稅18萬多咗足足42萬,哪有錢?身邊有搵到第一桶金嘅朋友,都為換樓頭痕。「家陣畀雙倍印花稅鎖死啲錢,又要等半年後舊屋賣走先可以退稅;買新樓又唔可以同銀行貸款借足七、八成按揭,點換樓?」講笑話,人哋大陸假離婚避限購,可能家陣香港結婚,老公大條道理唔落老婆名,第時換樓可以慳番筆。結婚、買樓換樓同樣要講timing。不過,政府出招令我哋唔知道幾時先係入市良機。聽英國嘅朋友講,英國樓價同樣被炒起,仲要係俾香港同中國嘅資金炒起,大家寧願租樓住。不過,呢個英國朋友話,香港政府向樓市加辣,睇吓撐到幾耐。佢仲話梁特首想用調控樓市為連任增加籌碼,一定唔work。英國喺今年4月1日都有為樓市加辣,本地或海外買家購入第二個物業,要畀額外3%印花稅。不過,新稅項出台7個月,令英國民怨四起,要求撤走辣招。記得當時有香港買家「趕尾班」喺英國買樓,就好似香港咁,內地人新稅下繼續買。人仔繼續貶值,佢哋走資嘅信念,比我哋香港人要買自住樓更堅定,非本地買家新稅率加至30%都趕唔走。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20161107/19824929
經濟 客艙 老公 買樓 樓唔 唔落 老婆
PermaLink: https://articles.zkiz.com/?id=314538

經濟客艙:香港包租公幾惡做

1 : GS(14)@2016-11-22 00:22:41

「9,000萬,一億有找,買到個又旺又正嘅舖位,真係可以一舖養三代」。樓市加辣,有錢買嘅繼續買,但都有人轉去炒車位。至於舖位係咪有得炒,結論係「想炒起很難」。上網睇到一個標價9,000萬元嘅舖位,同屯門西鐵站毗鄰,又近大型屋苑,有地利又有人流。不過,今時今日喺香港大圍環境,即使你再有錢,未足以畀你做包租公。過去一、兩年,藥房、金舖、中高檔嘅服裝品牌到連鎖書店等,承租力較強嘅較大型嘅商戶都「敗走」,提早解除租約,相比天價租舖嘅境況簡直「天與地」。睇番四年前開放自由行,人仔兌港紙仲係「8算」,零售業唔憂冇生意做。大商戶唔怕你貴租,中環、銅鑼灣同尖沙嘴等旺區幾貴都霸咗間舖,反正人流旺,生意長做長有。開心嘅時間過得特別快,人仔貶值,又冇咗內地自由行嘅大靠山,過去幾年頂得住貴租嘅外國品牌,過咗三、四年以「貴租」為由撤出,而家中環同銅鑼灣「旺招租」嘅吉舖唔難搵。呢個時勢買舖收租風險唔細,守業比以往更加難,所謂嘅「一舖養三代」財富光環,喺香港已經黯淡無光。喺大家消費勒緊褲頭,人人手機上網消費嘅年代,小資經營手作仔店都係冇乜生存空間,亦係最捱唔住貴租嘅一群。連鎖咖啡店喺逆市下亦生存到,又或者係醫療相關服務業仍要實體舖經營,唔通大家有咩病痛,又㩒個Apps就搞得掂咩?
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20161121/19840247
經濟 客艙 香港 包租 公幾 幾惡 惡做
PermaLink: https://articles.zkiz.com/?id=316490

經濟客艙:中六合彩都唔夠退休

1 : GS(14)@2016-11-29 00:08:28

每個人生嘅一生總會遇上嘅發達機會,亦好有可能擦身而過。好似星期六攪出1、2、3、4、7、10嘅細冧把組合,特別號碼為33。「呢個組合早幾期成日買,偏偏今期買錯」。頭獎23.5注中,每注派彩281幾萬蚊。即使你有億萬份之一嘅中獎機會,中頭獎又點,好可惜喺香港都係買唔到樓,就連退休都未必夠。現實世界就係咁唔公平,99%平凡人為全球最富貴嘅1%富戶埋單。唔知幾時起,衣、食、住、行四種生活基本需要,「住」喺香港難以負擔,中咗六合彩都未必買得起層樓,甚至首期都唔夠畀,生活唔容易。立法會嘅研究簡報顯示,香港家庭面對嘅財務挑戰越來越大,住戶每月開支係兩萬七,比十年前升近一半。住屋支出成為最大負擔,香港嘅樓價同租金過去十年升超過兩倍及一倍。靠借貸過日子嘅家庭亦增加,住戶非按揭債務近20萬銀,係10年前嘅2.6倍。至於剛剛晉身勞工市場嘅新世代,14K月薪足夠養到自己,未必有能力供養父母,根本冇錢淨。如果阿爸阿媽未退休,呢批「窮忙族」仲有空間唞唞氣。但父母已經退休嘅話,就唔可以低估高樓價同通脹嘅蠶食財富私嘅威力。另一個調查發現八成嘅香港人低估退休後嘅開支一半,每月生活開支萬二蚊,比統計處每月開支兩萬二千蚊少近一半,當中超過兩成人依靠強積金退休。現實生活唔只令普通人上車難,就連想過安穩退休生活亦變得好奢侈。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20161128/19847542
經濟 客艙 六合彩 六合 都唔 唔夠 退休
PermaLink: https://articles.zkiz.com/?id=317343

經濟客艙:劏房造就隱形窮人

1 : GS(14)@2016-12-06 03:54:48

128呎劏房單位嘅出現,發展商為香港人介定咗全新生活空間。瘋狂樓市下,發展商鑽盡空間賺錢,由小業主賣單。呢批畸形樓盤,兩、三年後點樣喺二手市場賣得出,邊個會理?樓價升到離晒地嘅問題,並非香港獨有。加拿大樓市同樣癲升,多倫多獨立屋嘅業主同樣創意滿分,把獨立屋劏出數戶,一房七、八戶。捱唔到貴租,惟有選擇租住地庫亦得。高樓價下,經濟只有龜速前行,生活成本不斷上漲,衍生一批嘅隱形窮人。樓價繼續升,家庭平均收入亦有10萬加元,好難聯想到同貧窮有咩關係。但喺2002年至2012年嘅12年期間,家庭戶申領食物救濟嘅人數不斷升超過六成。當中低收入人士同新移民申請佔大多數,但越來越多有樓一族嘅住房亦加入申領食物救濟。入屋打劫,分分都冇嘢可以偷,因為最值錢嘅可能就係間屋。佢哋嘅狀況,同香港樓奴差唔多,為供樓已佔去生活近四成開支,其他生活成本上升嘅時候,生活實在要咬緊牙關。香港不只係劏房之城,亦慢慢步向外國嘅monster home嘅發展。樓價乾升,望落貌似欣欣向榮,其實業主心裏苦,但業主不說。與其向發展商追究,不如問吓把關嘅房屋規劃,點解仲可以容許發展商任意推出納米單位;房屋空間發展究竟係以人為本,定錢字當頭?
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20161205/19855039
經濟 客艙 造就 隱形 窮人
PermaLink: https://articles.zkiz.com/?id=318301

經濟客艙:中國人乜都炒輸

1 : GS(14)@2017-01-09 08:10:02

今年開局Bitcoin投機泡沫明顯,人民幣計價嘅Bitcoin短短4日,由2,000蚊人仔炒高到8,000蚊樓上。中國人乜都炒嘅作風,凸顯人仔貶值及走資不可抗力嘅因素下,點都博一博。由人仔反彈起,Bitcoin兌人民幣價格一瀉如注,兩日累跌近三成,更一度失守6,000元人民幣。Bitcoin嘅美元計價亦重拾升勢,過去一年由450美元水平,衝破1,000美元大關,升幅跑贏股、滙、債。如果睇Bitcoin美元價格同現貨金價比較,2015年3月,每一盎斯黃金等值4枚Bitcoin。今年Bitcoin炒到飛起,每盎斯黃金等值1.2枚Bitcoin。不過,說Bitcoin回報跑贏其他貨幣,可能只係美麗誤會。Bitcoin冇政府或金融機構背後支持,過去兩三年最多只喺個別國家逐步獲認可為另行支付方式,暫時仍未有國家將Bitcoin納入為正式貨幣。其次係,有Bitcoin業界認為今次中國炒起Bitcoin,部份屬於程式交易,谷大交易量同交易金額,左手交右手。最近有內地調查都話,八成買Bitcoin嘅人只係短線炒作,希望靠差價賺錢;長揸嘅人佔兩成。內地網站仲有個視頻,街訪十幾位民眾,結果得兩、三位答得出Bitcoin係乜。今輪Bitcoin炒風,人行都出手約見包括火幣網、OKCoin同BTC中國嘅負責人傾傾,禁絕民眾螞蟻搬家方式將人仔兌美金。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20170109/19890498
經濟 客艙 中國人 中國 乜都 都炒 炒輸
PermaLink: https://articles.zkiz.com/?id=321998

經濟客艙:要上車定要自由?

1 : GS(14)@2017-01-17 01:54:06

有位慈父話:「唔買樓一日咁hea……早啲唔hea幸福就係自己。」作為冇能力買樓嘅「Generation Rent」嘅我,就反思究竟每日係咪hea住咁過。的確喺香港呢個小城市,大人教你成功嘅定義,多過同你講點先跌得好睇,即係大學畢業、讀Master、買樓買車、嫁個有錢人等等,人生才功德圓滿。多數爸爸媽媽望子成龍、望女成鳳,多過想睇住佢哋「褲穿窿」,日日搵錢去還loan。喺好多千禧BB未出世前,80年代初香港教育制度曾經出現過「中三淘汰試」。講呢個考試制度,中三後有同學仔分分鐘冇書讀。但喺學位量寬下,即使爭唔到第一,都有大量職訓或者其他進修出路。諗諗吓千禧世代經常俾人話好hea,講真係時代嘅錯。同玩啤牌一樣,拎到一手好牌實贏,但?家嘅新世代抽到只係一副爛牌。喺薪酬跑輸通脹同樓價增長下,即使慈父講笑都好,但講得好中,「買樓要識投胎」。如果沒有了富爸爸、富媽媽,買樓,可能要等一世。所以,選擇咗同阿爸阿媽買樓嘅Generation Rent,係就係唔hea,但未必幸福就係自己,反而係俾層樓困死。你自己都有數得計,又唔係「堅離地」嘅中產,每月未賺夠兩萬蚊,但出糧後就進貢一半畀阿爸阿媽供樓。如果孝順點每月畀多四千蚊家用,扣扣減減食飯搭車,餐搵餐餐清。講到尾邊個世代都好,人生都係一條選擇題,唔買樓可以拎筆錢到處暢遊,換來人生不可替代嘅自由。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20170116/19897947
經濟 客艙 上車 定要 自由
PermaLink: https://articles.zkiz.com/?id=322766

經濟客艙:給我繼續做因航空姐的理由

1 : GS(14)@2017-03-22 00:30:37

離地三萬八千呎高空,有位做空姐嘅朋友話,每次一飛,總有令你意想唔到嘅事情發生。我係Joey,喺local一間航空公司做咗差唔多五年,叫做到一個小小Purser。同啲friend出嚟飲嘢講起,朋友成日以為好勁,其實寶寶返工心裏有苦,但寶寶不說。空姐、空少咪又係一個臃腫架構、公司食物鏈嘅最低層一份子。公司最近業績話蝕足5億幾,唔怪得噚日飛台北嗰陣,班妹豬拎住部手機喺度呻,「公司對沖油價睇錯邊、蝕咗錢,唔係要郁我哋呀嘛。家陣班班機都full load,真係生多對手都做唔掂喎」。所以話,做空姐係可以鍛煉EQ嘅行業。其實呢幾年飛東南亞短途,招呼大陸客多過香港人,遇到嘅無理要求,再唔係要杯麵要食雪糕要飲sugar-free嘅梳打水,認真係估你唔到:「小姐,請問航班上除了坐廁,還有蹲廁嗎?」「小姐,我不見了東西。」(閣下遺失了甚麼呢?)「我的女友不見了,可以給我你的聯繫方式嗎?」點解好地地一間香港人曾經幾proud of嘅航空公司,變成日日俾人洗板同鬧爆。我諗做crew嘅,都希望機上多番啲香港人,唔係內地大媽大叔。我哋都好想serve番熟識嘅臉孔,好掛住有人用港式英文問你拎入境紙,或者問你有冇WiFi密碼(by the way,香港人手機冇WiFi上少陣網真係會死)。香港客出名格價精明,飛短途都同其他廉航相差近千蚊嘅話,自然對我哋嘅服務期望提高,唔會好似搭廉航咁,只求唔好delay。與其削花紅,廉航平飛搶客,不如諗諗cut走特級經濟客艙,減少番機票定價仲低過成本嘅問題。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20170320/19963797
經濟 客艙 給我 繼續 做因 航空 姐的 理由
PermaLink: https://articles.zkiz.com/?id=328056

經濟客艙:一個跑數RM的自白

1 : GS(14)@2017-04-04 08:58:29

同好多本地八十後一樣,大學畢業遇到金融海嘯,有間本地龍頭銀行畀咗offer,就係咁,喺香港嘅銀行業撈咗好幾個年頭至今,唉!上星期六,正式見女友阿寶寶嘅屋企人,食餐家常便飯,阿伯友問我喺銀行做乜,「Auntie,做RM嘅……」都知道呢個答案講佢唔明,「係分行客戶經理」,「哦……聽講你間行炒人喎,係咪好辛苦??家搵你哋買樓做樓按,仲有冇優惠利率?」好彩阿寶寶幫口,「佢係做公司客嘅」。聽到阿伯友「哦哦哦」三聲後,內心好想講句「冇錯!我都係一個跑數嘅sale屎!」曾經做銀行工係有份優越感,經過歲月嘅洗禮,呢份感覺都唔知幾時消失咗。每日帶住「矛盾」去返工,以為日日出街見客食好西,實情係見客聽老闆或者FO吹水講到自己間公司有幾巴閉。返到位,就俾阿頭捽到天昏地暗,搵到嘅客係咪咁掂。跑到數又如何?假如過唔到compliance,仲慘過要輸錢,連份工都冇。身邊唔少同事,可能中途已經起身走,但捱得過嘅,好阿Q精神同自己經驗係自己。雖然今時今日喺香港打份銀行工,不再跟「穩定」兩個字掛鈎,但起碼背靠祖國嘅香港,相比起其他地方還好,有13億人口市場嘅潛力,香港仍然具有中國同國際市場聯繫人嘅角色,萬一外資大行真係冇得做,總算有中資大行繼續撈。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20170403/19978327
經濟 客艙 一個 跑數 RM 自白
PermaLink: https://articles.zkiz.com/?id=329114

經濟客艙:買新界上車盤輸在起跑線

1 : GS(14)@2017-04-10 23:35:01

人生最難堪嘅moment,係想買層樓,但發覺無論儲錢儲幾耐都係唔夠畀首期。喺扭曲樓市掙扎求存嘅港人,不足500呎嘅上車盤,無論九龍或新界入場費隨時過千萬。就好似大陸近排好興咁講,讀完北大清華又如何?畢業後依舊買唔起北京學區房。香港嘅大學畢業生,拎得萬零蚊月薪,連北角維港頌一呎都負擔唔起。樓市扭曲,似乎打破咗「港島樓一定貴」嘅定律。無論係北角維港頌抑或係荃灣柏傲灣,兩個新盤呎價成兩萬三蚊,首期都要四百幾萬。住港島或住新界,買咗樓,未必代表攀上社會財富嘅楷梯。有報道話,月入三萬嘅香港家庭,扣除小朋友、生活同雜費開支,約每月剩低三、四千蚊。如果需要供養父母,家用都未必夠畀。不過,如果每日要去中環、灣仔或者尖沙嘴嘅打工仔,北角上車盤似乎着數多啲啲。特別正值搏殺期,一小時生活圈令打工仔可以每日偷回時間,極速恢復精神再返工,呢點同住新界地區無法相比。例如每日OT到八、九點後收工,返到屋企仲可以食個飯,或者去跑吓步甚至睇齣戲再進修都得,但住偏遠地點就要用多兩粒鐘搭車,一年365日計,又浪費咗700幾粒鐘,相對嚟講每日出門口已經輸在起跑線,付出更加多喎。
Captain Cool
https://www.facebook.com/seeforcaptain/本欄逢周一刊出




來源: http://hk.apple.nextmedia.com/financeestate/art/20170410/19985308
經濟 客艙 新界 上車 盤輸 輸在 起跑線 起跑
PermaLink: https://articles.zkiz.com/?id=329921

經濟客艙:租樓港男跟唔過?

1 : GS(14)@2017-06-10 12:21:48

作為阿詩詩嘅好姊妹,佢同阿Fred一起,我哋深表同情。人哋拍拖嘅野,旁人從來不得插咀多事幹,但阿詩嘅經歷,值得各路姊妹借鏡,就係對住租樓嘅港男,認真便是輸。不是想一竹竿打成船人,而係跟住租樓嘅阿Fred,阿詩詩未必可以好似電視劇咁齊齊天台圍埋燒野食,有個Happy ending。聽講阿Fred跟阿詩詩喺西貢租間屋仔同居,月租約兩萬蚊。熱戀中嘅情侶一齊住,倆人想見多幾面有幾奇。剛開始時梗係甜蜜蜜,但一段時間過後,阿詩詩唔只要呢700幾呎嘅空間,而想要阿Fred嘅承諾──「結婚」。阿詩詩亦懂得測試水溫:「其實幫人供樓,不如自己買返間,搵日去睇吓樓。」阿Fred:「你鍾意啦,冇所謂。」阿Fred同阿詩詩新盤示範單位又去吓,同區嘅二手樓盤又望吓,但事隔兩個月後,阿Fred突然發過Whatsapp,同阿詩詩講想分開冷靜一下。呢個Whatsapp幾乎把阿詩詩由天堂打落地獄,我哋都好擔心戀愛大過天嘅阿詩詩會唔會出事,好在冇,或者有都唔想同我哋班姊妹講啦。阿詩詩唔駛唔明解,男人一句嘅「冇所謂」已經係答案。無啦啦叫個租樓嘅人去買樓,心目中理想嘅單位,可能相比各位恨上車嘅姊妹要求高100倍。假如我做經紀,遇到一個恨買樓嘅客,搵到佢心目中嘅筍盤就可以開單。不過,對住冇所謂、是是旦旦嘅客,佢心目中理想嘅單位,從來冇特定標準。又或者,根本佢從都冇上車嘅衝動,身邊亦冇出現過令佢想長住嘅筍盤。
Captain Cool
https://www.facebook.com/seeforcaptain/本欄逢周一刊出



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/financeestate/art/20170605/20044500
經濟 客艙 租樓 樓港 港男 男跟 跟唔 唔過
PermaLink: https://articles.zkiz.com/?id=334560

經濟客艙:傾刁食早餐

1 : GS(14)@2017-06-23 01:35:06

男人有時候買嘢係唔講理由,而有錢男人買嘢更加唔需要理由。做刁,好多時候重大嘅決定,係喺辦公室以外進行。大家約埋食餐飯,或者更容易了解今次交手嘅為人,又可以緩和氣氛。聽過一個故事,有日B先生約咗賣方R先生食早餐傾刁。B先生點了一份豐富嘅早餐,有地中海墨魚配薯仔同煙肉外,仲有一隻poached egg,即係我哋叫開嘅溫泉蛋。大家東拉西扯一輪後,喺時候入戲肉。
R先生:「點解你有興趣收購我哋公司?」
B先生皺起眉頭,然後佢咁答:「你間公司,就係我呢份早餐嘅墨魚。就好似頭先我睇menu嘅時候,見到早餐有墨魚,我睇唔透喎,而且又未試過。所以,識食,一定食墨魚早餐。」
R先生聽完,幾乎想將佢飲緊嘅個杯咖啡噴出嚟。最後,早餐食完,單刁等咗兩年,B先生扑鎚收購R先生間公司。上述兩位字母先生,你知我知人人知,就係亞馬遜創辦人貝索斯,同美國網購商Woot嘅創辦人Matt Rutledge。7年前亞馬遜用1.1億美金現金全購Woot,呢個網站將美國嘅一仙拍賣發揚光大,每日喺網站放售一款特定嘅產品,以超筍價畀大家開價鬥搶。Woot唔會講定賣咩嘢,落單嘅時間又只限24小時,睇準晒大家鐘意執平貨嘅心態。最後唔只吸引大家用,連貝索斯都肯落疊。貝索斯最近又買嘢,有冇同Whole Foods Market食早餐就未知,但今次亞馬遜就認真和味,股價又洗洗科網股頹氣。亞馬遜上星期五最升近4%,差兩個半毫美仙,就可以重返1000美元,單日市值有成900幾億美金進賬。由網上書店起家嘅亞馬遜,今日的我打倒昨日的我,將網購同實體超市雜貨店結合,將會開闢全新嘅收入來源。原來有錢男人買嘢唔係唔需要有理由,一個字,賺到錢就夠。
Captain Cool
https://www.facebook.com/seeforcaptain/本欄逢周一刊出



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/financeestate/art/20170619/20060685
經濟 客艙 傾刁 刁食 早餐
PermaLink: https://articles.zkiz.com/?id=336429

經濟客艙:追買呢隻倍升股唔抵

1 : GS(14)@2017-07-05 03:48:12

未來十年,相信經常聽到的名字就是馬斯克(Elon Musk),一個要征服太空嘅創業家,連saving哥都要封馬斯克為偶像。短短七年間,Tesla由IPO每股17美元倍升至361美元,名符其實係一隻廿倍股,市值由2億幾美元增至近600億美元。今年首半年升幅亦非常「靚仔」,累計升近七成,大幅跑贏大市外,「升得快到唔見車尾燈」。香港今年4月起,政府取消電動私家車「豁免首次登記稅」措施,想買架Model S P100D嘅基本車價過百萬港紙,連稅後埋單計兩球。要車主畀多90幾萬嘅稅款,好貴喎。若果用360幾蚊美元買Tesla,跟馬斯克追吓「改變世界」嘅憧憬,計落唔抵。
Tesla市值逼近600億美元,市值計超越美國福特車廠同通用汽車。若以汽車產量計,追上美國呢兩間車廠仍有段距離。Tesla上年出產量7.6萬架,福特同通用汽車上年出產量分別有250幾萬、300幾萬架車。上車價3.5萬美元嘅Model3,估計短期好難扭轉公司「賣一架蝕一架」嘅局面。新車定價又平咗,俗到銷量,未必維持到近20%嘅毛利率。
Captain Cool
https://www.facebook.com/seeforcaptain/本欄逢周一刊出



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/financeestate/art/20170703/20077039
經濟 客艙 追買 買呢 呢隻 隻倍 倍升 升股 股唔 唔抵
PermaLink: https://articles.zkiz.com/?id=337977

經濟客艙:宅男變上市公司CEO

1 : GS(14)@2017-09-17 12:15:48

「人人都拍片搵錢,唔通人人拍片都搵到錢咩?」由You Tuber做到上市,終於由日本人做到了。想成為Youtuber很容易,但要成為一位擁有數以百萬計嘅訂閱者,並非人人做得到。UUUM成立只有四年時間,主力發掘同培育You Tuber,靠網絡平台廣告收入賺錢。公司共同創辦人HIKAKIN本身都係You Tuber,28歲嘅HIKAKIN有4條Channel,訂閱人數合計900萬人。不過,我對公司另一位創辦人較感興趣,他就是鎌田和樹。33歲鎌田和樹當年考不上大學,19歲加入社會大學,做過電訊商門市嘅店長,直至遇上HIKAKIN才真正踏上致富之路。面對鏡頭嘅鎌田和樹,沒有HIKAKIN喺鏡頭面前嘅佻皮,但幽默感都唔輸畀HIKAKIN。被問到鎌田和樹憑乜嘢年薪過4,000萬日圓,較其他日本創投行政總裁平均年薪1,500萬日圓至3,500萬日圓,佢咁答:「幾合理呀,呢份係應得嘅報酬。如果將我份人工同爆紅嘅You Tuber相比,佢哋年薪隨時過億YEN喎。」鎌田和樹由普通打工仔,做到市值300幾億日圓(約23.5億港元)嘅創業板上市公司行政總裁兼董事,過程相比做一個當紅嘅YouTuber更勵志。佢4年前創辦UUUM,公司2個人到74人,由東京office仔搬到六本木丘森大樓嘅34樓,點都緊要唔過公司搵到點樣由做短片轉化成為盈利。隔住個芒睇日本「超級女大胃王」木下優香喪食好變態?公司由2014年起,收入逐年穩步擴張。短短4年,收入由1.64億日圓擴大到70億日圓。話時話,日本嘅創板新股同香港創板新股掛牌後走勢又幾似呢。UUUM首日掛牌衝高到6,800日圓,較招股價2,050日圓高出兩倍幾。上市第三日由高位勁跌兩成幾,高追嘅朋友回帶睇返幾次木下優香,都仲係好心嗡。
FB:https://www.facebook.com/seeforcaptain/




來源: http://hk.apple.nextmedia.com/financeestate/art/20170904/20141830
經濟 客艙 宅男 男變 上市 公司 CEO
PermaLink: https://articles.zkiz.com/?id=340857

經濟客艙:買新iPhone衝破嘅關口

1 : GS(14)@2017-09-17 16:29:13

無論你是否「果粉」,也會被蘋果公司iPhone十周年吸引,也好想知道新iPhone有乜咁巴閉。過去10年來,iPhone除咗係智能手機,也可以是炒炒賣賣商品。
iPhone售價當然需要留意,今年有機會成萬蚊才買到。每年推新iPhone,新機較舊型號售價平均高約15%。若將iPhone定價最高嘅256GB iPhone7Plus、官網顯示每部售8,288港紙計,新iPhone售價提高兩成後,即係每部買貴千六蚊左右,一萬有找。定價高、貨源少,促成今次iPhone炒價理由,但同時亦是吸納不到更多用家嘅理由,因為今次可能是消費者衝破不到嘅心理關口。例如平日光顧嘅茶餐廳,凍飲加一蚊變加兩蚊,「即刻問點解貴咗嘅」。假如新iPhone定價接近或過萬港紙,可能呢個心理關口,未必咁輕易衝過,又不如去買兩部其他牌子嘅智能手機,甚至足夠買到二人同行嘅台北機票。這樣比較或者不算中肯,但很好奇iPhone面世10周年後,以新iPhone定價怎樣計算出各國民眾嘅平均購買力。記得iPhone6推出,有份分析報告話過香港人工作51.9小時買得起iPhone,台灣人就要69.2小時,內地人就要217.8小時。網上時不時有貼文,話男友買唔起iPhone被阿媽子看不起,傷害咗小女生嘅弱小心靈。女生向男友渴望送部iPhone冇乜大問題,相比要求一個名牌包包、鑽石戒字或者一層樓,相對上是否已經退而求其次?
Captain Cool
fb page:www.facebook.com/seeforcaptain/




來源: http://hk.apple.nextmedia.com/financeestate/art/20170911/20148819
經濟 客艙 買新 iPhone 衝破 關口
PermaLink: https://articles.zkiz.com/?id=341093

經濟客艙:不想買貴又買錯

1 : GS(14)@2017-10-09 02:46:34

買嘢,最怕買貴又買錯。投資道路也很怕買貴,就算公司質素再好,也可能有虧蝕風險。跟買樓同樣,千算萬算後也講時機。日常生活都有好例子,可以引發大家更多聯想同投資策略。想分清楚短炒同價值投資,可以由買一件恤衫說起。用1,000蚊買件名牌恤衫,有人話好貴,亦有人話覺得係抵。假如翌日見到件恤衫減價到800蚊,最多呻吓「心急買貴咗」,唔會因為買貴咗,或者件衫價值下跌而掉咗件恤衫。另邊廂去睇,呢個牌子嘅恤衫可能係你鍾意,質地又好着,所以更加應該趁平咗,入多幾件貨啦。投資就係起初保守,見嘢應掃貨毫無保留,咁先可以避開不被震走。儲局即將公佈縮減資負債表,最近睇到彭博統計分析,美股照樣創新高,隻股票越升得多,成交越旺場。標普500指數500隻成份股中,單計9月錄得超過335隻股票上升,與上年同期332隻股票上升數量相若。不過,相比兩年前同期只得191股票上升多超過一半。投資名宿Laszlo Birinyi話美股牛市未完,其實並非盲目唱好。儲局縮表向市場抽調資金,但儲局縮表並非立刻把市場資金抽乾,亦如大師所言,市場資金流仍充裕。接連破頂嘅美股,回調吓有利後市健康喎。其次,儲局今次係被動式縮表,持有國債同MBS到期後,所得回籠資金唔會再投資,殺傷力應該相對主動沽出債券嘅影響為低。莫講美國加息步伐放慢,縮表亦急唔嚟,整個過程拖長三、五、七年亦不足為奇。其實有數可以計計,現時儲局揸得最多嘅國債係未來1年到5年到期,規模超過1萬億美金,第二批大持倉嘅國債將於未來10年到期。若儲局維持被動式縮表,拖慢去做先最着數。
https://www.facebook.com/seeforcaptain/




來源: http://hk.apple.nextmedia.com/financeestate/art/20170918/20156035
經濟 客艙 不想 買貴 貴又 又買 買錯
PermaLink: https://articles.zkiz.com/?id=341880

經濟客艙:股災試一次就夠

1 : GS(14)@2017-10-29 23:31:14

「個個都話炒股,唔通個個都識炒股咩。」冇諗過阿寶寶嘅男友,佢將原來用來結婚嘅錢,一鋪清袋。望到阿寶寶男友嘅慘情樣,除咗拍拍佢膊頭,都唔知道講乜好。或者簡單講,原來我哋每個人都可以係「阿寶寶男友」,喺牛市中無限放大賺錢憧憬。現實是我同你都唔係投資大師,又非經濟學家,甚至擁有快過電腦處理海量數據嘅腦袋。或者我哋有時候都會用第六感落盤,被市場氣氛情緒牽着走,可惜我哋又並非好似專家咁夠睿智,喺最合適時機做最適當嘅判斷。更多時候,我哋同運氣發生美麗嘅誤會,將好彩當成自己嘅實力。試過一次成功,就想試第二次、第三次,仲想要更多。最後,冇自我過濾投資思維對或不對,一心只想複製必贏方程式。確實運氣這種事,點可能複製。功力勁到好似「價值投資」之父格雷姆(Benjamin Graham),有人問過佢喺應付股災最佳策略,就係一動不如不靜好。格雷姆級數如此投資高手,喺上世紀1929年華爾街股災,冇沽貨清倉,招致損失。所謂最合適嘅投資決定,遇到機會就去馬,冇就寧願把珍貴嘅資金,安安份份存入銀行。需要沽貨時,唔好猶豫。當然我哋可以自我安慰,坐貨坐到機會再來,總信有回升嘅一日。單計美股而言,從1929年華爾街股災到87年美股高位,前後時間花近半世紀。不過,你同我莫講話有幾多世紀,有幾多個十年,等足股市50年恢復元氣後再出征。股災,成世人流流長經歷一次就夠。
http://fb.com/seeforcaptain/




來源: https://hk.finance.appledaily.co ... e/20171023/20191478
經濟 客艙 股災 試一 一次 次就 就夠
PermaLink: https://articles.zkiz.com/?id=343323

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019