ZKIZ Archives


「誠哥我唔愛你喇!」

2016-03-24  NM

「誠哥,我以前好愛你,但而家唔愛喇!」講緊嘢嘅唔係周凱旋,而係前《新報》社長、資深傳媒人馮兆榮。馮兆榮過去一直當李嘉誠係偶像,直至一三年買咗誠哥嘅酒店雍澄軒。當年馮老以四百多萬元,買入其中一個單位,及後長實被證監會轟炸,結果取消交易兼退訂。

不過唔係個個業主咁順攤,好似馮老咁,keep住張退票死都唔入。「佢哋每半年就俾張支票我(因半年作廢),金額係我俾嘅九十幾萬訂金;近排都俾咗一張,但我唔會過數嘅!」對方勸話入咗數仍可以法律追討其他賠償,但馮老你精我都唔笨。「我入咗數,咪即係承認交易已經取消?我無咁蠢。況且係佢哋無check清楚條文就賣,點解係我入稟,我邊夠錢同佢鬥。」馮老話按買賣慣例,長實應賠雙倍訂,「我都買過長實樓,知買家撻訂後長實連差價都追。而家輸打贏要,誠哥,你係咪咁做生意呀!」黃台之瓜,何堪再摘,係咪可用番喺誠哥身上呢又?

曹貴子慈善網絡

表面係屋邨醫生嘅曹貴子,喺股壇好活躍,但拍檔友好就好神秘。睇吓佢前年成立嘅egive慈善基金會名單,「網絡」咪一目瞭然囉!嗱,曹貴子係創辦人暨董事會主席,朱太同蔡志明係首席贊助人,聯席創辦人係PR Asia凌冠華,仲有傳媒夥伴《都市日報》。而名譽會長,竟然係爆咗煲嘅恒發洋參(911)楊永仁。仲有咩股壇老友?大把,自己睇啦。一齊發財,梗係要一齊立品先啱數。

中環寸嘴:溫哥華搵李福兆御廚

工廈大王楊耀松長子,遊走高級酒店、銀行,及知名食肆,與各路人士打交道,透過美酒佳餚,察看人生百態,讓讀者「嗒」落有味。

呢排返加拿大巡視業務,第一時間去搵「棠叔」,如果溫哥華唐人冇去過棠叔間海棠酒家食順德菜,唔算識飲識食。棠叔以前喺遠東交易所做廚,係李福兆親自撬佢入去做,八十年代移民溫哥華開檔,以前未有地主會,啲華資大鱷嚟到,一路食,一路交換行情,齊齊搵到咪齊齊食囉。聽棠叔講,李福兆未死前,每年七月都嚟幫襯,不過四叔李兆基想嚟食,棠叔都拒絕,怕地方太細招呼唔到。梗係啦!四叔嚟食帶埋成棚保鑣坐滿晒,又點做到熟客生意?四叔食完一餐,就何日君再來?熟客聽到唔做四叔生意,條氣唔知幾「kur」。八十歲嘅棠叔仍親自下廚,仲坐低同我寒暄兩句,不過始終都係生意人,呢條順德佬臨尾講句:「吖,係呀楊生,今年七月到期,又要同你傾續租啦!」真係好鬼精!

李澤鉅講大話?

上星期四長和業績會,焦點梗係喺李嘉誠度。不過佢老人家好識做,問到電能派息同樓市問題,都會推俾大仔Victor(李澤鉅)回答。Victor每次答問題,眼神都會好集中,好果斷!但輪到老豆答時,佢就開始眨眼,仲愈眨愈頻密,愈眨愈用力。幾乎鏡頭一影到佢,佢都喺度眨緊眼。小宗計落成場眨咗幾百下以上,由開場眨到散場,中間仲來個傻笑添!究竟佢係因為鏡頭太多,搞到眼乾而眨眼,定係同大家示意,有人講緊大話呢?!

中銀無view睇

過去喺中銀總行四十三樓,有一個免費觀景台,只要你喺樓下登記個人資料,就可以上去飽覽港島以至九龍景。不過唔知幾時開始,呢層已經封咗,上週小宗想去鬆一鬆,保安先至告知,睇景已成絕唱!咁就無得趁飯後二十分鐘,走來真「釣魚」啦。

誠哥 哥我 我唔 愛你
PermaLink: https://articles.zkiz.com/?id=190351

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019