ZKIZ Archives


是咁的 這個肥佬叫林雪

1 : GS(14)@2015-06-17 14:28:17

2015-06-10 EW




香港人都知道這個肥佬叫林雪。

雖然名字和外形,是完完全全極致地不協調。林雪,應該是長髮飄飄、氣質獨特,恍如周慧敏般的玉女才對嘛。

這天訪問,為宣傳監獄新戲,本應要扮到惡型惡相,但他竟然着件熊本熊tee扮cute。「本身個人樣衰,着件可愛少少嘅衫,出街就算畀人鬧,都可能冇鬧得咁甘吖嘛!哈哈哈!」原名林捷的他生於天津,普通話「捷」和「賊」的發音很似,名副其實是「林賊」,因此要改名。

「爸爸喜歡《林海雪原》這本小說,我性格容易煩躁,他希望我像東北的白雪一樣安安靜靜、白雪無瑕。」從此由賊變雪,雖然電影中的他還是常常做賊,就算不是監犯,也是地道到爆的香港市井小人物,最入型入格的,始終還是豬肉佬或小巴司機。

十九歲入電影行,從場務到做咖喱啡,再到金像獎最佳男配角提名,近兩年轉戰國內,電影、劇集長拍長有,演員路行得頗順利。「我係好好運,好運到不得了,由最低做起做到??家,唔係好運到不得了,點可能發生?」但更重要的是:「我對朋友掏心掏肺,屎忽生咗粒暗瘡我都會講,出外靠朋友嘛!做人就係千祈唔好害朋友,做呢種事衰一世㗎!」完全顯示出仗義每多豬肉佬的氣概。

其實,做肥佬做到林雪咁,也算是不錯了吧!

熱血電影心

嚴格來說,林雪其實已離開了香港差不多整整兩年,一直在國內搵食。「一年三百六十五日,有三百日都在國內開工,主要在北京,淨係今年已經拍了三部戲,都是國內的。」不過,林雪一有時間就回港拍港產片,皆因他一直都自認是香港人。「雖然我十五歲至來香港,但我人生得到的所有嘢,包括電影事業都是香港給我的,有港產片拍,我一定支持。」這次拍《壹獄壹世界》也是如此,林雪本來正在河北省開工,剛巧有幾日空檔,於是搭了廿多個鐘頭巴士再轉飛機回港,就為了回來開一日工。

「咁辛苦都要返,自己地方拍戲,點都要支持,而且拍得好順利,所有合作的都是老朋友,個個都一齊拍戲幾十年,本來預算係拍幾日,不過一日就搞掂。」林雪非常香港人,是演繹地道市井小人物的高手,但他其實也深明國內文化,在天津出生讀到小學畢業,移居香港前完全不懂廣東話。

「我普通話流利,亦明白國內文化,所以北上搵食算容易。」他口中也不時自動講出,一些只有在國內講過書才說得出的標語口號:「演戲是從人民對生活的美好願望,從而達成人們對追求美善的目標。」(講真我完全唔明佢講乜)雖然地盤早已北移,不過林雪對港產片卻仍有他的一番見解。「香港同國內文化根本唔同,其實好難溝得埋。拍電影最好就香港還香港,國內還國內,大家都投入唔到對方,講句笑互相都唔識笑,拍嚟做乜?有些情節就得國內人來拍,香港人就覺老土,到就返香港人,國內人又睇唔明,而且兩地文化唔同就係唔同,亦冇可能一下子就可以合而為一,電影就是要了解當地文化,活在當地,否則根本不能成功。

「香港電影圈要有新人出來,永遠都係那一批舊人,一成功就次次食老本,當然好難有新意,年輕人有魄力,有創意願意改變,拍電影誠意好重要。」談電影,林雪確實可以滔滔不絕如滾滾長江,始終充滿熱血,林雪還打趣說:「所以有時我都覺得自己有點精神分裂,投入角色到忘記自己。」

五十歲細路

看林雪的樣子外貌,可能會認為他年紀不輕,或者是因為他十多年來,都是飾演那些中年麻甩佬,但其實他才剛剛五十歲。

「五十歲應該知天命,但我自問自己做人都好似未開竅,平日就當正自己得五歲,我做人原則就是要吸收得快、忘記得快和保持好奇心。」心境年輕,可是身體狀況卻不太樂觀。

「二百五十幾磅,其實又唔算真係好肥,不過健康好差。舊年睇醫生,話我個肺只得三、四成功能,心臟三條血管塞咗兩條,通波仔之後兩條血管有六個支架,行一層樓梯都唔係好得,心跳通常維持一百六十,試過有次去到機場跳到二百幾,爭少少就暈低。」十九歲開始拍電影,三十幾年都係做呢行,養成了電影人的一些壞習慣。「三餐不定,無煙不歡。有時心諗食少支煙啦!卒之又成包食晒!飲少啲啦!最後又成支紅酒飲晒!唔通要我轉行返朝九晚五咩?唔好玩啦!煙戒唔到,酒又照飲,改唔到,行一步算一步啦!」不過,林雪亦直言:「我知所有事都係藉口。」其實太太和仔女,每次見到他都會勸告:「食少支煙、瞓多啲覺。」「但我成年冇返屋企住,返到去仔女都唔習慣,可能我老婆開始習慣了不需要這個男人,仔女又習慣了不需要這個老竇吧!」「同仔女見面少當然唔好,但呢幾年我都想盡量工作,最少供到兩個細路大學畢業,個女話想去外國讀大學,我一定供。自己就是因為讀書少,所以要自己花時間,浪費人生寶貴青春去實踐至明白,希望仔女唔會好似我一樣啦!」聽落,我感覺到一份肥佬的辛酸與欷歔。

過去由它去

關於林雪,當然還要講杜琪峯,基本上林雪就是由杜Sir一手帶入行,並由幕後變幕前。

「他像我爸爸,知道我所有性格,角色都會特登造畀我。近幾年在大陸工作多,有時會懶了,但一開他的戲就不成,要打醒十二分精神,可以執正番。」跟了杜琪峯這麼多年,林雪也說笑:「拍『爸爸』的戲一定會畀佢X,係真係X唔係講笑,不過我由細跟到佢大,慣咗就冇問題。」早前更有指杜琪峯這位爸爸為林雪還債,他亦承認早年曾經很喜歡賭波,一晚八十場波,賭足八十場。「講起就勞氣,可能我個樣衰啦!個個都認定一定係我爭人錢。我只會講,人誰無過?過去的事無謂再講,每個人都有壓力,總之一切都已經過去。」現在財政穩健嗎?

「我做人不要有太多錢,夠我每日用就夠,不過我可以用好多,一餐飯已經可以使十萬,其實一日使十萬唔多。

又說:「錢係要流動,揸喺手冇用。」所以他絕不買樓。「買樓好麻煩,我家陣四海為家,中國咁大,去到邊住到邊。」

肥佬的浪漫

林雪拍戲拍了三十年,至今仍然有一個關於電影的心願未了。「我最想最想拍一個普通人的愛情故事,內容是愛上一個女人,不代表一定要長伴終老,得不到可能更有遺憾美。」是的,豬肉佬都可以有刻骨銘心的浪漫。

雖然現實中,林雪的感情很踏實,和本是天津同鄉兼鄰居的太太結婚近廿年,育有一女一子,大女兒剛剛中學畢業。只是他長期在國內搵食,與子女間的緣,似乎有點薄。

「個女其實唔太想講畀人知,老竇是林雪。前排畢業禮,我想去,但佢唔想,叫我唔好去,話到大學畢業先喎!我傷心呀!點知畀老婆話番轉頭:『家陣就想去,幼稚園、小學畢業嗰陣你又唔去?』即刻冇嘢好講。」說時站在後樓梯暗角,一邊抽煙,眼神空空的望着石屎地板。其實肥佬的浪漫,未必是要拍一部史詩式愛情電影。

一張和女兒穿上畢業袍的合照,可能已是這個肥佬最大的願望。

撰文☆梁文威 攝影☆蔡豪 設計☆吳俊彪
是咁 咁的 這個 肥佬 叫林 林雪
PermaLink: https://articles.zkiz.com/?id=291054

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019