【火車情意結】中年夫婦冒險追夢 山旮旯開鐵路模型Cafe
1 :
GS(14)@2017-04-10 23:36:33模型火車迷Peter，兩年多前在山旮旯開了一家模型店，希望給其他志同道合的車迷一個喘息的空間。
中年創業或轉型，很多人覺得冒險，但其實也是一種堅持，而家唔做，仲等幾時？
48歲的林欣Peter，從事模型貿易接近三十年，自小就愛上鐵路模型，「我大約四、五歲時，爸爸出差買了套鐵皮火車玩具給我，我玩到不亦樂乎，就慢慢開始對火車有情意結，長大後都要擁抱這玩意。」鐵路模型的玩家，十之八九都是男性，其實有咩咁好玩？「鐵路模型係好多人的兒時回憶，除咗可以了解唔同國家嘅鐵路文化，睇下啲模型造得有幾精細外，仲可以用想像力創造理想的情景，還可在上面操控火車速度、整到出煙、出聲，我覺得對身心健康有很大的樂趣和吸引性呀。」
Christine則在丈夫的模型店對面開了一直想開的Cafe。
兩夫婦一起在中年追夢，也是一種浪漫。
2014年底，他決定開舖與人分享自己的心頭好，「都算係夢想之一」，近二千呎的店舖除了賣模型，也放有自己的珍藏，更重要的是有幾組大型路軌，在有土地問題的香港，很多人的珍藏只能放在櫃頂或床下底，不見天日。如果想在家中找個地方玩路軌，更是天方夜譚。「有好多客人都係夾份租個工廈小單位，得閒上去個小天地放車。」Peter又覺得，現今很多大人細路拿電話做低頭族，沒有互動，但玩火車模型則不然，在現實生活中可看到實物，甚至將相關知識應用在真實環境中。」
店舖選址在青嶼幹線觀景台，人流極少，雖然在這開店有點冒險，但卻有別一番景緻。
每逢周末，總有不少車迷專程帶同珍藏到店內放車，順道交流心得。
男人買模型大概和女人買衫買袋買化妝品一樣，要偷偷摸摸，最好不要被另一半或家人識穿，否則很大機會換來兩個字：「嘥錢！」但Peter比一般男人好彩，因為另一半不但無反對，還出力支持，「開得成都係要多謝太太支持，佢話我成個貨倉都是珍藏，亦好多人唔知道我做呢行(模型貿易)，無機會畀人認識，不如試試轉型。」比丈夫Peter年經四年的林卓娜christine説：「我覺得人生在世，一定要有嗜好、追求和夢想，玩模型係正常嗜好，好健康，所以我選擇支持。」做了時裝貿易廿多年的她，多年來都因為工作和丈夫聚少離多，今次她決定辭職和丈夫拍住上，連舖位都幫他找好，更開始愛上這些玩意，「其實拍拖時，我都唔係完全唔玩嘅，而係玩周邊情景設計、幫人仔上色，我會同佢一齊玩，有互動的。」幫丈夫圓了夢想，哪她自己的夢想呢？「其實開cafe係我心願」，幾年前，她機緣巧合下找到現有舖位招標，剛巧店舖連同對面的小舖位一起出租，他們就開了一間小caf?，實現二人的夢想。
開舖做生意的，都總想開在人流旺的地方，不過他們卻選址在青嶼觀景台，客人要前往，除了自駕，就只能乘搭一小時只有一班的小巴，平日人影都無隻，點解仲揀？Peter笑説：「我選擇做模型呢行作為終身職業已經好冒險，都唔介意冒多一次險吧。」身旁的太太也補了一句，「自己都話自己傻，成日都有客問我哋點維皮，好擔心我哋，老實講，開頭係蝕錢的，但我哋諗法同其他香港人唔同，唔使話要搵好多好多錢，我哋覺得開心更重要，開心行先，而家比以前開心得多，錢方面，生活得到就可以。有時真係要諗下，點解每日要晨早去番工，披星戴月先返屋企，無時間同家人相聚，做自己喜歡嘅事。」雖然店舖地點隔涉，但每逢周末都有很多車迷專程來放車，兩夫婦希望車迷在這裏有個喘息的空間。「我哋好多客人係做工程師、醫生嗰啲，承受的壓力較大，佢哋話好鍾意嚟呢度，話我哋荼毒佢哋，總之想放鬆一下就嚟。有個客人已經92歲，話每日都要玩兩轉火車，唔玩會有高血壓。」店舖雖然山旮旯，但來這裏的人，總是帶着一份閒程逸致，在那小小的路軌旁，他們都能暫時忘掉壓力，全情投入在火車的世界，Peter說：「希望透過呢度畀車迷有機會聚會同玩，見到佢哋開心，我就好安慰架喇。」
Hobby Nana Café地址：青嶼幹線訪客中心觀景台記者：黃子配攝影：梁志永2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170410/19985091
【動畫‧處女情意結】男人「唔係處連拖都唔想拍」呢啲係乜心理？
1 :
GS(14)@2017-08-04 06:12:00處女情意結看似虛無，其實唔少男士都會有。
「男人希望另一半係處女」聽落無厘頭又荒謬，但的確係唔少男士嘅心聲。網上大大小小嘅討論區都不時有人講起呢件男人心事，有班好介意嘅男人會覺得「唔係處真係冇咁珍惜」、「唔重視對方係咪處女就唔好話自己係男人」，甚至有人會話「莫講話係老婆，唔係處女，就連同佢拍拖都唔想」。究竟呢個「處女情意結」係點嚟？思健心理諮詢中心註冊臨床心理學家趙思雅就認為有以下三個原因。
原因一：思想傳統又想另一半都係咁諗有啲男士對性、愛情、婚姻嘅思想特別傳統，例如堅拒婚前性行為等等，係咁嘅情況下，呢種男士就可能都想自己嘅另一半抱有同樣價值觀，所以會要求對方係處女。原因二：覺得女人係男性附屬品大男人嘅控制慾同佔有慾特別強，甚至會覺得女性係自己嘅附屬品，係喺自己控制範圍內，所以另一半嘅貞操自然都係屬於自己，絕對唔可以同其他男人分享，掂過都唔得。原因三：為咗showoff除咗當女人係附屬品，有部份男士更可能當另一半係戰利品，周圍同朋友講自己識到個處女女友、自己係女友嘅第一次等等……呢種「戰績」令佢有種虛榮感，所以就咁介意對方係咪處子之身喇。
思健心理諮詢中心註冊臨床心理學家趙思雅
唔少男網民都好介意另一半係咪處女。 互聯網
當然，都有人唔太介意對方係咪處子之身，覺得處女情意結已經不合時宜。 互聯網
不過，都有人唔太介意另一半係咪處女，認為「身體只係軀殼，真係咁緊要咩？」、「呢個時代仲討論呢啲好無謂」、「唔通唔係處，你就由愛佢變到唔想掂佢？」其實所謂「處女」，即係未發生過性行為嘅女士，屬於性嘅概念，同愛情觀、係咪忠誠冇好直接嘅關係。趙思雅舉例，有啲女士可能會一腳踏幾船，但從來冇發生性行為，純粹for fun，呢個情況下佢雖然係處女，但就唔忠誠喇。另一個例子，一位飽歷風霜嘅女士可能有過N段愛情，仲同過所有前度發生性行為，但咁都唔可以抹煞佢係一個好伴侶嘅可能性，因為佢可能有其他特質，例如有愛心、賢淑等等。時下嘅年輕一代對性、愛情、婚姻嘅睇法越來越開放，唔少人都係拍拖同居唔結婚，甚至連拖都冇拍過就同陌生人發生性行為，其實揀伴侶都要睇雙方夾唔夾、相處起嚟舒唔舒服，呢啲因素比「對方係咪處女」係咪更重要呢？記者：李煒汯攝影：梁志永、潘志恆2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170803/20109831