「蘋果」財經版在星期一報導，火炭樂林路有一塊細地皮，約一萬三千平方呎不到，可作低密度發展，建成樓面面積約五千平方呎。在樂林路冇理由起四五百呎細單位嘅箒，要起碼千二呎先至夠睇頭，賣得起價錢，即係話將來可能只得四個單位落成，政府勞師動眾搶地皮起樓，得四層樓（一梯一伙共四層）四個住宅，值唔值得呀？除非賣地時再加限量或限呎條款，否則由一位億萬富翁買嚟興建一間獨立屋好過，唔會阻住後面樂林小築吖嗎。
樂林路幅細小地皮在榕翠苑後面，十分清靜，平時用途不多，估唔到政府都要徵用之，附近居民唔反對至奇。左丁山覺得特區政府真可憐，龐大新界東北土地開發有阻滯，就發茅搶塊小空地，冇厘氣魄，梁振英若想真有作為，夠膽嘅就宣佈將整個火炭工業區活化，業主可申請將工業大廈改作住宅用途，如此又可住多十萬八萬人，遠勝在樂林路搶幅地起樓俾十零人居住。
香港居民對住宅需求甚殷，與可建築地皮有限有關，本港有百分之七十土地因種種原因限制，不能用作起樓之用，居住人口只在剩餘之土地打轉，工廠、醫院、商廈、工廈、住宅、球場……乜都擠在一起，樓價有乜辦法唔長期看升。一位前輩在午飯時睇電視新聞，講起樓價，佢話：「我年紀與黃志祥爸爸黃庭芳差不多，睇住羅拔仔來香港買尖東土地（尖沙咀中心），記得當年在新加坡與黃庭芳傾偈，佢話新加坡土地有限，要到香港發展地產，我問佢點解唔去泰國、馬來西亞，佢話新加坡與香港同是小島城市發展金融業，地少人多，土地不足，經濟發展快，係最佳做地產生意嘅城市，唔想去其他地區嘥精神，現在諗番，佢真係眼光獨到，我唔做地產確係有啲笨！」咁又未必笨嘅，前輩發展其他生意，一樣搵到盤滿缽滿。同枱另一位前輩則細細聲同左丁山講：「人地發達各有前因，千祈唔好跟風呀，一位福建幫貿易商人見地產好搵，97前學人投資小西灣藍灣半島，你知後果如何啦！」 