呢日收到一封讀者廖親筆來函，談及垃圾，讀者廖話：「我每天必拜讀『名采版』，特別是閣下大作『GG細語』，在下不才，望與先生談談近日熱門話題垃圾。在香港我是垃圾製造者之一，在日本我不敢任意製造垃圾，為甚麼呢？理由很簡單，在香港太多垃圾筒方便我棄置垃圾，相反在日本，我試過行了幾條街也找不到垃圾筒拋棄垃圾，就算商場垃圾筒也出奇地少，所以我一到日本，就會自律，不敢任意製造垃圾，自找麻煩。請數一數，香港一條街有多少個垃圾筒，幾乎五十步內必有一筒，這是香港奇景，也損市容，因此就算香港再多幾個堆填區，也無法解決垃圾問題。
另題外話，香港政府每年用大量公幣讓高官出國考察，他們除了吃喝玩樂之外，考察了甚麼回來呢？」
高官及立法會議員每年出外考察，例如考察焚化爐及垃圾處理就起碼有兩三次，佢哋學咗乜嘢返嚟，左丁山唔知，只知回來之後，講親垃圾處理就一定鬧大交。至於日本街頭搵唔到垃圾桶嘅原因，左丁山就略知一二，其實以前日本街頭都有好多垃圾桶嘅，但自從一九九五年三月二十日發生真理教信徒用沙林毒氣襲擊地下鐵之後，日本為咗反恐，就撤走地鐵站及街頭垃圾桶，以免俾恐怖分子利用嚟暫時收藏毒氣，撤掉之後，發覺日本人好有紀律，冇街頭垃圾桶都OK噃，慳番市政府好多錢㖭，於是繼續如此。其實遊客到東京有時發覺冇垃圾桶，好唔方便，特別係天熱在街頭飲完汽水，礦泉水，食完雪糕或者傷風吐痰之後！左丁山就有一次帶定一個環保袋，內有膠袋，膠袋裝滿膠樽、雪糕筒、抹手紙，一直行到返酒店，先至走入廁所搵到垃圾桶掉垃圾。
香港是否可以學習日本，街頭不設垃圾桶，左丁山嘅直覺係一定唔得，理由不用解釋。總之垃圾問題係世界性，非香港獨有，理性方法解決就係用三部曲：（一）徵收垃圾費，減少源頭垃圾徵費不能太低，亦無豁免，一定要遵從用家自付或污者自付原則，不能依賴政府津貼；（二）有限度擴建堆填區；（三）急急興建科技焚化爐。任何人以為單靠源頭減廢便可解決問題，近乎係白癡。 