派得好投資組合月結 (May 2013) PARTIPRAL - ROAD TO FINANCIAL FREEDOM
http://partipral-hk.blogspot.hk/2013/05/may-2013.html投資組合現時持股狀況:19% 大快活集團 (0052.HK)
17% 港華燃氣 (1083.HK)
12% 路訊通 (0888.HK)
11% 理文造紙 (2314.HK)
10% 稻香控股 (0573.HK)
4% 信星集團 (1170.HK)
4% 時代集團控股 (1023.HK)
23% 現金
投資組合單位面值: 94.31
月回報: +3.72% / YTD: +4.41%)
(上月月結: 90.93 / 2010年7月1日起始值: 60.00)
派得好投資組合每日表現
恆指五月份先衝高後急回, 尤其最後一星期走勢甚差, 以幾乎全月低位作結. 指數轉弱, 但熱炒, 創新高股份仍然不少, 市場氣氛其實比表面好. 展望六月份, 三月份年結公司將會公佈全年業績. 踏入另一個業績高峰期, 應該又會有一堆公司跑出, 被市場重估. 因應指數不穩定而有必要提高警覺, 但相對之下更應該聚焦機會.
REITS, 公用股五月份遭到連環洗倉, 領匯, 電能月內等跌幅竟達一成以上, 以公司業務穩健性而言, 出現如此跌幅實屬罕見. 事後解釋, 美債債息抽升似乎係收息股暴跌元兇; 而現實點去理解, 基本上所有持有電能, REITS, 長建(1038)既投資者於五月中前都係贏大錢, 收息股股價連創新高, 其實已經提供極大誘因予投資者獲利離場. 雖然如今已由高位回落, 但其實目前股價仍然比今年起步位高出超過5%. 若說今轉調整乃出自基本因素扭轉, 我比較傾向認為調整未完.
唔能夠將睇法轉成打法, 不能用作交易既意見, 其實同廢話無分別. 個人認為公用股, REITS等調整未完, 依家唔買得; 但更重要既問題係, 咁幾時可以買?
搏股價低位回升? 我既睇法係, 繼續留意債息走勢. 如果美債債息繼續衝高, 根本無誘因吸引到資金重新流入收息股市場; 純粹為收息? REITS股息率不足5厘, 公用股不足4厘, 若然踏入加息週期, 盈利影響更大. 路訊通(888), 新意網(8008)同樣具備業務穩定, 派息率股息率雙高條件, 加上處零負債狀態, 豈不是更佳收息選擇? 近期兩股股價遭其他收息股拖累而出現回吐, 相對之下, 兩股死守價值更高, 甚至趁低加注亦無不可.
MSCI上週五完成換馬, 一如早前提及, MSCI新貴根本完全無路捉, 無謂枉費精神. 但今次有一樣事件非常值得備忘, 就係香港電訊(6823)於星期五收市前兩分鐘極速抽升超過一成. 今次香港電訊突然急升, 事件背景係該股已經於去年11月納入MSCI香港指數之內; 而今年4月份股東李澤楷配出超過1億股, 導致市場流通量大增, MSCI要重新調整其比重, 令該股上日出現尾市掃貨掃到癲既"異象".
今次事件發生前完全無為意, 如今冒遭咒罵馬後炮風險, 都一定要對此事件備忘, 原因係同樣情況將來很大可能會再次出現. 尤其瑞聲(2018), 太古地產(1972)等, 將來出現配股絕不出奇. 下次搏唔搏係另一件事, 但起碼唔可以再好似今次咁懵盛盛, 收市後半個鐘先如夢初醒.
投資組合今個月錄得理想回報, 除因為捉到置富(778)最後的探戈之外, 餐飲股大快活(52), 稻香(573)連環探頂亦功不可沒. 難得等到突破, 當然繼續牢揸. 當維他奶(345), 翠華(1314)都可以炒至30倍P/E以上, 兩股預期P/E只大約17倍, 相較而言, 是否揸得更安心?
MSCI完成換馬後, 永亨(302)已成為個人頭號買入目標. 買入原因詳見
前文, 搏價值修正, 其實三個月已經係極限. 目標明確, 簡易操作; 另外銀娛(27)已經差唔多升抵目標價, 組合提前沽出. 距離恆指換馬尚有兩星期, 有機會或者可以再走一轉.