三月四日下午睇now電視直播台，想知道滙豐恒生如何宣佈業績，但睇到嘅就係立法會房屋事務委員會班委員圍攻房屋協會嘅黃傑龍（行政總裁）與劉竟成（總監）。左丁山睇到麥美娟、李卓人、梁國雄、張超雄與郭家麒攻擊房協之筲箕灣混合發展項目「長者屋」，點解要用市價出售，謀取利潤，不優惠市民？左丁山聽到搖晒頭，呢幾位議員與房屋事務委員會主席王國興雖然有工聯會與泛民之別，但同是民粹社會主義派，「泛工黨」一類。試問房協嘅筲箕灣南安里長者屋及私人單位發售，若低於市價以優惠價沽出，怎會不引起全城炒風，瘋狂入票博抽獎？房協係非牟利機構，賺到錢入不了私人荷包，都係用來發展其他資助房屋嘅啫，有乜道理要用房協資源幫助他人抽獎發財？咁簡單嘅道理，呢批議員都唔明白，可說係經濟文盲。
王國興話：「用市價賣，只有中產財爺先至買得到喎！」中產呢個名詞，最近好敏感，人人都話「我唔算係中產」，都唔知算乜。滙豐梁兆基在電台講：「如果簡單劃分三個階層：富豪、中產、基層，咁財爺與我地一定係中產啦！」界定中產，是否一定與錢財有關？財爺薪水高，住在壽臣山，睇住址就係富豪類，但佢一旦離任，搬去太古城嘅話，咁又係典型中產咯喎。香港地，好現實咁講，人無億元淨值（包括住屋）都難以稱為富豪，擁有一百萬元（只有一百萬現金之人）根本連一間像樣市區公屋都買唔起，遑論沙田第一城上車盤，點可以稱為富翁呀？是故財爺講中產係lifestyle，佢舉兩個例子（飲咖啡與睇法國電影），於是俾人狂插，其實左丁山幾同情佢噃，大家無謂斷章取義吖。左丁山唔飲咖啡嘅，近十年未入過戲院睇戲，但間中飲吓紅酒，訂閱經濟學人與國家地理雜誌，都算係中產生活風格啩。中產一詞包含太廣，如要分為高中產（如科大校長陳繁昌對號入座）、中中產、下中產，還可以劃分得更細緻一啲，直情係搵嚟煩。譬如長毛梁國雄住在公屋，有報導話佢月薪八萬，你話長毛係基層還是中產？以佢熟讀馬克思，捷古華拉呢類思想而言，基本上就與曾財爺同屬中產，係小資產階級分子，唔係基層。曾梁呢兩個中產坐埋一齊，思維相差十萬八千里，既然中產有如此大分野，你我是否同屬中產，拗頸實屬多餘。
