📖 ZKIZ Archives

劏房有存在價值 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130112/18130792
統計處造假？消息好嚇人，如果屬實，香港聲譽掃地咯！香港統計在國際上素有聲譽，統計數字係一切社會科學研究嘅基礎，學者專家無不重視，如果原來數據係假貨，乜經濟模型、家庭結構模型都玩完。希望造假消息係作大啦，否則嘅話，哈哈，前任現任統計處長都應該歸還退休金及失去長俸，以示懲罰。
社工界人士乘機發難，指劏房居民日多，統計處嘅劏房及劏房居民數字完全反映唔到，原來有理由嘅，統計處亂咁交差吖嗎！呢個指責十分嚴重，特區政府不能當作梁老闆僭建，輕輕表過不提。
運房局副局長邱誠武在立法會講劏房，爆出一句：「有啲劏房劏得好四正，做得幾靚。」又指劏房有「存在價值」，於是被李卓人、梁國雄、梁耀忠、林大輝、張超雄幾位議員鬧爆。呢幾位議員其實係火遮眼，鬧定先啫，左丁山夠膽話邱副局長講嘅係實情，事實上有啲劏房劏得四正，亦有存在價值，否則邊度會有市場吖。記者G曾跟同學去睇劏房，在銅鑼灣鬧市就發覺有啲劏房劏得好四正（注意，係有啲，唔係所有，唔好以偏概全），又真係有年青人家在屯門、元朗，在市區工作，加上有咗份工就想更獨立，唔同屋企住，但又未能輪到公屋，唔夠錢買私樓或租一層私樓，於是咪去租劏房囉，純粹係自願，冇人逼佢地嘅唧。解決劏房問題冇得急，如要搬曬28萬劏房居民（28萬乃《爽報》報導嘅數字）去公屋，請梁國雄梁耀忠李卓人等等首先唔好大罵屏風樓先，等政府在土瓜灣、深水埗等等舊區拆舊樓，興建高地積比率公屋（譬如十倍），其次各區議會唔好阻住起公屋，期諸十五至二十年，問題或可解決。如即時取締劏房，趕28萬住戶落街呀？等佢地無家可歸？今之劏房猶若幾十年前的板間房，但住過板間房人士都知道，二十幾人住在一個幾百呎單位，共用一個廁所兼浴室、一個廚房，情況十分可怕，其實差過今日之劏房好多。百貨公司董事C就曾經一家幾口住在板間房，後來父親走去山頭霸地起木屋（當年好多人係咁，港英不理），住咗幾年，父親突然收到通知木屋區即將有火警，快啲執拾細軟鬆人，果不其然，佢地擒擒青走去長沙灣踎街之後，木屋就發生大火，燒曬，佢地登記成為災民，咁就上咗公屋。講起嚟，百貨C話：「現實啲講，今日劏房係有存在價值！」
PermaLink: https://articles.zkiz.com/?id=42665
Next Page
ZKIZ Archives @ 2019