ZKIZ Archives


二五中環 萬南 富豪榜排名 有錢佬好上心

1 : GS(14)@2017-09-25 04:25:13

http://www.metrodaily.hk/metro_c ... %E4%B8%8A%E5%BF%83/

每年中外傳媒都會公布富豪榜,不過好多上榜富豪,對外普遍都話唔關心自己排名高低。少年,如果你相信的話,便太天真了,事實上佢哋不知幾咁緊張。就以最近騰訊(700)主席馬化騰爆料為例,話說有日信和(083)第三代太子爺Daryl黃永光主動約小馬哥食飯,查實二人唔多熟,主要係請教佢,問吓有乜科技好投資。
小馬哥問黃永光點解忽然咁恨投資科技,原來facebook有位聯合創辦人Saverin移民新加坡,聞說身家已追貼身為新加坡首富信和黃氏家族。Daryl坦言家族喺新加坡打拼60幾年,身家唔可以畀一個連名都講唔出嘅人趕過,所以要喺科技領域急趕直追。而Daryl老豆黃志祥更一馬當先,飛去科技出晒名嘅以色列搵投資機會。
其實除咗黃志祥家族咁緊張富豪排名外,每逢有大型機構公布最新富豪榜,好多老闆都會第一時間叫同事計數,睇睇有冇計少自己身家。萬南知道有年某位超級富豪第二代,因為有雜誌僅以上市公司市值計算身家,而佢以私人公司持有好多海外物業,基於遊戲規則未被計算,結果呢位富二代唔多高興,搵旗下年薪過千萬嘅高層做說客,多番要求雜誌考慮更改計算資產辦法。
最後雜誌當然冇理佢,事關順得哥情失嫂意,一百個富豪有一百種對自己有利嘅計算資產辦法,改得一次就好大鑊,隨時被人奪命追魂Call,要求更改富豪榜排名。
另一方面,近年多咗好多強國富豪入榜,聽聞佢哋仲過癮,將自己上榜嘅消息大事宣傳,驚死人唔知佢哋幾有錢咁款。有朋友借勢恭喜佢嘅話,佢就誇口話計少好多自己身家,甚至「考慮」告雜誌社,最終梗係吹水唔抹嘴啦。
PermaLink: https://articles.zkiz.com/?id=341460

Next Page

ZKIZ Archives @ 2019