【add時尚】紅人主場：薛凱琪時尚之路
1 :
GS(14)@2017-07-09 03:57:04■Fiona話時裝品牌製作揼本，寧願揀靚布料做好些也不急於回本。
藝人創業做生意時有所聞，今次榮升老闆的是薛凱琪（Fiona）。向來對穿衣有要求的Fiona，從個人興趣入手，與友人拍檔創立時裝品牌，完成小學時已萌芽的夢想，而且深明力不到不為財，品牌樣樣事都投入沾手，「個天畀機會我要我攰啲，我梗係要瘋狂投入去做！」採訪：趙潔恆 攝影：周樂恒化妝：Jessica Chan of Jessica Chan Make-up Workshop髮型：Jo Lam of Queen's Private I服裝提供：Spiritunus
■Fiona與媽媽感情要好，原來她和童年薛媽媽（左一）也如餅印。
薛凱琪4月時舉行了個人演唱會，最近開始宣傳新片《閨蜜2之單挑越南黑幫》及跟台灣男星周渝民合作的《天生不對》。歌影事業兩忙的她，還嫌時間表不夠充實，年前開展創業大計，着手籌備時裝品牌Spiritunus，最近品牌推出春夏系列，Fiona樂做生招牌，嚴選幾套新裝來到攝影棚。
自問落手落腳
今次訪問穿上自家出品，但Fiona卻沒有為品牌宣傳品當模特兒，「呢個brand唔係只想做畀fans，唔想標籤着咗啲衫會好似我咁，個brand唔係promote我自己，搵番model會妥當啲。」以為嬌滴滴的Fiona只是玩票性質搞生意，但其實她投資了七位數字外也落手落腳，「一決心做好一件事我會好努力，雖然有負責傾生意嘅partner，又有designer等唔同崗位嘅同事，但每次開會都開十個鐘去傾啲款點改，一齊落手去諗平面、digital宣傳，連搵model做casting我都自己嚟，有時有啲短片，都會自己去調色，跟得都幾貼，都攰㗎。」做生意理所當然望有錢賺，Fiona淡淡定，「感謝主我唔太急要錢，如果成日諗住要快啲賺錢，最快就係印T恤，有時有同事會話用呢隻料會平啲喎，唔做咁多details會平啲喎，但係我同partner都想做好件事多啲，唔急回本，呢件事唔係一時一刻，而係會長久做落去嘅，可以慢慢嚟。」
■Fiona最喜歡穿白色衫，令人覺得更Fresh。
■Fiona於小學時代已經萌生搞時裝品牌的念頭。
賣樓獲利千萬
Fiona做生意沉着放長線，投資都頭頭是道。早前有報道指她賣樓獲利千萬，Fiona卻歸功精明的媽媽，「由出道我賺到嘅大張細張支票，都係畀我媽咪嘅，我銀行有幾多積蓄，佢最清楚。我仲記得買呢層樓嗰時，我媽咪同我講『你要再努力啲做嘢喇，因為要供樓呀，要供得辛苦啲。』我仲話『供乜嘢樓呀？』眼光好獨到嘅係佢，都有賺少少錢。」
【搞笑的緣份】
薛凱琪與台灣女星張鈞甯在電影《閨蜜2》中合作，二人竟成了真閨蜜，能成為好友都是緣份使然。「第一次見係一個朋友帶埋我去浸溫泉，我同佢完全唔熟，佢媽咪都喺度，好尷尬咁又傾唔到密偈。第二次見面係一個影展紅地毯，我同佢撞裙，咁又好尷尬唔會同佢傾偈傾得好深入啦。第三次撞到，係喺我學打坐嘅地方，大家都有say hi但又不了了之。到拍《閨蜜》之前累積落咁搞笑嘅緣份就爆發，原來我哋好夾，會講好多心底話。」
■Fiona與台灣女星張鈞甯（左）及陳意涵（右）合演的《閨蜜2》，將於下月上映。
■Fiona與鈞甯成為真閨蜜，早前於上海電影節行紅地毯更當眾咀嘴。資料圖片
更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20170707/20081105