📖 ZKIZ Archives

窮人恩物？ 左丁山

http://hk.apple.nextmedia.com/template/apple_sub/art_main.php?&iss_id=20120420&sec_id=12187389&art_id=16264342&cat_id=255&coln_id=22
左丁山有不少朋友住在沙田第一城，報紙最近講第一城啲細單位嘅呎價勁升，升破七千元一呎，實在驚人，一位朋友在一九九七頂尖期買入單位，一買就坐艇，好 咯，家已經返本有突，可以鬆一口氣。住在城市屋邨如太古城固然好好，其實住在第一城嘅生活空間可能更廣闊，單車徑、划艇、馬場、彭福公園、沙田中央公 園，往西貢郊野公園等等，甚為方便，要城市生活呀，有馬鐵車站往大圍接駁東鐵出九龍又一城商場，坐巴士 van仔到新城市廣場，城巴 88R直達中環心臟地帶，加上屋邨管理素來幾好，中產在第一城買樓，確係幾安樂嘅。
第一城嘅 562平方呎單位據講已突破四百萬元一間，並非上車盤。秘書Ｖ聽到，竟然吐出一句：「買四百萬樓，係窮人啫噃！」左丁山吃了一驚，問：「何出此言，買得起 四百萬元嘅樓，點會係窮人呀？」秘書Ｖ哼一聲：「嗱，唔係我講㗎，有圖為證」。佢拿出 iPhone，顯示一張圖片，出自 fb，就係「樂悠居， 753呎， 412萬，窮人恩物」，話係利嘉閣嘅「產品」，秘書Ｖ話呢幅圖片在 fb流傳，佢都收到朋友轉寄，睇完就覺得好激氣：「乜嘢窮人恩物呀，係窮人就冇四百萬拎得出嚟啦，利嘉閣簡直離譜，侮辱晒我哋！」
「樂悠居」究竟 位於何方，左丁山不知，但地產經紀以「窮人恩物」為招徠，確係宣傳花招出晒位。如果咁講，第一城咪有好多「窮人」。都係不必與佢勞氣，一笑置之可也。惡佬 明來報，第一城價格上揚，可能另有原因，佢最近得知，第一城管業處發出通告，勸喻勿在屋內劏房，如果冇劏房呢回事，駛乜發通告？故此惡佬明話：「梗係有啲 人睇中第一城鄰近威爾斯醫院，求醫話咁易，於是心生一計，買下第一城單位搞劏房，尋求快錢！」係唔係呀，純屬猜測啫啩？但第一城如真有劏房，就係 1981年入伙以來嘅第一次，事關城民生活環境，確實係需要管業處嚴辦嘅，否則大門一開，第一城容乜易變成大角嘴？
PermaLink: https://articles.zkiz.com/?id=32846
Next Page
ZKIZ Archives @ 2019