加價戰 PARTIPRAL 派得好
http://partipral-hk.blogspot.com/2012/04/blog-post.html上星期最低工資委員會為法定最低工資水平展開八星期公眾諮詢, 鑑於過去年幾以來通脹持續高企,
有指明年5月開始實施既第二個最低工資水平必須定於33蚊以上, 即比目前28蚊高出兩成以上. 實施最低工資原意係希望向低收入人仕生活作出保障,
雖然最終實際成效可能係毀譽參半, 但我都無意在此作出任何批判. 我目前比較關心既, 仍然係大快活.
最低工資由28蚊升到33蚊, 兩成既增幅應會令大快活員工支出增加近億元. 大快活上年度純利都只係僅僅破億, 33蚊既最低工資, 驟眼睇似乎會係一個好大問題.
最低工資既難關, 大快活並唔係首次面對, 最低工資今年5月開始實施, 而大快活最近一期業績顯示, 集團半年核心利潤5千8百萬,
環比仍錄得5.7%輕微增長. 事實上, 過去一段長時間經營成本持續上漲既壓力其實從來無減輕過. 不論人工, 食材抑或租金,
全部箭咀咁多年來都係持續向上, 但大快活並無因此被打垮, 不單仍然能夠繼續生存, 而且係愈做愈好. 經營成本上升, 有能者自然可以坐地起價,
將部份成本轉嫁於消費者; 標準化生產, 精簡流程, 提升工作效率; 多聘兼職, 靈活上班時間, 適時調節餐牌, 亦有助減低工資,
食材飛升既影響. 可以肯定一點, 經營成本上升並唔係世界末日.
管理層究竟有無料子去應付逆境, 往往比起逆境本身更為關鍵. 快餐業絕非想像中容易打理, 94至03十年之間大快活就曾累積虧損以數億元計,
俗D講, 係"衰到貼地". 若非04年管理層痛定思痛, 立心將品牌重塑, 第二個十年無可能可以愈做愈好, 打出一片橙色天與地.
大快活早已習慣逆住風跑, 當年由谷底重新爬起, 及後從壓力中跌宕成長, 今時今日既橙色力量, 係由過往既失敗經驗一點點積累而來, 無半點僥倖.
成功克服困難, 往往可以令公司變得更壯大, 大快活今日能夠愈做愈強, 就係活生生既例子.
純粹因為最低工資而睇淡大快活, 我認為理據唔夠充分, 因為整個問題上最關鍵既其實係企業質素同復原能力,
但呢兩點往往卻被輕率忽視. 最低工資並唔係衝著大快活而來, 反而係全行業都一齊面對緊既問題; 蝕本生意無人願意做, 最低工資只會加速行業整合,
加快汰弱留強. 最終比較大可能出現既情況會係大家齊齊鬥加價, 邊個手瓜硬, 加完價都唔影響銷路既就係最終勝利者.
其實為期數年既加價戰早於去年已經開打, 大快活以集團連鎖式營運, 對比部份中小型茶記, 計領隊, 計人腳, 計板凳深度高出何止一班. 皇馬對飛馬, 最終爆冷既可能性, 我認為係微乎其微.