📖 ZKIZ Archives

廣告大師秘笈 左丁山

http://hk.apple.nextmedia.com/template/apple_sub/art_main.php?&iss_id=20120412&sec_id=12187389&art_id=16239588&cat_id=255&coln_id=22

走入曼谷 Siam Paragon嘅「紀依國屋」，入門當眼處擺放了一本新書，就係美國廣告界傳奇人物 George Lois之 2012年新著作 Damn Good Advice(For People With Talent!)。呢位希臘裔 Lois先生已經 81歲咯喎，仲有新書出版？於是買番一本睇吓，呢啲小書好易睇嘅啫，大隻字， 120頁，好快睇完。「紀依國屋」賣書送埋「包書」，一俾完錢，櫃枱夥計即刻用透明膠紙包書，服務好過香港書局唔知幾多倍。
呢位作者幾沙塵嘅噃，開宗明義就話世上只有四種人：（一）非常聰明兼工作勤奮，（二）非常聰明而懶散，（三）愚蠢又懶，（四）蠢人但好勤力，呢種人最為危險；如果你係（一）或（二），你會讀呢本書有所得，如果你係第三或第四種人，唔該你慳番啲時間，唔駛買，唔好讀呢本書！
講 得咁巴辣，左丁山點都自認係第一類或第二類人，急不及待，趁曼谷塞車塞到無可奈何嘅時間，坐的士時翻閱吓先。呢位廣告設計大師話要注重簡潔，唔好講廢話， 林肯總統在 1862年發表 Gettysburg演說，傳誦後世，整篇演辭只有 272字，講咗只係三分鐘，但事先係林肯總統寫完又改，改完又寫嘅精心傑作。之後冇幾耐，林肯總統寫咗一封長信俾一位朋友，然後收尾寫咗一句：「抱歉我不 能給你一封短柬，但我沒有時間。」明白未，寫萬言書與寫 272個字係有好大分別嘅。
Lois有不少過癮故事，刺激讀者思維，左丁山認為其中一個 非常震撼，就係講到二十世紀初美國最大藝術收藏家，大銀行家 JP摩根在曼赫頓第五大道豪宅接見英國著名藝術交易商 Lord Duveen。摩根一見到呢位英國勳爵，懶得打招呼就話：「雲石廳上有五隻明朝花瓶，三個係無價真品，另外兩個係我以重金叫專家仿製嘅，你睇真啲，然後講 俾我聽，邊兩隻係仿製品？」勳爵二話不說，行近五個花瓶，砰砰嘭嘭就打爛兩件，其餘就係歷史，以後摩根所有藝術收藏品全部由勳爵代為買入，不假手其他人！ 故事嘅教訓係乜嘢？要想成功食大茶飯，自己必定要有真材實料及對自己判斷有超級信心！


PermaLink: https://articles.zkiz.com/?id=32656
Next Page
ZKIZ Archives @ 2019