【馮仁昭四圍超】春嬌老竇細佬睇住蒲余文樂除衫詐型
1 :
GS(14)@2016-11-08 05:54:14彭浩翔執導嘅電影《春嬌救志明》日前喺中環蘭桂坊取景，演員有余文樂、曾國祥同秦沛，講佢哋一家人夜蒲。彭浩翔話今次會有秘密武器，其中一個就係里安納度狄卡比奧（Leonardo DiCaprio）嘅專業替身會參演，而余文樂亦會喺今集有露點戲，彭浩翔話：「樂仔有桑拿沖涼戲，聽到好多女觀眾想睇佢除衫，就畀佢除囉，佢有詐型，但係為咗部戲我唔理。楊千嬅今次都要玩古靈精怪嘢，例如倒吊瑜伽。」
■彭浩翔（左一）話秘密武器係里安納度嘅專業替身（左三）有份拍。
冇特別操肌
嗰晚余文樂同戲中外父秦沛仲有舅仔曾國祥蒲蘭桂坊，樂仔話自己冇乜艷福：「阿嫂千嬅棟喺隔籬，都唔使有非份之想，最多只係過吓眼福。」原先傳樂仔緋聞女友周冬雨有份參演，最後告吹，樂仔話：「冇冬雨，佢（導演）就想。」樂仔話今次拍除衫戲事前要遮住啲紋身，不過就唔使特別操肌，佢話：「個角色本身唔係好弗，正常就得。」嗰晚帶隊夜蒲嘅曾國祥話同老竇一齊去蒲嘅實戰經驗，相信會比一般人多，佢話：「由細到大睇佢（曾志偉）玩，有好多佢飲醉酒俾人抬返屋企嘅經驗。」佢又話跟咗老竇玩咁多年，學壞同擴闊眼光都會有，但就樂意見到老竇繼續玩，佢話：「佢唔玩我仲擔心，寧願佢玩到玩唔到，每日過得快樂，而家我哋都有一齊玩。」撰文：馮仁昭
來源:
http://hk.apple.nextmedia.com/entertainment/art/20161107/19824814