【馮仁昭四圍超】武漢座談會撞京官巡校冰冰被趕喊住讓路
1 :
GS(14)@2016-10-26 08:03:06■現場仲有導演馮小剛（右一）同電影原著作者劉震雲（左二），對忽然被趕都感到愕然。互聯網圖片
馮小剛導演、范冰冰主演嘅電影《我不是潘金蓮》前晚喺武漢華中師範大學舉行座談會，原本現場氣氛好熱烈，但唔知點解去到中途，冰冰忽然畀大會以熄燈威脅要佢離場，搞到冰冰要含淚離開。據內地傳媒報道司儀介紹導演馮小剛、原著作者劉震雲等人出場時，冰冰仲未到。隔咗一陣冰冰突然現身話：「因為剛剛有點情況，我們被堵在門口等了一個多小時，有一個學校主任帶我進來了，謝謝主任！」馮小剛仲讚啲大學生好熱情，當時台下啲反應都好熱烈。
■座談會去到中途司儀以熄燈威脅，冰冰（左）無奈之下含淚離去。互聯網圖片
■范冰冰前晚出席武漢一間大學座談會，先被堵後被離場，場面尷尬。互聯網圖片
馮小剛不滿
點知過咗一陣，司儀突然話因為特殊情況，要冰冰稍事休息，仲話如果唔係就會熄燈，當時冰冰個樣有啲尷尬，不過佢不失幽默咁話：「我們可以點個蠟燭，或者用手機的閃光燈來點亮。」最後馮小剛好嬲咁叫冰冰算數，仲叫佢走。現場有人話冰冰喊住離場，馮小剛亦明顯好不滿話氣氛已經被破壞，交流到呢度可以結束，佢話：「這是我拍電影有生以來，頭一次見到這種事，讓我對武漢留下了不可磨滅的印象，謝謝大家！」據知，冰冰俾大學叫走，係因為有中央高官到大學巡查，學校方面驚啲學生淨係掛住睇冰冰而「冷落」京官，所以有呢啲突兀舉動。到噚日凌晨3點，冰冰喺微博貼自拍照兼留言話：「沒事，都挺好的！都不容易！我也快到家了！」李晨亦留言撐女友話：「確實都不容易，而這也證明了你就是你，獨一無二的你。」對於范冰冰入場10分鐘就被人趕，台下學生起哄，片方事後解釋係因為到場嘅學生超過保安控制範圍，所以請走冰冰。而當地公安都撇清關係，話當時喺大學音樂廳舉行嘅活動，唔屬於大型群眾活動，所以唔需要公安機關審批。撰文：馮仁昭
來源:
http://hk.apple.nextmedia.com/entertainment/art/20161026/19812050