飲檸檬醋養生 54歲林偉狂操防腐
1 :
GS(14)@2016-06-20 03:36:502016-06-08 EW
昔日由模特兒晉身入娛樂圈的林偉，曾是無綫和亞視小生，但回復自由身便往內地和台灣發展，直至一二年才回巢無綫，近年不時演繹奸角，但搶鏡度卻比主角更突出。
入行三十年的他，雖然樣貌成熟不少，但體形依然弗爆，近廿年都保持住四十一吋胸肌及百五磅的體重，當中的養生秘笈原來是抄翁靜晶飲自製檸檬醋，日飲一杯， 縱使年過半百，依然睇得又打得。
烈日狂操
早前林偉在《EU超時任務》和《殭》的演出都惹人注目，鏡頭前要幾奸有幾奸，而打戲也不用替身，身手靈活。一直靠打泰拳操弗身形的他，即使年屆五十四都保持大量運動，一周操足四日，故身材多年如一。
日前在正午烈日下，他在寓所附近的籃球場做拉筋熱身，繼而將籃球架當沙包，進行一連串的拳擊及踢腳動作，打到砰砰聲，短短二十分鐘，已汗流浹背，忍不住除下背心，露出結實的胸肌。
稍休息一會，隨即再做五十下掌上壓，鍛煉出強而有力的麒麟臂，臨走前又繞圈跑步練氣，整整一粒鐘，絕不欺場。狂操一輪後，他前往茶餐廳歎下午茶，沿途不少街坊上前打招呼，他也揮手回應，十分親切。
食得奄尖
對體形十分重視的他，自言從小貪靚，「可能以前做模特兒，所以好貪靚，記得中四嗰年，明明係發育，但我都堅持着住四十一吋鞋碼嘅鞋，因為太大隻腳唔好睇，頂腳都照着。」雖然外形睇得，但原來早年曾因貪飲貪食，搞到膽固醇指數爆錶，身體響起警號，他說︰「以前成日覺得自己唔肥，可以食好多，試過一次食七個葡撻，結果膽固醇指數高達七點一，於是做運動外，還的起心肝改善飲食。」他自爆其養生之道是學翁靜晶飲檸檬醋，還根據對方網上的片段，自製了一大盅檸檬醋，每朝早一杯暖水後，便飲一杯檸檬醋，對清腸胃特別有效。他還指現在食得揀擇，「平時會飲五青汁，唔食煎炸嘢，食燒臘唔食皮，煙酒更加唔掂，好健康。」體力十足的他，也不時北上登台和拍劇，又正開發一些娛樂策劃的工作，認真有排忙。
撰文、採訪 娛樂組 攝影 何國豪 設計 吳俊彪