【add】紅人主場：周汶錡我的小情人
1 :
GS(14)@2016-02-11 10:21:58Louis Vuitton紅色真皮連身裙
名模周汶錡(Kathy)絕對是人生勝利組，愛情事業大滿貫，去年七月更趕及40歲和法籍靚仔老公誕下混血囝囝Jacques。今年情人節，首次多了這個七個月大的小情人，「自己少少變態咁，有時抱住佢，真係唔想放低，好得意呀！」朝朝狂咀囝囝，夜晚抱住不肯放。小情人冧爆名模媽咪，Kathy也期望今年再多追一個小情人！
撰文：林妙萍攝影：郭賢興造型：顏英儀化妝：Omix B髮型：Jack Ng@Kr+
周汶錡對上一次接受add訪問，陀住八個月圓渾大肚，時間一轉眼就過，今日再到影樓受訪，周汶錡和法籍老公Julien Lepeu生的囝囝Jacques已經七個月大，「佢而家爆咗一粒牙仔出嚟，又而而呀呀學講嘢，唔知講爸爸先定媽媽先。」
帶阿B去旅行
升格媽咪後，連笑容都柔和了，Kathy猴年第一個挑戰是帶囝囝坐長途機往法國探九十多歲的太爺，「都幾緊張，有少少擔心，第一次坐咁長途，十一個鐘頭，以前坐慣飛機，最怕遇到小朋友，好嘈、狂喊；而家輪到自己，就好怕影響到人，好矛盾。今次又去兩個星期，同埋老公要滑雪，天氣都凍，新挑戰！」索媽媽其實都睇得開，最緊要笑住面對，放鬆心情「做咗媽媽之後，每一日發生嘅事對我都係新挑戰，都ok啦！到時抱住佢當一個暖袋咁行來行去囉。」
Gucci七彩針織裙紫粉紅針織披肩
Elie Saab米白喱士晚裝
自認變態媽咪
混血囝囝Jacques大眼可愛，肥嘟嘟，除了冧爆父母，更成為網紅BB，隨便一張萌照都有幾千likes，「多likes過我呀，哈哈！不過佢真係幾得意，我而家心理上好似少少變態咁，有時抱住佢，真係唔想放低，有時半夜我餵奶，好似上星期好凍，我直情同自己講：好暖呀，我唔抱你落嚟呀，好似一個變態阿媽咁。」常說，女兒是爸爸前世情人，那麼兒子就應是媽媽的小情人，「我每日都放一張新相入佢自己嘅album入面，一日一張，睇住佢由出世到而家，由七磅到二十磅，整個過程，個人仔係慢慢長大，幾得意囉，而家好期待佢爬！幾好湊，唔會亂喊，通常係餓先喊。」
中藥進補再追
有情人不用老公？今年情人節她和老公、囝囝，一個大情人，一個小情人齊齊慶祝。「其實，我老公唔鍾意情人節，我哋好少慶祝，有一年試過，咁我要求去食飯，去酒店食西餐，你知好full，我哋兩個位就喺大堂正中間，好怪，一啲都唔浪漫，夾硬食咗餐大家都唔enjoy嘅飯，我哋都有共識，唔一定要過情人節。」41歲的周汶錡，已努力食中藥進補、不設防，希望可以短期內再追一個仔女，「我真係想追多一個，想佢有個伴，好似我同Niki(周麗淇）咁，成長過程會開心好多，生多個仔陪佢去打下交，或者生個女嚟激下我，仔女都冇所謂，盡量啦！」
【BB成長日記】
七個月
五個月玩selfie
四個月洗白白
初生至三個月
出生第一天
【產後神蹟】
周汶錡去年剖腹產子後，只是二十多日就修身成功，體重回復陀B前，潮媽、辣媽美名之外，網民更誇譽為「產後神蹟」，「有冇咁誇張呀？你話冇脹到、啲肌肉冇鬆到，就呃你既，我係好彩囉，真係好彩。我嗰時陀仔陀得低得滯，唔可以做運動，開完刀又唔可以，係好好彩！而家要重出江湖，做番瑜珈、gym先得。」懷孕時，和所有媽咪一樣，豁出去，最緊要BB，「冇得控制自己個肚幾大、嘔唔嘔，我冇特別戒口，生活都好照常，如果樣樣唔食，BB咪唔夠營養。」
■周汶錡性感大肚寫真。
■法籍老公Julien Lepeu。
■聖誕節變小禮物，有五千多likes。
更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20160211/19486171