我主場：Dominic劈腿大報復
1 :
GS(14)@2016-01-22 16:28:26何浩文（Dominic）入行以來，眾所周知，他與黃山怡（糖妹）有過一段情，緋聞甚少；但日前他接受本報專訪時表示，其實自己在讀書年代曾被劈腿，又透露當時或有報復心態，試過同一時間有四個女友，由於Dominic不及「賭王」何鴻燊懂得分配時間，最後因為承受不了而分手收場。撰文：黃曉妍在以前校園生活，Dominic指自己不是風頭躉，是被忽略的一群，存在感很低，沒有人理會他，所以在追女仔方面，往往都是由他主動，更直言情路好坎坷。由於被人忽視，Dominic認為只有女朋友才會注意自己，其後甚至試過出軌，他說：「十幾、二十歲時，我試過一腳踏兩船，覺得刺激？可能之前被劈過腿，有小朋友嗰啲報復心態，想做番同一樣嘢，都好嘅，畀我早啲試過呢個階段……咁又唔係啲乜嘢，只係多幾個女朋友，最激烈係同一時間有四個女朋友，甜言蜜語、message、ICQ，同一時間同四個女仔傾偈，後來分手嘅時候，有兩個女仔知道，不過大家都玩玩吓，只係想搵人陪，唔係好認真想拍一段好長時間嘅拖。」
【《鴨王》】■Dominic認為兩輯《鴨王》不是他的代表作，亦並非一個片種，只是一個級別而已。
《鴨王2》
■自言情路好坎坷的Dominic曾親手做生日蛋糕給前度女友。
整生日蛋糕氹前度
要享齊人之福，沒那麼簡單，懂得分配時間是最重要的一環，他說：「有一年情人節，我即刻扮病，之後要逐個逐個後補，後來我都承受唔住，太大壓力，太驚，都係唔好搞啲咁嘅嘢。」談到冧女招數，Dominic表示最重要是溝通，情投意合就自然走在一起，這樣才會長久。難道沒有送花、在女友家樓下等的攻勢？他笑說：「企樓下係箍煲，不過我都試過激嬲女朋友，企咗成晚等佢朝早返工，又唔敢行開，又肚餓喎，所以我追女仔都好渣。」提到最浪漫的一次，他謂在英國讀書時，會煮飯、整甜品，曾親手整生日蛋糕給前度女友。
Dominic過往經常騷肌、拍戲露股，有否擔心角色被定型？他說：「我覺得《鴨王》呢兩輯並非我遺作，之後會有代表作，我都有演過救護員，網上評價都好高，啲人話原來鴨王都識演戲，做戲都幾好睇，我覺得鴨王唔係唔使演戲，只係大家焦點去咗三級，三級片只係一個級別，而唔係一個片種。」
高版糖妹電話傳情
Dominic曾被踢爆與「高版糖妹」唐紫瓊（Candy）蜜遊台北，不過他被Candy前男友Daren直指是第三者，Dominic澄清Candy現時是單身，但跟她未到男女朋友階段，他說：「佢係圈外人，唔明白圈中人生活模式，例如有人突然間搵我出去傾劇本，呢啲生活會令到圈外人覺得唔係好妥當，所以等佢了解吓先，但我哋有傾電話。」提到Candy被形容是「高版糖妹」，跟其舊愛糖妹樣貌甚為相似，Dominic說：「其實唔似，我揀對象係揀性格、有共同話題，就算冇共同話題都要溝通到。」
■早前Dominic曾被拍到與「高版糖妹」唐紫瓊蜜遊台北。資料圖片
■幾年前Dominic曾與糖妹有過一段情。《FACE》圖片
來源:
http://hk.apple.nextmedia.com/entertainment/art/20160122/19461549