中門大開：維穩與保安局 添馬男
1 :
GS(14)@2013-08-05 23:36:35http://hk.apple.nextmedia.com/financeestate/art/20130805/18364454
睇住旺角因女教師罵警事件所引發兩批群眾對峙，已顯示香港警察嘅敏感動作，正掀起了香港社會恐共厭共情緒，此事非同小可，足以動搖香港社會秩序根本。
紀律部隊公信力，至為重要，香港警察由六十年代貪污腐敗有牌爛仔，蛻變成為亞洲先進紀律部隊，係經過近30年努力，不斷改革而成，市民亦曾一度認為警方係最值得信任嘅政府機構。
介入政治鬥爭 警方不智
香港十幾年嚟罪案率好低，比日本東京仲要低，被評為全球最安全嘅城巿。警察工作重點亦已經有轉變，因為有組織及嚴重罪案持續下跌，根據警方呈交立法會保安事務委員會報告最新數字，2012年香港的整體治安形勢繼續保持平穩，整體罪案數字是75,930宗，與2011年的75,936宗相比，下跌了6宗，跌幅0.01%。整體罪案率，即平均每10萬人口所錄得的罪案數字，是1,064宗，較前一年的1,074宗下降0.9%。與其他主要城市的罪案率比較，香港仍然是世界上最安全的城市之一。
罪案率低，近年公眾最關注，已非葉繼歡一類持械重案嘅刑事偵緝工作，而係涉及更加敏感、更大爭議嘅遊行示威、公共秩序。香港人對警察嘅信任亦因此而逐漸流失。由過去李克強訪港引發警方阻礙表達自由，到不斷被指秋後算賬，起訴示威者，到最近縱容親共青關會暴力團，警察員工組織介入政治表態，旺角集會中退休指揮官為親共批鬥女教師活動站台，激動發言，更令公眾相信警察已成為鎮壓公民權力嘅內地維穩系統之伸延。
部份紀律部隊對社運團體有負面睇法，認為佢哋挑戰權威，搞事破壞秩序，大家理解雙方角色上係有矛盾，但亦只限於角色上對峙角力，而唔應該「上腦」。因為警察與市民在力量天秤上並不對等，警察係擁有合法對市民行使暴力嘅人，唔係普通人，唔可以話脫低件制服變番普通人，就可以亂噏亂表態，愚蠢到介入青關會維穩工作之政治鬥爭，將警隊多年建立嘅專業形象及公信力踩多一腳。
前線人員就話唔識大局，但問責之保安局局長一直匿埋，好似唔關自已事，市民對警察信任一旦消失，將會引發更大規模衝突。
添馬男