📖 ZKIZ Archives

意大利繼續玩樂 左丁山

http://hk.apple.nextmedia.com/template/apple_sub/art_main.php?&iss_id=20111007&sec_id=12187389&art_id=15681072&cat_id=255&coln_id=22

股市在星期一跌咗七百七十點，報 16,822，星期二再跌五百七十點，左丁山睇住電視財經台，邊睇邊驚，但又心郁郁想話撈底，不過想起大記者臨去意大利前清貨，仲講多一句：「你唔好手多多呀，我老公話會繼續跌！」於是作罷，安慰自己，睇定啲先。（星期四大幅反彈）
一 收市，大記者電話就到：「喂，家喺威尼斯，廣場好多遊客，十分繁榮。」左丁山話俾佢聽港股跌咗好多嘞，大記者㗎㗎笑：「好彩出晒貨，旅行使錢係好過股票 蝕本好多嘅，嚟到意大利，好玩好食，忘卻香港煩憂，心情幾開朗呀。」係嘅係嘅，唔去意大利用咗啲錢，咪一樣在股市輸晒，醒起肥仔Ｋ曾要求佢買件羅馬球星托 迪球衣，問佢買咗未？佢答：「唉吔，幾乎俾人喊打，到米蘭第二朝，就去體育用品店買托迪球衣，店員話呢度係米蘭，我地國米及 AC球衣就有大把，邊個叫做托迪呀，唔識噃！後來我地去到一啲橫街球衣店，佢地店員話非 AC、國米球衣要放在後面，顧客睇唔到，有人問先至去搵，佢搵唔到托迪件衫呀！」
米蘭人如此熱捧米蘭雙雄，今季怕會失望噃， AC與國米成績都唔好，「老婦人」祖雲達斯復甦，拿玻里係新上位隊伍，係馬勒當拿離隊後之最佳表現，呢兩隊係今季爭標熱門。心念一動，問句大記者：「意大 利負債太多，經濟唔掂，啲人民生活點呀？」大記者答：「繼續吃喝玩樂，似足太平盛世，驚係我地香港人戥佢驚啫，意大利人天跌落嚟當被冚，懶理經濟大事，我 在香港就驚意大利國債，到埗之後，受到人地嘅樂觀情緒感染，冇咁驚嘞。」
大記者老公插嘴話佢在車上碰到一位能說英語嘅意大利中年人，中年人話佢地生活仍有保障，依 賴遊客到意大利與輸出橄欖油已經夠食，但下一代 80後， 90後就前途未卜，好為佢地擔心。唔，全世界皆是如此， 80後 90後嘅失業率非常高，前景不明。坦白講，如果前 衞分子繼續講反增長，不求實際嘅話，世界社會停滯不前，最受害嘅就係 80後及 90後。
（更正：前日講日本打茅波，十號馬係真機靈，不是衝鋒駿驥！）

PermaLink: https://articles.zkiz.com/?id=28233
Next Page
ZKIZ Archives @ 2019