ZKIZ Archives


0984.HK 永旺 PARTIPRAL 派得好

http://partipral-hk.blogspot.com/2011/08/0984hk.html

近日市況開始轉淡, 係時候為他日撈貨做準備, 想提早研究一堆初步覺得頗不錯既公司, 而永旺(0984.HK)就係其中之一間.

永旺即係吉之島, 港人非常熟識的百貨公司, 日常生活中亦頗容易有機會接觸到 - 但似乎目前不太受香港投資者注目? 對我自己來講, 百貨類上市公司諸如銀泰百貨(1833), 金鷹商貿(3308), 或永安(289)等, 一係估值奇貴, 一係就負債過高, 一係派息率不太穩定, 一係就新上市幾年...總之就唔係幾合個人口味. 相對上, 以初步條件計算其實永旺比其他上市同業更吸引我, 加上最新一期業績顯示內地業務扭虧之餘表現亦比往年大幅躍進, 就更加足以令自己加倍留意.





























































永旺營運情況可以分成兩個時段作比較, 先講早期.

2007年或之前, 永旺總營業額有6成以上都係來自本地. 永旺07年響香港共經營23間店鋪, 營業額30億賺2.96億, 平均每間店做1.34億生意賺1千3百萬; 響中國經營12間店舖, 營業額16.7億賺3千9百萬, 平均每間店做1.4億生意賺3百2十幾萬. 數字說明4年前大陸永旺生意已經比起本地已不遑多讓, 只係因為分店無咁多所以總營業額看似不及. 當然講到盈利能力就比本地差得遠, 可能因為內地百貨業競爭激烈, 而當時永旺仍未充份打入內地市場所致.

而2010年, 即最新一期業績顯示, 永旺10年響香港共經營32間店鋪, 營業額30億賺2.32億, 平均每間店做1億生意賺7百3十幾萬. 相較4年前, 本地永旺非單止毫無進步, 若然排除開新店因素, 實際上係大幅倒退, 雖然仲未有耐去到要蝕錢, 但明顯本地永旺已經不能再寄予任何期望, 但求唔死得已經好好. 至於大陸又點呢? 永旺10年響中國經營18間店舖, 營業額29.2億賺1億5千幾萬, 平均每間店做1.6億生意賺8百5十幾萬. 相較4年前, 10年本地永旺同中國永旺營業額竟已完全睇齊! 大陸永旺既表現其實可以用突飛猛進黎形容, 店舖增長只係50%, 但生意增長75%, 盈利暴升4倍! 數字足以證明永旺已經逐漸打入內地市場, 而且已站穩陣腳. 以前永旺可能係香港百貨公司, 但今日永旺明顯已轉變成半個中國百貨公司, 內需概念絕不比純中國百貨公司弱.

毛利率表現尚算平穩, 而另外影響百貨公司利潤既租金同員工成本永旺亦控制得頗好, 4年內兩者增幅皆與營業額增幅相若. 其實按正常推論, 三者表現皆正常既話營業額增長無理由不能體現於純利上, 翻查資料先發現原來永旺有一項 "其他費用" 數字都頗異常, 似乎係有部份盈利流到呢度之後就往往會不知所蹤, 導致最後純利數字咁多年黎一直都無增長. 年報無提及所謂其他費用實際上包括D咩, 但應該都唔係好野, 呢方面要打多少折扣.

以固定資產計永旺比4年前擴張47%, 但營業額反而追唔上, 算係呼應返損益表數字入面香港分部分店增長但平均店舖營業額反而下降既說法. 存貨數字一直正常, 應付賬款增幅亦與營業額相若, 基本上可確認永旺的確在增長中. 貨款一直都唔算多, 上年清多筆依家長短債加埋半億都無, 現金反而過廿億. 而派息政策亦算頗穩定, 過去4年派息率一直保持響45-50%之間, 單純以財政狀況黎講永旺可謂相當理想.

過去4年平均每年現金流5.5億, 共繳2.9億稅同損益表數字相若, 每年皆投放過億元翻新舊舖或開置新舖, 但以現金流來講完全係綽綽有餘. 董事酬金佔純利比例奇低, 難怪過去幾年永旺增長速度奇慢 - 做又36唔做又36之流.

估值方面, 純以10年業績計算, 每股賺$1.07, 派息$0.537, 現價$18.1計近17倍P/E, 息率不足3厘, 比同業有頗大折讓純粹因為永旺過去幾年開新店速度奇慢, 不能附加過高增長股溢價所致. 不過, 若然考慮到未來幾年內地人均消費力提高係不可改變既大趨勢, 隨住內地業務漸入佳境, 永旺其實係有權食到應呢個大勢.

公司最近公佈盈喜, 亦係由於 "中國境內消費者信心的改善導致本集團的經營業績持續改善", 雖然未知增長多少, 但單以10年表現計, 永旺內地方面的確有權繼續取得理想成績. 永旺本身交投甚疏落, 主因係街貨流通量奇低, 但若然以長線投資角度去考慮, 永旺仍然係唔錯既選擇.

PermaLink: https://articles.zkiz.com/?id=26903

Next Page

ZKIZ Archives @ 2019