|
||||||
|
王光亞批評香港 公僕唔識做老闆，究竟鬧邊個，冇人肯對號入座。疑似特首候選人范徐麗泰話可能係批評特首曾蔭權，於是引起一位老友猜謎，佢對左丁山講：「我唔敢講范太啱定 唔啱，但按照香港公務員架構編制，公務員之首唔係行政長官，而係政務司司長，以往港英時代，就係布政司統領所有公僕嘅，並非港督。王光亞指香港公僕缺乏長 遠規劃，唔識做波士，意有所指，如果我係唐英年司長，就會有啲面紅嘞。」 唔係啩，如果咁猜法，公僕出身之曾俊華已失去角逐特首嘅機會，若唐 英年司長代公僕捱批，做唔成特首，會益咗邊個？范太還是振英哥呀？有朋友為唐司長抬轎，話司長已去咗北歐坐郵輪，唔知幾輕鬆，大有安車平五路之勢，但另一 位朋友力撐振英哥，話如果唐司長做硬，應該有人勸退振英哥嘅啦，但至今未有人向振英哥打過眼色，做吓手勢噃，於是去馬之心已決，張震遠、陳啟宗，大力打氣 力挺，堅持到最後一刻，事情可能仍會有變化。 競逐特首之事，我地一味靠估，但公僕唔識做主，唔識下決定之事，廣大球迷應有體會。話說上星期 六車路士大戰阿士東維拉，大球場坐滿人，氣氛熱烈，造成四贏局面，而英超聯宣傳推廣成功，香港足總袋二百萬元，笑到見牙唔見眼，車仔名利雙收，車仔粉絲及 廣大波迷睇波睇得非常高興，人人happy。但有一個單位好氣頂噃，就係馬會，馬會向民政事務局申請車路士對阿士東維拉呢場比賽可以接受投注，但民政事務 局say no，搞到足智彩冇得開，馬會為之氣結，民政事務局嘅理由係乜？據南華早報講，政府話逢有香港球會參加之球賽，本港不能開盤。但車仔對維拉，關香港球會乜 嘢事呀？民政事務局解釋，有香港球隊參加之tournament（賽事）唔准下注，根據咁嘅邏輯，香港若果有日入咗世界盃決賽週，香港球迷咪所有世界盃賽 事都唔能夠投注？曾德成局長飽讀馬克思，佢嘅邏輯頭腦可能與別不同，佢嘅屬下係標準公僕，o依家有機會話事嘞，冇教車師傅教路點識做boss吖。 |
||||||