一直有傳，《香港01》有可能大手筆入主有線電視，以及同集團嘅電視及數據網絡。不過，喺9月4日投票日後兩日，九倉又發出公告，表示正同多過一個買家洽商賣有線電視，依家未同任何人達成協議。
俾著中環客係九倉，都會慢慢揀買家。因為9月4日之後，傳媒會好值錢，特別係有線電視有自己嘅數據網絡同埋內容，依家無必要咁急賣俾《香港01》幕後果位金主，可以等各方叫價，邊個價高或著數多至賣俾邊個。
喺9月4日之前，大家都唔知《成報》係乜水，只係知佢同亞視一樣，曾經一段欠員工人工同欠作為稿費，亦都試過因無水停刊。但依家呢份缺水嘅報紙，俾習系班友買咗入嚟後，就喺選舉日前發功打到689傻，仲要令689啲支持者選情受影響。換言之，689啲盟友，都唔會想有線電視落入習系班友嘅手後，日日攞到打689，否則689點連任。大家唔好唔記得，有線電視旗下有個叫奇妙電視嘅免費電視頻道，如果習系買咗落嚟打689，後果非同小可，大鑊過《成報》好多。所以，689啲盟友會周圍搵銀，然後嗌一個更高嘅價錢買有線電視落嚟。咁站喺九倉股東嘅立場，依家賣有線簡直傻的嗎，梗係未來呢一個月不斷迫啲買家嗌高啲價錢，得番嚟嘅錢就變成派息變俾啲股東。
不過九倉亦唔好太遲做決定，過咗特首選舉，或北京對下屆特首有明確意向，有線電視就無咁值錢，屆時想叫高嚟賣都難，貪字得個貧。習近平近排搵曾俊華握手，如果有再進一步動作，曾俊華幾乎九成機會做特首嘅話，就無人會想高價買有線電視，所以呢單deal，將會考驗九倉依家一眾當家嘅政治智慧。
中環客