|
||||||
|
屹立旺角四十年的漢榮書局，是教科書局的龍頭，上月中決定將自用的鋪位招租。有物業代理估計鋪位價值四億元，每月可收過百萬元租金，漢榮則明年遷往油麻地經營。 雖然坐擁數億元物業，但掌舵人石氏三兄弟大聲呻窮，多年來居於書局樓上的舊樓，每日粗茶淡飯，面對日漸式微的教科書行業，只望不在自己手上敗了家業。 晚上七時，旺角仍人來人往，但漢榮書局已關門，老闆石氏兄弟齊齊趕到樓上，與逾八十歲的母親吃飯。老大石漢基說：「我哋三兄弟都係一家四口，再加阿媽，十 三個人。呢個係老豆定落的規矩，星期一至五要一齊食飯。」飯菜由菲傭準備，十餘人只有五碟餸，記者到訪當晚，菜式有煎腸仔、煎紅衫魚、炒蛋及清菜。 飯後小孩回家做功課，大人則留低陪母親打麻將，老大說：「係老豆吩咐每晚打四圈，怕阿媽老人痴呆。」他們三房人均住在店鋪樓上，差別只在於樓層，「老豆安排每一家都住一個六百幾呎單位，阿媽呢度因為大家食飯，就打通兩個單位。」 這幢大廈樓齡逾四十年，由於日久失修，更試過跌石屎壓死人，但他們卻未想過搬走，老大說：「無錢呀，每個月啱啱夠用，老豆亦唔會俾。」老二石國基亦暗示人工不夠三萬元：「我哋近幾年人工先多啲，但仍然有五分一員工薪水高過我。」 老大坦言公司年年有盈利，只是老父下令不可分錢，一家人亦已慣了簡樸生活，兄弟統統無車，連手錶也沒有，腳踏拖鞋便上班。記者見老大拿着iPhone，讚 他潮，以往用三百元有找的諾基亞電話的他反問：「咩係iPhone？呢部係仔女送俾我嘅生日禮物，但我剩係識打出打入。」；老二更補充：「我直頭從未買過 電話，老婆仔女用完唔要就俾我。」說畢又將話題扯到父親，「佢九十歲時，出街都仲係坐小巴。」 希特拉父親 兄弟經常將父親掛在口邊，但其父石景宜已於○七年過身，享年九十一歲，舉殯時還有全國政協常委徐展堂負責悼辭，多位政商界名人也到場弔唁。 雖然走了三年，但老父餘威猶在，老大笑說：「父親在世時，兄弟鮮有意見不合，但佢過身後，我哋經常喺工作上各執一詞，試過問母親俾意見。」 事實上，石景宜生前甚為霸道，曾以「家中希特拉」形容自己，只要兒子犯錯，就算眾目睽睽亦破口大罵，老大苦笑道：「佢會不停大聲重複咁鬧，鬧足三個鐘。」 因此書局大小事情慣了由他全盤決定，就算臨終前幾天，也要請假出院回家交代後事，石老太說：「佢個性好強，同醫生講抑係俾佢請假出院，否則佢自己走。」 石景宜遺訓 一不得轉行 二不得到國內做生意 三平日晚上七時陪母親吃晚飯，新抱要陪奶奶打麻將。 四十年內不得變賣店鋪及書畫 讀書不及做老闆 儘管石景宜從事教科書生意，但對兒子的學業卻不大着緊，長子小學未畢業便要幫手，「我六一年落嚟，當時喺大陸讀完小四，落香港後讀書跟唔上。」石景宜便命他輟學，「老豆話讀得再叻，出去都係幫人打工，但喺屋企做生意，就算細細哋都係老闆。」 至於老三石永基也是初中畢業便回家幫忙，老二學歷最高，在能仁書院讀文史畢業後，同樣賣了一輩子教科書，「老豆問一句做唔做，答做，一做就幾十年。」 過去四十年，三兄弟從未想過向外發展，老二笑言：「一路跟住老豆，根本洗咗腦，剩係知要做教科書。」大哥聽罷也同意，「老豆做得咁好，我無理由做其他。」 擺街邊出身 五八年，石景宜創立漢榮，最初僅在旺角街邊賣二手書，石老太回憶道：「佢好大聲，地下講嘢，七樓都聽到。」由於以往教科書不常改版，買舊書的大有人在，石 景宜在書上明碼實價，很多學生到來幫襯。老大說：「最初我哋用幾個木箱放在地下賣，後來改用木頭車。」接着生意漸漸穩定，石景宜便租了附近的樓梯底繼續營 業。 每逢暑假便是黃金檔期，每日朝十晚十開鋪，關門後還要補倉，往往做到凌晨二時。漢榮更免費替不少中學印製書單，封面例必印有漢榮地址，不少家長因而慕名而來買書，石景宜遂決定出版教科書，成功賺了第一桶金。 除了中學書籍，大學生亦長期幫襯漢榮，「八十年代，英國政府的ELBS系列，喺不同的出版社揀書重印，內容一樣，但價錢只係三分一，專賣俾發展中國家；印 度政府亦有重印英美出版社嘅書，價錢更加係原價五分一。其他書局好少賣，但我哋專做呢類書，貪佢利小量大。」老大石漢基笑說。 八二年，石景宜累積廿年賣書的滾存，以六百五十萬元買入現鋪，老大說：「個鋪好貴，差啲上唔到會，好彩老豆同廣東省銀行熟，靠友情搭夠。」 漢榮歷史 創辦人：石景宜 現任掌舵人：石漢基（60歲）、石國基（58歲）、石永基（53歲） 58年石景宜來港，於奶路臣街擺地攤賣二手教科書 60年代尾搬至通菜街國榮大廈樓梯底，改名國榮書店 70年代租國榮大廈鋪位營業，改名漢榮書局 70-80年代在彌敦道租鋪開分店 82年以650萬元買入國榮大廈地鋪連一樓 86年成立導師出版，出版教科書 07年石景宜逝世 10年漢榮鋪位公開招租；並以$5,900萬買下彌敦道514號地鋪連一樓，明年四月搬鋪。 硬做夕陽行業 惟時移世易，教科書現屬夕陽行業，漢榮生意亦走下坡，「以前每間出版社只得一套數學，依家為咗校本課程，出版社可能為十間學校出咗十套數學，以前入一百本數學已夠晒，依家每間學校的版本入二十本，已經有二百本，但唔係間間學校都有學生嚟買。」 至於出版亦困難處處，「以前出教科書，只需一本學生用書，一本教師用書；依家仲要DVD、支援網上教學同校本課程，成本增加以倍數計算，但加價又唔可以加一倍。」老二歎道：「九七到依家，教科書出版社執咗八成半。」 儘管狂呻生意難做，但三兄弟從沒打算轉行，老二說：「老豆唔俾呀，講明唔可以做其他生意，佢怕做其他生意搵得多錢，我哋會放棄祖業；如果其他生意搵唔到錢，又怕兩邊都做唔好。」他們曾向老父提議兼做圖書生意，亦被鬧到飛起。 向現實低頭 隨着學生人數越來越少，三兄弟擔心家業不保，「教科書通常係八二折買番嚟，九折賣出去，利潤好低，好彩我哋係自己鋪，但一路係咁都好難經營落去。」 故此老父過身後，他們也違旨抗命，決定搬離現時人流極旺的鋪位，並以積存資金在油麻地買鋪重新來過。老二直言若父親在生，搬鋪肯定泡湯，事關漢榮從未離開 奶路臣街及通菜街，最多是搬往附近鋪位，石景宜曾說過：「店鋪不能搬太遠，否則起碼要三年才能建立顧客群。」但老大指無奈要面對現實：「附近好難搵鋪，搵 到都好貴，我哋賺唔賺到錢無所謂，但最少要繼續經營。」 踴躍捐書 石景宜是教科書大王，亦被譽為「文化書使」，八十年代起便不停捐書到國內的公共圖書館及大學，最少捐了六百五十多萬本；老二說：「我哋三兄弟的人工，都要俾佢扣起一半嚟買書。」 為了表明自己捐書不求回報，石景宜禁止子女在國內做生意。國內圖書館收得他的捐贈後，往往找當地著名藝術家以畫作回禮，久而久之，石景宜收藏大量畫作，生 前已捐出一萬件作品到內地藝術館，惟家中仍收藏數千幅畫，當中包括每平方呎叫價約一萬元的著名嶺南畫家陳永鏘的作品。 |
||||||