2010-11-24 AD
國泰航空發「盈喜」，預料全年純利不少於一百二十五億港元，恨死太平洋隔籬──即係美國啲航空公司。美國航空公司連年艱苦經營，賺錢能力甚低；加上美國內陸航空，美國歐洲航空之間嘅生意冇乜增長，現在間間公司都望住太平洋。CNN報道話一位美國商人在北京呆等五日，先至等到一張商務艙機票，飛返洛杉磯，美國航空公司紛紛密謀增加班次航線，由西雅圖飛上海，底特律飛香港等等，總之中國市場就係美國航空業嘅翻身希望。
美國朋友Ｓ十幾年前去過中國一次，近年睇美國傳媒報導中國近況嘅篇幅，愈嚟愈多，特別係佢鍾意睇嘅紐約時報專欄作家Thomas Friedman（暢銷書《世界是平的》作者）近幾個月在專欄不斷讚揚中國建設高鐵，建設新能源，而美國就乜都唔做，令佢心急兼心淡。朋友Ｓ於是決定到中國旅行，希望可以觀察到新發展，上星期就去咗上海，之後與當地一位民企老闆到杭州西湖，老闆本來想用私家車嘅，朋友Ｓ話一定要試吓中國高鐵，親身體驗 Friedman之言。民企老闆欣然答應，就一齊去搭滬杭高鐵。嘩，朋友Ｓ開晒眼界，火車站夠新夠大，高鐵列車夠靜夠快，最高時速行到三百五十公里，四十五分鐘之後就到咗杭州，朋友Ｓ為之讚不絕口，深受感動，覺得美國好落後。
行出杭州火車站，搭的士去西湖湖畔酒店，點知的士不見了，的士站人龍長又長，二人排隊企咗七十分鐘先至上到車，二十分鐘後到達酒店，總共用咗九十分鐘，可以乘高鐵來回上海一次。坐的士之時，民企老闆向司機發牢騷：話有高鐵都冇用，等佢在美國朋友面前冇晒面。點知司機好似識背書咁，教訓老闆一輪：「中國正值增長期間，遇上小困難，人民要忍耐，向國際朋友解釋，不要埋怨甚麼，我們的困難是短暫的，明天是美好的。」老闆唯有苦笑，繙譯畀朋友Ｓ聽，朋友Ｓ夠幽默，回答話：「中國的士司機都係叻啲嘅，受過良好國情教育，我地紐約、三藩市啲司機就只係識鬧總統，鬧市長，鬧埋議員，唔肯為美國講句好話！」