由董伯伯吹雞成立嘅團結香港基金，揼咗闊佬共一億八，唔單止未能提升香港人開心指數（基金的宗旨），就連內部員工都唔係好團結，可能同總幹事鄭李錦芬（Eva Cheng）來自傳銷公司Amway有莫大關係，鄭太在Amway浸淫三十四年，五年前離開時已是美國Amway執行副總裁，團結基金內有員工向小宗爆料，鄭太搵咗前Amway員工加入，咁，當然滲透不少Amway的企業文化啦，團結基金搞活動都要湊夠人數去撐場，多數從基金的資料庫內政、商界共1,500名單中邀請，以防黃絲帶人士出席搗亂，但人數湊唔夠，就要員工交廿個朋友，拉埋他們來參加，其實做傳銷都係咁，梗係自己先啃一大批貨，然後再收僆做下線，再一個傳一個，鄭太在Amway做到咁高職位，梗有番兩道散手啦！堅叔真面目示人 年屆七十八歲嘅會德豐副主席梁志堅（堅叔），週日落場到海港城監察將軍澳新盤SAVANNAH，親自就保安叉地產經紀頸事件出來解畫，鏡頭所見，堅叔老人斑都幾犀利吓，同年屆八十八、依然皮光肉滑嘅四叔李兆基和李嘉誠冇得揮，梗係啦，聽講兩位闊佬都好捨得保養皮膚，有專人從瑞士飛來香港上門做去斑工程嘅，慳番唔少時間嘛！所以堅叔雖然年輕過佢哋十年，相形見絀，錢作怪囉。 中環寸嘴：最緊要有維他命M 工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。 啲阿太嘅仔女入到名牌大學，最鍾意送大學T恤俾人，慌死人唔知佢個仔入咗哈佛咁，唔係哈爾濱佛教聯合會呀，不過件T恤有啲意思嘅——Full of the vitamins and minerals necessary for good mental and physical growth，唉，計我話，咩維他命都假，最緊要有維他命M（M for money），我聽啲阿太講，想入外國名牌大學，要專門請個consultant扶個仔女，入名牌大學要五項全能、領導才能、社交手腕，又要封推薦信同埋interview，依家僆仔個個都有番咁上下，唔鬥M鬥乜呀？不過入到哈佛又唔代表一定畢到業噃，好似甘乃迪家族咁夠照，都捐唔少錢去哈佛，但都唔讀Harvard，去Brown University讀，嗰度有一對一教學，冇話畢唔到業。不過到咗我呢個年紀，正所謂飽歷滄桑，梗係用M搵啲好嘢食好過啦，早排見番啲舊同學，嘩，嚇死我，皺晒皮嘅，真係見到都驚呀！哈佛喺波士頓最出名New England Clam Chowder Soup，嗱，馬車會西餐部都有個叫「金必多」忌廉魚翅湯，係以前娛樂戲院（現為娛樂行）的七重天餐廳發明o架！輕輕加咗兩條金華火腿絲吊吓味，唔犯本吖嘛！家陣都有得食o架，補吓啲骨膠原。 十姑娘慘情 十姑娘上月底被前媳婦陳復生入稟呈請破產，當年維護「奶奶」在澳娛嘅利益，不惜冒着風險與賭王對着幹，何解今日要咁樣對喺養和醫院「攞緊籌」嘅十姑娘呢。無計，又係「錢」字，事關三年多前陳復生與前夫何東舜銘離婚，獲高院判獲一億二千萬贍養費，何東舜銘遂提出上訴，鑑於十姑娘被指替兒子持有大部分資產，加上舊愛何鴻章當年借出兩百萬予十姑娘投資澳娛，又加入爭奪澳娛股份，亦有意申請十姑娘破產，破產呢家嘢，以債權人排名法，先到先分，陳復生都係保障番自己利益啫，只不過如果十姑娘破產，唔單止冇工人使，分分鐘要由養和搬去瑪麗！ | ||||