|
||||||
|
深圳特區慶祝特 區成立三十周年，在九月六日早上舉行盛大紀念會，胡錦濤親臨發表談話。中國極度重視機密，唔似得菲律賓咁樣，打開肚皮俾外人睇晒啲烏龍嘢醜嘢，所以未到儀 式開始，仍然未知有邊啲人士演講。睇電視直播，內地大人物，無論係胡錦濤，還是地方領導，人人頭髮烏黑，蛋撻頭有兩吋高咁滯，黑頭髮或可以靠染髮，但厚髮 之餘，不見前額漸禿（如我地曾特首、唐司長、張局長等），確實令人驚奇。左丁山最近見到幾位八十後，由二十二歲至二十八歲，竟然幾位都已經甩頭髮，後額見 到地中海雛形，幾難搞噃。年青人問左丁山有何秘方補救，唉，自身難保啦。但諗深一層，自己二十八歲時，頭髮有胡主席咁厚咁黑o架，點解今天之八十後咁早甩 頭髮？無計之餘，只好安慰佢地：「嗱，球星朗尼、洛賓只係二十四五歲咋，頭髮幾近甩清光啦，有乜好驚噃。」 中國領導人的頭髮咁鬼靚，睇落唔似係假髮，其中必有妙方，無理由個個六十幾歲都有咁多頭髮o架？中南海內嘅御醫照顧領導人頭髮，必有不傳之秘，如果肯改變政策，向全世界發表，取得專利，製成護髮產品出售，成立一間國企主其事，呢間國企一定好發，稱霸世界護髮市場。 睇完電視直播，出街吃飯去也。星期一飯堂內，赫然見到張總在座，哦，又到秋天開學之期，張總自上海回港，到城大碩士班教書，教完之後十一月底就返巴黎老家住番三個月過聖誕新年，兩公婆優哉游哉，教左丁山好生羨慕。 在 座者亦有不見個幾月嘅中貿林，佢話俄羅斯大火熄滅之後，去咗俄羅斯旅行，旅遊巴士上碰過三個俄國導遊，位位精彩，一位係美女，在大學讀國際關係，九月就會 到北京讀碩士；一位係青年男士，居然識講廣東話，對灣仔環境十分熟悉o忝；最後一位係老人家，獨坐之時，難掩憂憤之情，中貿林故意刺激佢，問三個問題，問 題一：俄文嗌普京萬歲，點發音？老導遊即刻話普京唔係佢朋友，講唔出普京萬歲；第二條係：「你最懷念那一個時期？」老導遊竟然答：「史太林時期！」第三 條：怎樣看俄羅斯的明天？老導遊低頭不語。於是中貿林問佢：「你以前做乜職業o架？」老導遊答：「我以前係大學新聞系教授」，中貿林話老人家緬懷過去，不 勝欷歔，青年人則去中國、香港，相信明天會更好，邊會記得史太林係邊個吖。 |
||||||