呢期俾佔中洗版，船長無理由唔講埋一份，不過仲叫佢「佔領中環」已經out咗，話佢係一場「革命」又唔太準確，都係「雨傘運動」啱聽啲。
嚟個申報先，由9月26日學生佔領公民廣場開始，我每日都有去各個佔領區留守最少一小時(主要去金鐘)，盡嚇綿力又好，緊貼事情發展又好，總算係見證住今次運動嘅演進。作為一個金融人，你問我驚唔驚再搞落去會影響經濟，長遠搞垮香港前景? 當然驚，但就算係咁，我仍然覺得要堅持落去，因為大家從day 1已經知道，今次係一場「不可為而為之」嘅運動，結果係點大家心中有數，但如果因為機會微乎其微就唔去爭取，咁香港先係真正玩完，未來只會任人魚肉。再者，要一個人、一個政府、一個國家進步，最有效方法就係俾壓力佢，無人話一定會成功，爛泥絕對可以扶唔上壁，但未試過又點知結果。
好似講得遠咗，返正題，喺今次運動，無論政府、警察抑或抗爭人士，都有好多嘢值得投資者參考，即管喺度列出四個我學到嘅投資智慧，如有補充大家不妨繼續寫落去:
1. 世事萬物皆不能預測，尤其係人心
有邊個會估到今次「雨傘運動」可以延續咁耐，規模又咁大? 就算佔中發起人戴耀廷，當初都只係估計得一萬人出嚟，最多搞佢一兩日就玩完。正所謂人心難測，佢真係可以話變就變，而股市係人嘅遊戲，幾時都要有認錯同修正嘅準備。
2. 不要用理性去分析非理性行為
係人都怕危險，如果用理性分析，9月28日放完催淚彈後，照計個個返屋企，警方成功清場，但事實係，之後幾日上街人數不減反增，大家唔係唔驚，只係被憤怒情緒支配，做出所謂嘅「非理性行為」。重大事情當前，感性永遠蓋過理性，正如牛市一樣有人大手高追，呢個就係人性。船長近期實在聽到太多分析員評論員，嘗試用理性角度分析呢場運動，大市又會點樣走法，我覺得全部都係bullshit，因為咁樣只會同警方嘅預測一樣，結果多數係錯。
3. Timing is everything，不要猶豫不決
佔中三子淪為大輸家，就算佢哋個plan有幾勁、願景有幾大都好，學者即係學者，無好好把握時機一樣要輸。已經唔好提之前傾到天荒地老都唔行動，淨係去到9月27日大家情緒高漲時，戴耀廷都話唔會提前佔中，已知佢哋難成大事，最後急急補鑊(28號又宣布啟動佔中)，結果換嚟「騎劫」之名，實在罪有應得。成日都話炒股出貨係藝術，佔中三子就好似硬頸嘅投資者咁，一心死摣唔到目標價都唔肯沽(10月1日佔中啟動日)，到發現形勢大變已經太遲，所以幾時都要識得靈活變通，千祈唔好猶豫不決。
4. 不要盡信專家/內幕人士
9月28號晚，船長喺金鐘不停收到警方即將使用橡膠子彈嘅傳聞，恐慌之下離開現場，事後覺得自己同被傳聞壞消息震走嘅股民無咩分別(當然一個講緊人命，一個講緊錢，但道理差不多)。究竟警方當日係咪真係會用橡膠子彈?無人知，但事實係，好多人聽完之後決定離場，如果真係有有心人發放消息嘗試控制場面，我諗算係局部成功了。之後一個星期，晚晚都聽到警方清場傳聞，更試過一大堆權貴密集式咁呼籲學生離開，情緒一時緊張起嚟，但結果就咩都無發生。我唔係喺度叫大家唔好理呢啲消息，相反我更加相信佢哋真係聽到某些「內幕」，真心叫大家離開，不過個結果只係話咗俾我聽，就算你收到嘅風有幾堅都好，一樣有隨時改變嘅機會，莊家話聽日炒上，你又點肯定瞓醒一覺劇本無變? 當然你做莊就另計啦。
「雨傘運動」其實仲有好多嘢值得探討，恕我今次講住咁多先，天佑香港。