政府經濟顧問表示，住宅市場喺第二季回復熾熱。
單係第２季，樓價就升咗3%，而6月整體樓價，比97年高峰期超出44%!
至於供款負擔比率，而家係54%，高於過去10年水平、經濟顧問提醒如果加息3%，負擔比率將會大幅抽升去到70%，呼籲置業人士要留意風險。
旺市之下樓價指數亦一再突破歷史高位，整體指數最新報125.66，按周上升1.3%，累積兩周升幅有1.69%。
樓價指數連續兩星期破頂、比去年高位仲要高出兩點，而且預期升勢未停。
目前只係得大型單位指數未破頂，因為受到政策市壓抑，今年以嚟豪宅走勢逆市墮後。
唔只輸喺香港市場、喺全球都係落後!
上半年全球32個城市嘅豪宅價格，平均上漲6.2%，美國主要城市超越歐洲同亞洲城市，香港豪宅倒跌，跑輸全球主要大城市。
但係踏入下半年形勢有變，豪宅有 "翻生" 嘅跡象，二手減價沽樓嘅情況有收斂。
代理話，期間有資金流向豪宅市場，豪宅新盤有稅務津貼，所以帶頭暢銷，推動埋二手豪宅升交升上16個月新高。
今年樓市係由新盤主導，表現即將突破歷史紀錄，截至8月、全港一手樓買賣總值已經近乎1000億，比舊年同期大增一倍有多! 而好戲在後頭!
因為年底之前、大約仲有6000-8000夥新單位登場，估計最終大數係15000宗一手買賣，牽涉成交總值會見 1500億，將會破頂!
樓價升，但地價低落，最新荃灣楊屋道地價低過預期批出，但正係基於地價回落，發展商都肯出手投標，試下撈平地!
屯門仁政街地皮及同區樂翠街，兩幅細地皮爆冷!
而且都位於屯門、並唔係優質靚地，呢區地價今年創沙士後新低，咁都要爭?!
如果夠細、夠平，真係無有怕! 有發展商指就係因為地價回落至合理水平，先至吸引他們入標。