ZKIZ Archives


陸東屋企有肥女像

2015-02-05  NM
 
 

 

上星期市場突然傳出,星級靚仔分析員陸東嘅旗下基金,懷疑被大客抽資,導致基金規模大縮七成,至不足一億元,傳聞仲話安德魯‧陸有意賣盤。佢雖然否認其事,但佢近年樓市、股市都估錯,的確又令人跌到成地眼鏡碎嘅。

回想起來,佢最紅嗰時已經係○七年。當時恒指突破三萬點,陸東獨排眾議話會跌,結果恒指真係兩星期內跌咗四千點,無呃你!同年佢仲以六千四百萬元,買咗飛鵝山四千呎獨立屋自住,花園都一萬呎o架。呢間屋早前重建及大裝修,小宗去睇過,幾有特色喎。陸東竟然喺豪宅一邊,放置兩座肥女像。據講,有招財作用。而大宅之拱形窗,亦通通改為方形窗,事關拱形看似墓穴,不利風水也。估唔到官仔骨骨又讀番書嘅安德魯‧陸,會對風水深信不疑喎!佢一向形象高檔,有好多富貴師奶「集郵」,不過同時亦因「寸寸貢」咁嘅款,喺行內得罪唔少人。其實近年咩都肯噏嘅基金經理,已買少見少,小宗都希望佢好似佢本自傳咁──繼續「傲」行啦!

踢竇「和聲」試菜撞着「和聲」

香港股壇猛人、曾服侍富豪李嘉誠等嘅順隆證券老闆李和聲,幾年前喺中文大學創辦和聲書院。身為上海人,佢喺書院內搞咗間上海菜館「滬軒」。全港大學就只得這家上海菜,據聞大廚師承上海幫最鍾意去嘅富豪飯堂「上海總會」。當日開張,唔少人山長水遠慕名去食。小宗趁現在熱潮減退、人少少去試吓。小宗未去過和聲書院,第一次去,竟然就撞着李和聲!佢帶埋成班上海老友嚟開餐,仲話每次招呼老友都來呢度。大家想攞股市tips?不妨去和聲書院碰碰和聲,不過就先要學番幾句上海話傍身噃!講番菜式,食上海菜,小籠包、生煎包等不得不試,味道不過不失啦,但四十幾蚊六隻,去邊度搵!再配一壺碧螺春消滯。瑤柱蛋白炒飯,水準之上,分量夠大碟,但畢竟只是六十蚊一碟,不要期望有好多瑤柱。唯一令小宗失望的是「和聲擔擔麵」,用得「和聲」牌頭,又點可以求其?學「食神」話齋,肉無肉味、醬無花生醬味、麵質唔彈牙、至於上湯,同豆瓣醬開水一樣,失敗中嘅失敗!呢一餐勝在夠平,二百幾蚊食咗六個菜,如果遇上李和聲呢位股壇老前輩,贈番兩句,就咩都抵番晒啦!

一個經紀有四個契媽

本刊曾經報導過一個關於炒倫敦金的故事,故事中一個普通師奶阿蓮,與實德金融嘅經紀cold call聊天,經紀未見過面,就叫咗阿蓮一聲「契媽」。結果着晒迷、瞓埋身嘅阿蓮,就咁炒金唔見咗廿萬積蓄!此後有炒金經紀向小宗報料,揭露行內運作。原來一個契媽並不算什麼,好多炒金經紀,起碼都有最少三、四個契媽契爺「備用」。每朝早上司都會捉住大家開會,報告吓認咗幾多個契媽,及開咗幾多張單。佢話經紀炒金根本唔係為咗幫個客賺錢,只係為買出賣入賺佣金。佢仲提醒師奶,要特別小心過年等假期前夕,「契仔」會亂作怪:「因為上司會鼓勵大家早啲收工,安心放假,所以會叫大家狂trade,邊個做夠單就邊個可以早收工!」咁講法,佢哋最happy時你就最痛苦,所以契仔唔好亂認呀!

陸東 東屋 屋企 企有 有肥 肥女 女像
PermaLink: https://articles.zkiz.com/?id=130897

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019